بۇل باستاما «سامۇرىق-قازىنا» اق 2022-2031 جىلدارعا ارنالعان دامۋ ستراتەگياسىندا ايقىندالدى. قۇجات تۇڭعىش پرەزيدەنت – ەلباسى نۇرسۇلتان نازارباەۆتىڭ توراعالىعىمەن وتكەن قوردى باسقارۋ كەڭەسىنىڭ وتىرىسىندا بەكىتىلدى.
«سامۇرىق-قازىنا» اق ستراتەگيا, تۇراقتى دامۋ جانە تسيفرلىق ترانسفورماتسيا جونىندەگى باسقارۋشى ديرەكتورى ەرلان دۇرماعامبەتوۆ اتاپ وتكەنىندەي, قور عىلىمي قوعامداستىقپەن ىنتىماقتاستىقتى نىعايتىپ, كومپانيالاردىڭ تەحنولوگيالىق جاڭارتىلۋىن جانە يننوۆاتسيالاردىڭ ەنگىزىلۋىن قامتاماسىز ەتەتىن ءتيىمدى ءارى تۇراقتى مەحانيزمدى ىسكە اسىرماق. ول ءۇشىن «سامۇرىق-قازىنادا» عىلىمي-تەحنيكالىق باستامالار ورتالىعى قۇرىلىپ, عىلىمي-تەحنيكالىق كەڭەس جۇمىس ىستەيدى.
قازىرگى تاڭدا قور پورتفەلىندە 483 عىلىمي جوبا جۇزەگە اسىرىلىپ جاتىر. تاعى 212-ءسى ىسكە قوسىلۋعا دايىندىق ۇستىندە.
2022 جىلى «سامۇرىق-قازىنا» توبى پورتفەلدىك كومپانيالارىنىڭ ەنشىلەس كاسىپورىندارىندا كەمىندە 10 جاڭا جوبانى سىناقتان وتكىزۋ جوسپارلانىپ وتىر. ولاردىڭ سانى جىل سايىن ۇلعايىپ وتىرادى: 2023 جىلى – 20 جوبا, 2024 جىلى – 30 جوبا, 2025 جىلى – 40 جانە 2026 جىلدان باستاپ 50 جاڭا جوبادان سىنالماق.
«وندىرىستىك مۇمكىندىكتەرىمىزدى ەسكەرە وتىرىپ, عىلىمي-زەرتتەۋ جوبالارى لابوراتوريادان تىكەلەي زاۋىت-فابريكالارعا سىناقتان وتكىزىلۋگە جىبەرىلەدى. «سامۇرىق-قازىنا» قورى مەن مەملەكەتىمىزدىڭ ۇتاتىنى – وسىنىڭ ارقاسىندا ونىمدىلىك ارتىپ, تابىس كوبەيەدى, جاڭا جۇمىس ورىندارى پايدا بولادى», دەدى ەرلان دۇرماعامبەتوۆ.
بۇدان بولەك, «سامۇرىق-قازىنا» عىلىمي ىزدەنىس پەن تاجىريبەلىك كونسترۋكتورلىق جۇمىستار مەن يننوۆاتسيالار ءۇشىن ساراپشىلاردىڭ كادرلىق رەزەرۆىن قالىپتاستىرۋ شارالارىن قولعا العان. بۇل باعىتتا مىندەتتى باعدارلامالار ازىرلەنىپ جاتىر. قوردىڭ عىلىمي-تەحنيكالىق باستامالار ورتالىعى زياتكەرلىك مەنشىك پورتفەلىن قالىپتاستىرىپ, ءبىلىم مەن رەسۋرستاردى كادەگە جاراتۋ ءۇشىن جاۋاپتى بولادى.
