تاعايىنداۋ • 24 قاراشا، 2021

بوزىمباەۆتان ءۇشىنشى ءوڭىر دە ۇلكەن تاباندىلىق كۇتەدى

207 رەت كورسەتىلدى

بۇگىن جەر ءجانناتى جەتىسۋ جەرىنە، الماتى وبلىسىنا جاڭا اكىم تانىستىرىلدى. جالپى قازاقستاندا ەڭ كوپ وبلىس باسقارعان اكىم بەردىبەك ساپارباەۆ ەكەن. ول بەس وبلىستىڭ باسشىسى قىزمەتىن اتقارسا، الماتى وبلىسىن باسقارۋعا بارعان قانات بوزىمباەۆ وسىمەن ءۇشىنشى ءوڭىردىڭ تىزگىنىن قولعا الىپ وتىر.

قانات بوزىمباەۆ قىزمەتتىك مانسابىندا سان ءتۇرلى جولدان وتكەن. ول 2009 جىلدىڭ قاراشاسى مەن 2013 جىلدىڭ جەلتوقسان ايلارى اراسىندا جامبىل وبلىسىنىڭ اكىمى قىزمەتىن اتقارسا، 2013 جىلدىڭ جەلتوقسانىنان 2016 جىلدىڭ ناۋرىزىنا دەيىن پاۆلودار اكىمىنىڭ قىزمەتىن اتقاردى. ودان كەيىن 2016-2019 جىلدار ارالىعىندا قر ەنەرگەتيكا ءمينيسترى بولدى. 2019 جىلدىڭ جەلتوقسانىنان بەرى قر پرەزيدەنتىنىڭ كومەكشىسى رەتىندە قىزمەتتە ىسىلعان بوزىمباەۆقا وبلىس اكىمى بولۋ – تاڭسىق جۇمىس ەمەس...

جامبىل وبلىسىن ۇزاق باسقارعان ءبورىباي جەكسەمبين قىزمەتىنەن كەتكەن كەزدە ورنىن (2009 جىلدىڭ قاراشاسى) قانات بوزىمباەۆ الماستىردى. جاڭا كەلگەن اكىمدى ماقتاعاندار دا، داتتاعاندار دا از بولعان جوق. العاشقىلارى تانىماي جاتىپ تابىناتىندار عوي. «سالماقتى ەكەن، كوپ ءىس تىندىرادى» دەپ ءا دەگەننەن جالاۋلاتا ماقتاي جونەلسە، كەيىنگىلەرى «اشۋى بۇرق-بۇرق، ءسوزى دۇڭك-دۇڭك» ەكەن دەپ جاقتىرماعان كەيىپ تانىتتى. ەندى بىرەۋلەر «قازاق تىلىنە شورقاق» دەگەندى العا تارتىپ جاتتى.

ءبىر كۇنى قانات بوزىمباەۆ وبلىس زيالىلارىمەن كەزدەسەدى. سول باسقوسۋدا بەلگىلى قالامگەرلەردىڭ ءبىرى: ء«سىز وڭتۇستىك وڭىرگە كەلدىڭىز. قازاقىلىقتىڭ قايماعى بۇزىلماعان جاققا ات باسىن بۇرعان سوڭ قازاقشا سويلەۋگە ءتيىسسىز!»، دەيدى. سىنعا سول جەردە لەزدە ءۇن قاتقان جاڭا اكىم ەش ويلانباستان: «مەن سىزدەرمەن التى ايدان كەيىن قازاقشا ايتىساتىن بولامىن»، دەپ جاۋاپ بەرەدى. ۋاقىت وتە كەلە بوزىمباەۆ جينالىستاردى قازاقشا وتكىزىپ، قازاق ءتىلىن ءبىر كىسىدەي مەڭگەرىپ الدى. ءبىر سوزبەن ايتقاندا سوزىندە تۇردى.

قانات بوزىمباەۆ ۇزىن-سونار جينالىستاردان اۋلاق ءجۇردى. بار ماسەلەنى قىسقا-نۇسقا شەشۋگە تىرىستى، سوزگە ەمەس، ىسكە بەيىمدىگىن كورسەتتى. جيىرما جىلداي ۋاقىت ءسوز بولعان، بىراق ەشبىر اكىم كوشىرە الماعان قالانىڭ قاق ورتاسىنداعى ورتالىق بازاردى كوشىردى. ارينە، مۇددەلى توپتىڭ ادامدارى ميتينگ ۇيىمداستىردى، داۋ شىعاردى، ۋلتيماتۋم قويدى. بىراق، ولاردىڭ ءبارىن سابىرعا شاقىرىپ، شاھاردىڭ ورتالىعىندا حاتتالىپ جاتقان تاريحتىڭ ارشىلۋىنا العاش ۇلەس قوستى.

ۇزاق ۋاقىت اڭگىمەسى بىتپەي كەلە جاتقان ورتالىق مەشىت ماڭىنداعى مەدرەسە قۇرىلىسىن اياقتاۋعا ءسوز بەردى. ءسوز بەرىپ وزگەرەتىندەر از ەمەس. بىراق، بوزىمباەۆ سوزىندە تۇرىپ، ايتقانىن ورىندادى. ءبىر جينالىستا «ەلدە ءار جىلدىڭ اتاۋى بولادى. ءبىز وسى جىلدى «وبلىستاعى جول جىلى» دەپ اتايىق»، دەدى بوزىمباەۆ. ءسويتتى دە كونە شاھاردىڭ توز-توزى شىققان تالاي كوشەلەرىنىڭ شۇرىق-تەسىك جولىن قالپىنا كەلتىردى. كەي اكىمدەر سياقتى اۆتوبۋسقا ءمىنىپ سۋرەتكە تۇسكەن جوق، شايتاناربا ايدامادى. ۇندەمەي ءجۇرىپ ۇلكەن ىستەر ءبىتىردى.

زاماناۋي سپورت كەشەنى تارازدا مۇلدە جوق بولاتىن. اكىم مۇنى دا دەر ۋاقىتىندا بايقادى. ءسويتتى دە حالىقارالىق ستاندارتقا ساي كەلەتىن «تاراز ارەنا» سپورت كەشەنىنىڭ بوي كوتەرۋىنە كۇش سالدى. سول كەزدە وبلىستىڭ سپورت سالاسىندا جۇرگەندەر: «تاراز ارەنانىڭ قۇرىلىسى بىتپەي، بوزىمباەۆ كەتىپ قالماسا ەكەن» دەگەنىن تالاي ەسىتتىك. ءبىر سوزبەن ايتساق، بوزىمباەۆتىڭ تۇسىندا كوپتەگەن اۋرۋحانا سالىندى، الەۋمەتتىك نىساندار بوي كوتەردى. ايتەۋىر، ۇيقىعا كەتكەن اۋليەاتا جەرى قايتا ويانعانداي بولدى.

قانات بوزىمباەۆتىڭ تۇسىندا جامبىل سپورتىنىڭ رۋحى كوتەرىلدى. قازاق كۇرەسىنەن «ەۋرازيا بارىسى» ءتۋرنيرىنىڭ دە نەگىزىن بوزىمباەۆ قالادى. ودان بولەك وليمپيادا ويىندارىنان تىس قالعالى تۇرعان ەركىن كۇرەس شەبەرى اقجۇرەك تاڭاتاروۆقا قولداۋ كورسەتىپ، لوندونعا بارۋىنا تىكەلەي ىقپال ەتتى.  

مەدالىمنىڭ جارتىسى -  بوزىمباەۆتىكى

«ماعان قانات الدابەرگەن ۇلى قاتتى كومەكتەستى. مەدالدىڭ جارتىسى سول كىسىنىڭ ەڭبەگى دەسەم، قاتەلەسپەيمىن. اقيقاتىن ايتسام، لەونيد سپيريدونوۆ دوداعا ءبىر اپتا قالعانشا سالماق تاستاپ وتىردى. مەن سالماق قۋىپ جۇرگەندىكتەن كورگەن جوقپىن. بىراق ءبىر كىسىلەر «لوندون وليمپياداسىنا ءبىر اپتا قالعانشا سپيريدونوۆ سالماق قۋدى» دەپ ايتادى. سوندا بىرەۋلەردىڭ ويىندا «اقجۇرەكتى ءبىر كۇنى بولماسا، ءبىر كۇنى لاقتىرىپ جىبەرەمىز» دەگەن وي بولعان عوي.

16 كيلوگرامم سالماق قۋىپ، قان قىسىمىڭ كوتەرىلىپ جۇرگەن كەزدە سەنىمەن بىرگە باسەكەلەسىڭ دە سالماق تاستاپ، قاسىڭداعى ۇستەلدە تاماقتانىپ وتىرعانىن كورەسىڭ. سودان شىداي الماي كەتتىم دە قانات الدابەرگەن ۇلىنا قوڭىراۋ شالىپ، جاعدايدى ايتتىم. ول كىسى شاقىرتىپ، اكىمدىكتە كۇتىپ الدى. قوڭىراۋ شالاتىن جەرلەرگە قوڭىراۋ شالدى. ابىرويى بار ادام عوي.

تۇتقانىڭ ارعى جاعىنداعى ادامدار سۇراعان بولۋى كەرەك. ءتىپتى «ول مەدال بەرمەيدى. قاتارداعى قاپشىق» دەپ تە ايتقان شىعار. قانات الدابەرگەن ۇلى: «اقجۇرەك، قانداي مەدال الاسىڭ؟ ايتشى، مەن مىنا كىسىلەرگە ايتامىن قازىر»، دەدى.

«التىن مەدال بەرەمىن»، دەدىم. تۇتقانىڭ ارعى جاعىنداعىلار راحاتتانىپ كۇلدى. ءسويتىپ التىن الام دەگەنىممەن، بۇيىرعانى قولا جۇلدە بولدى. ورتالىق الاڭعا كەشىگىپ كەلدىم. بارمايمىن دەگەنمىن. «ول كىسىگە التىن الام دەپ ۋادە بەرگەم. الدىنا قالاي بارامىن. ۇيات ەمەس پە؟» دەدىم. سوندا اكىمدىكتەگى كىسىلەر كەلىپ: «ولاي دەمە، ول كىسى شاقىرتىپ جاتىر. بەلدەسۋلەرىڭنىڭ ءبارىن ءوزى كوردى. ادىلەتسىزدىك ورىن العانىن بىلەدى. ءجۇر»، دەپ الىپ كەلدى. ورتالىق الاڭدا تۇرعان كەزدە قانات الدابەرگەن ۇلى: «اقجۇرەك، جارايسىڭ! ءسوز بەردىڭ، ۋادەڭدە تۇردىڭ. بولدى. مەن ساعان رازىمىن»، دەپ قولىمدى قىستى».

بۇل – ەركىن كۇرەستەن وليمپيادا ويىندارىنىڭ قولا جۇلدەگەرى اقجۇرەك تاڭاتاروۆتىڭ ءسوزى. راسىندا بوزىمباەۆتىڭ تۇسىندا جامبىلدا كوپ وزگەرىس بولدى. ارينە، جاقسى جاعىنان. الماتى وبلىسىنا اكىم بولىپ تاعايىندالعان بوزىمباەۆ بۇعان دەيىن ەكى ءوڭىردى باسقاردى. تاجىريبەسى جەتكىلىكتى. ەردىڭ جاسى ەلۋدەن ەندى اسقان ول ءالى شاۋ تارتا قويعان جوق قوي. جاڭا يدەيالارىمەن جەتىسۋ جۇرتىن قۋانتا جاتار... 

 

سوڭعى جاڭالىقتار

ءمىنسىز – كىم؟

رۋحانيات • كەشە

سەمەيدەگى سەرپىلىس

ايماقتار • كەشە

ۇقساس جاڭالىقتار