باسقوسۋدا سۋديالار كورپۋسىنا كادرلاردى ىرىكتەۋ جانە ەۋروپا مەن تمد ەلدەرىنىڭ تاجىريبەسىندە سوت كەڭەستەرىنىڭ قىزمەتىن جەتىلدىرۋدىڭ وزەكتى ماسەلەلەرى تالقىلاندى. مۇنداي ءىس-شارانى ۇيىمداستىرۋ يگى داستۇرگە اينالعانىن ايتقان قازاقستان جوعارى سوت كەڭەسىنىڭ توراعاسى دەنيس شيپپ فورۋمنىڭ ەۋروپا مەن ازيا سوت كەڭەستەرىنىڭ, حالىقارالىق ينستيتۋتتاردىڭ, مەملەكەتتىك ورگانداردىڭ وكىلدەرى, سونداي-اق قۇقىقتانۋ جانە HR مەنەدجمەنت سالاسىنداعى جەتەكشى ساراپشىلار ءۇشىن ماڭىزدى تاقىرىپتار بويىنشا پىكىر الماساتىن ءتيىمدى الاڭ ەكەنىن اتاپ ءوتتى. «2018 جىلى وتكەن دوڭگەلەك ۇستەل كەزىندە ءبىز سۋديالار ىرىكتەۋ جۇيەسىن جانە جوعارى سوت كەڭەسى جۇمىسىن جاڭعىرتۋ ماسەلەلەرىنە توقتالساق, 2019 جىلى سوت جۇيەسىندەگى كادر ساياساتىنىڭ پەرسپەكتيۆالى باعىتتارى تالقىلاندى. جاھاندىق ىندەت جاعدايلارى وتكەن جىلى ۇيىمداستىرىلعان دوڭگەلەك ۇستەلدىڭ تاقىرىبىن انىقتاپ بەردى. سۋديالىققا ۇمىتكەرلەردى ىرىكتەۋ, سۋديالاردىڭ جۇمىسىن باعالاۋ جانە جوعارىلاتۋداعى زاماناۋي تسيفرلى جانە چارت تەحنولوگيالار دا كەڭىنەن ءسوز بولدى», دەدى د.شيپپ.
جوعارى سوت كەڭەسىنىڭ مارتەبەسىنە ارنالعان جيىندا ەۋروپا كەڭەسىنىڭ ۆەنەتسيا كوميسسياسىنىڭ توراعاسى بۋككيكيو دجانني سوت جۇيەسىنىڭ قوعام مۇددەسىن قورعاۋداعى جوعارى سوت كەڭەستەرىنىڭ تيىمدىلىگىنە كەڭىنەن توقتالسا, ەۋروپالىق سوت كەڭەستەرى جەلىسىنىڭ پرەزيدەنتى دوناتتي فيليپپو سوت جۇيەسىنىڭ تۇراقتىلىعى مەن تاۋەلسىزدىگىن قامتاماسىز ەتۋ ماسەلەلەرىن ءسوز ەتتى.
ال قازاقستان جوعارى سوتىنىڭ توراعاسى جاقىپ اسانوۆ كەڭەستىڭ باستى ميسسياسى سۋديالار كورپۋسىن جاساقتاۋ ەكەنىنە توقتالا كەلە: «ەگەر سۋديا كادرلارى بىلىكتى, مىقتى بولماسا, بۇل جۇيەدەگى ەشقانداي رەفورما ناتيجە بەرمەيدى. سەبەبى سۋديا ءوزى شەشىم قابىلداپ, ءوزى ۇكىم شىعارادى. سوندىقتان دا ءبىزدىڭ سالادا كادر بىلىكتىلىگى وتە وزەكتى ماسەلە», دەدى. سۋديالاردى ىرىكتەۋ, ولاردىڭ مانساپتىق جوعارىلاۋىنا قاتىستى بىرقاتار زاڭ قابىلدانعانىن ايتقان ج.اسانوۆ بۇل باعىتتاعى ءۇش نەگىزگى جاڭالىقتى اتاپ ءوتتى. ياعني وسى زاڭداردىڭ ارقاسىندا ەلىمىزدە سۋديالاردى ىرىكتەۋ ءتارتىبى وزگەردى, تاجىريبەلى سۋديالاردىڭ كەتۋىنە توسقاۋىل قويىلىپ, قاتارداعى سۋديالاردىڭ تاۋەلدىلىگى جويىلدى.
ءىس-شارا شەڭبەرىندە سۋديالار كورپۋسىن قالىپتاستىرۋداعى قازاقستان جوعارى سوت كەڭەسىنىڭ ءرولى, قالىپتاسۋ جانە دامۋ پەرسپەكتيۆالارى جان-جاقتى ءسوز بولىپ, حالىقارالىق ساراپشىلار فرانتسيا, بەلگيا, يتاليا جانە يسپانيا ەلدەرى تاجىريبەلەرىن ۇلگى ەتە وتىرىپ, سوت كەڭەستەرىنىڭ زاماناۋي ەۋروپالىق مودەلدەرىن ەگجەي-تەگجەي تالقىلادى. سونىمەن قاتار باسقوسۋدا سۋديالاردىڭ بىلىكتىلىك القالارى, رەسەيدىڭ سۋديالار قاۋىمداستىعى جۇيەسىندەگى سۋديالار كورپۋسىن قۇرۋ تاجىريبەسى قاراستىرىلدى.
