پرەزيدەنت • 30 قاراشا، 2021

مەملەكەت باسشىسى شۆەيتساريانىڭ پرەزيدەنتىمەن كەلىسسوز جۇرگىزدى

جەنەۆا قالاسىنداعى اۋليە پەتردىڭ كافەدرالدى سوبورىنىڭ الدىندا وتكەن رەسمي كەزدەسۋدەن كەيىن ەكى ەلدىڭ باسشىلارى كەلىسسوز جۇرگىزدى، دەپ حابارلايدى Egemen.kz اقورداعا سىلتەمە جاساپ.

تابيعات مۇسىلمانقۇل

قاسىم-جومارت توقاەۆ پەن گي پارمەلان ءبىر-بىرىنە رەسمي دەلەگاتسيالاردىڭ مۇشەلەرىن تانىستىردى. سودان كەيىن ەكى ەلدىڭ ءانۇراندارى شىرقالدى. پرەزيدەنتتەر شۆەيتساريانىڭ تۋىنا قۇرمەت كورسەتىپ، قۇرمەت قاراۋىلىن بويلاي ءوتتى.

سالتاناتتى راسىمنەن كەيىن مەملەكەتتەر باسشىلارى شاعىن جانە كەڭەيتىلگەن قۇرامدا كەزدەسۋلەر وتكىزدى.

ءوزارا سەنىم جاعدايىندا وتكەن كەزدەسۋدە مەملەكەتتەر باسشىلارى قازاقستان مەن شۆەيتساريا اراسىنداعى ساياسي، ساۋدا-ەكونوميكالىق، ينۆەستيتسيالىق، قارجى سالالارىنداعى كوپجوسپارلى ىنتىماقتاستىقتىڭ احۋالى مەن پەرسپەكتيۆالارىن جان-جاقتى تالقىلادى.

بۇدان بولەك ەكى ەل باسشىلارى برەتتون-ۆۋد ينستيتۋتتارى، حالىقارالىق ۇيىمدار اياسىنداعى ءوزارا ىقپالداستىقتى قاراستىرىپ، ايماقتىق كۇن تارتىبىندەگى ماسەلەلەردى، ونىڭ ىشىندە اۋعانستانداعى جاعداي مەن وسى ەلگە گۋمانيتارلىق كومەك كورسەتۋ ماسەلەسىن ءسوز ەتتى.

سونىمەن قاتار پاندەمياعا جانە كليماتتىڭ وزگەرۋىنە قارسى كۇرەسكە، ورتالىق ازياداعى سۋ ديپلوماتياسىنا قاتىستى وزەكتى ماسەلەلەر جونىندە پىكىر الماستى. قاسىم-جومارت توقاەۆ پەن گي پارمەلان ساياسي جانە ەكونوميكالىق بايلانىستاردىڭ وڭ قارقىنىن اتاپ ءوتىپ، ەكىجاقتى بايلانىستاردىڭ بارلىق باعىتى بويىنشا ءوزارا ءتيىمدى ىنتىماقتاستىقتى ودان ءارى دامىتۋعا مۇددەلى ەكەندەرىن ءبىلدىردى. مەملەكەت باسشىسى شۆەيتساريامەن جان-جاقتى قاتىناستاردى دامىتۋعا باسا ءمان بەرەتىنىن جانە وسى ەلدى قازاقستاننىڭ ەۋروپاداعى ماڭىزدى ساياسي ءارى ەكونوميكالىق ارىپتەسى سانايتىنىن ايتتى.

سونىمەن قاتار قاسىم-جومارت توقاەۆ گي پارمەلانعا قازاقستاندا جۇرگىزىلىپ جاتقان اۋقىمدى ساياسي جانە ەكونوميكالىق رەفورمالار جونىندە ايتتى. ەكى ەل باسشىلارى اۋىل شارۋاشىلىعى، كولىك جانە لوگيستيكا، ماشينا جاساۋ، فارماتسەۆتيكالىق ونەركاسىپ جانە «جاسىل» جوبالار سالارىنداعى بىرلەسكەن جۇمىستار ءۇشىن زور الەۋەت بار ەكەنىن ايتتى.

كەلىسسوز قورىتىندىسى بويىنشا مەملەكەتتەر باسشىلارىنىڭ قاتىسۋىمەن بىرقاتار ۇكىمەتارالىق جانە كوممەرتسيالىق كەلىسىمگە قول قويىلدى.

1. قازاقستان رەسپۋبليكاسىنىڭ ۇكىمەتى مەن شۆەيتساريا كونفەدەراتسياسى فەدەرالدىق كەڭەسى اراسىنداعى باعالى مەتالداردان جاسالعان بۇيىمدارداعى سىنامالىق تاڭبانى ءوزارا مويىنداۋ جونىندەگى كەلىسىم;

2. 1994 جىلعى 12 مامىردا الماتى قالاسىندا قازاقستان رەسپۋبليكاسىنىڭ ۇكىمەتى مەن شۆەيتساريا فەدەرالدىق كەڭەسى اراسىندا قول قويىلعان ساۋدا-ەكونوميكالىق ىنتىماقتاستىق جونىندەگى كەلىسىم حاتتاماسى (ساۋدا قىزمەتتەرىن ىشكى رەتتەۋ قاعيدالارى);

3. «قازاقستان تەمىر جولى» ۇك» اق مەن «Stadler CIS AG» كومپانياسى اراسىنداعى ستراتەگيالىق ىنتىماقتاستىق جونىندەگى كەلىسىم.