پىكىرتالاستارعا قر اقپارات جانە قوعامدىق دامۋ مينيسترلىگى ءدىن ىستەرى كوميتەتى توراعاسىنىڭ ورىنباسارى باۋىرجان باكىروۆ, كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىنىڭ باسقارما توراعاسى بولات سارسەنباەۆ, قر پارلامەنتى سەناتى جانىنداعى سەناتورلار كەڭەسىنىڭ مۇشەسى, «مادەنيەت ارقىلى الەم» حالىقارالىق قاۋىمداستىعىنىڭ پرەزيدەنتى تولەگەن مۇحامەدجانوۆ, گفر سىرتقى ىستەر مينيسترلىگىنىڭ ءدىن ىستەرى جونىندەگى حالىقارالىق ساياسات ءبولىمىنىڭ باسشىسى ەببا شول, «عىلىم جانە ساياسات قورى» نەمىس تالداۋ ورتالىعىنىڭ اعا عىلىمي قىزمەتكەرى سابينا ريدەل, سونداي-اق ساراپشىلار, جۋرناليستەر, قر جانە گفر ۇكىمەتتىك ەمەس قۇرىلىمدارىنىڭ وكىلدەرى, قوعام قايراتكەرلەرى قاتىستى. ءوز سوزىندە قازاقستاننىڭ گەرمانياداعى ەلشىسى داۋرەن ءشارىپوۆ قازاقستانداعى ەتنوسارالىق جانە كونفەسسياارالىق تولەرانتتىلىق داستۇرلەرى تۋرالى ايتىپ, ازاماتتاردىڭ ءدىني بوستاندىقتارىن ساقتاۋدى قامتاماسىز ەتۋ بويىنشا مەملەكەتتىڭ تۇراقتى جۇمىسىنىڭ نەگىزگى باعىتتارىن ءتۇسىندىردى.
«ەلىمىزدەگى بارلىق سالادا جۇرگىزىلگەن جانە جۇرگىزىلىپ جاتقان رەفورمالار قوعامدى تۇبەگەيلى وزگەرتتى. ءبىز ءوز تاۋەلسىزدىگىمىزدىڭ 30 جىلدىعىن قۋاتتى مەملەكەت جانە ءبىرتۇتاس حالىق رەتىندە اتاپ وتۋدەمىز. وسى ۋاقىت ىشىندە ءبىزدىڭ رەسپۋبليكامىز ساياسي جانە الەۋمەتتىك-ەكونوميكالىق دامۋدى باستان وتكەردى. سونداي-اق ءوزىنىڭ باي رۋحاني-مادەني مۇراسىن جانداندىرۋدا ەلەۋلى تابىستارعا قول جەتكىزدى», دەدى ديپلومات.
ءوز كەزەگىندە, ن. نازارباەۆ ورتالىعىنىڭ باسقارما توراعاسى بولات سارسەنباەۆ 2003 جىلدان بەرى وتكىزىلىپ كەلە جاتقان ماڭىزدى جانە بەدەلدى الاڭ – الەمدىك جانە ءداستۇرلى دىندەر كوشباسشىلارىنىڭ سەزىن, ونىڭ ىشىندە نەمىس ءدىني قاۋىمدارى وكىلدەرىنىڭ قاتىسۋىمەن وتكىزگەن قازاقستان مەن الەم بويىنشا كونفەسسياارالىق ديالوگتى نىعايتۋداعى ەلباسى ن.نازارباەۆتىڭ ءرولىن ەرەكشە اتاپ ءوتتى.
«قازاقستان رۋحاني ديپلوماتيا قاعيداتتارىن جاڭعىرتۋ مەن دامىتۋعا باعىت الىپ, حالىقارالىق ارەنادا ءوز ۇستانىمىن نىق بەكىتتى. ونىڭ جارقىن دالەلى قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن. نازارباەۆتىڭ جاھاندىق باستامالارى بولدى. ونداي اۋقىمدى جوبالار ەلدىڭ تانىمالدىعىن ارتتىرىپ قانا قويماي, الەمدىك قوعامداستىقتىڭ جاڭا مۇشەسى رەتىندە قازاقستانعا دەگەن سەنىمنىڭ ىرگەتاسىن قالادى. سونىمەن قاتار وڭىرلىك جانە جاھاندىق تۇراقتىلىقتى نىعايتۋعا, الەمدە كونفەسسياارالىق جانە دىنارالىق ديالوگتى ىلگەرىلەتۋگە ەلەۋلى ۇلەس قوستى», دەدى ورتالىقتىڭ باسقارما توراعاسى.
ەلىمىزدىڭ ءدىني سەنىم بوستاندىعىن قامتاماسىز ەتۋگە باعىتتالعان مەملەكەتتىك ساياساتىنىڭ ارقاسىندا قازاقستان بۇگىندە 18 كونفەسسيا مەن 100-دەن استام ەتنوس اتىنان وكىلدىك ەتەتىن 3800-دەن استام ءدىني بىرلەستىك ءۇشىن قاۋىپسىز ءارى جايلى ءۇي بولىپ تابىلاتىنىن اتاپ وتكەن ءجون.
ءىس-شارانىڭ جالعاسى رەتىندە شاقىرىلعان ساراپشىلار ۇلتتىق بىرەگەيلىك, دىنارالىق جانە مادەنيەتارالىق قاتىناستار سياقتى تاقىرىپتار بويىنشا پىكىر الماستى, سونداي-اق گەرمانياداعى مەملەكەتتىك-شىركەۋ قاتىناستارىنىڭ تاريحىن قازىرگى قازاقستاندىق قوعامداعى جانە باسقا ەلدەردەگى دامۋ مودەلدەرىمەن سالىستىردى.
اتاپ ايتقاندا, پروفەسسور س.ريدەل مەن شىعىس ەۋروپالىق جانە حالىقارالىق زەرتتەۋلەر نەمىس ورتالىعىنىڭ عىلىمي قىزمەتكەرى ب. ەشمەنت قازاقستاننىڭ ءتۇرلى ەتنودىني توپتارى اراسىندا بەرىك جالپى قازاقستاندىق بىرەگەيلىكتى قالىپتاستىرۋ ءۇشىن مەملەكەتتىڭ زايىرلى سيپاتىنا, ءدىني ۇيىمداردىڭ قارجىلىق تاۋەلسىزدىگىنە, ءوزارا قۇرمەتكە, پليۋراليزمگە جانە توزىمدىلىككە نەگىزدەلگەن كونفەسسياارالىق جانە ەتنوسارالىق ديالوگتىڭ ماڭىزدىلىعىنا قاتىستى ورتاق پىكىرگە كەلدى.
«دىنگە بايلانىستى ماسەلەلەر اركىمنىڭ جەكە ءىسى رەتىندە قارالعانىمەن, ءتۇرلى ەتنوستاردىڭ وكىلدەرى وزدەرىن قازاقستاندىقتار رەتىندە سەزىنۋدە», دەپ ب.ەشمەنت ءوزىنىڭ تاياۋداعى زەرتتەۋىنىڭ ناتيجەلەرىن قورىتىندىلادى.
ەستەرىڭىزگە سالا كەتەيىك, دوڭگەلەك ۇستەل قازاقستان باسشىلىعىنىڭ الەمدىك جانە ءداستۇرلى دىندەر ليدەرلەرى سەزىنىڭ ماقساتتارىن ىلگەرىلەتۋ جونىندەگى باستامالارىن قولداۋ تۇرعىسىندا ۇيىمداستىرىلدى. 2022 جىلعى 14-15 قىركۇيەكتە نۇر-سۇلتان قالاسىندا «پاندەميادان كەيىنگى كەزەڭدە ادامزاتتىڭ الەۋمەتتىك-رۋحاني دامۋىنداعى الەمدىك جانە ءداستۇرلى كونفەسسيالار كوشباسشىلارىنىڭ ءرولى» تاقىرىبىنداعى سەزدىڭ الداعى VII وتىرىسى وتەدى.
