جيىن بارىسىندا جوعارى وقۋ ورىندارىنىڭ ءبىلىم بەرۋ ساپاسى جانە جوعارى وقۋ ورىندارىن ليتسەنزيالاۋ مودەلىن قايتا قاراۋ, ولاردى قارجىلاندىرۋ جانە گرانتتار ءبولۋ, ماماندىقتارعا قويىلاتىن بىلىكتىلىك تالاپتارىن ارتتىرۋ ماسەلەلەرى تالقىلاندى.
اسحات ايماعامبەتوۆ مينيسترلىكتىڭ وڭىرلەردەگى ءبىلىم بەرۋ ساپاسىن قامتاماسىز ەتۋ جونىندەگى كوميتەت باسشىلارىمەن ورتالىقتاندىرىلعان ساپا جۇيەسىنە كوشۋ بويىنشا جۇرگىزگەن جۇمىستارىن اتاپ ءوتىپ, اتالعان قۇرىلىمداردىڭ قىزمەتىندەگى وزگەرىستەر تۋرالى باياندادى. ءمينيستردىڭ ايتۋىنشا, ولاردىڭ جۇمىسىن نەعۇرلىم جۇيەلى ەتۋ, پروبلەمالار مەن ولاردى شەشۋ جولدارىن ناقتى انىقتاۋ, جوعارى وقۋ ورىندارى مەن كوللەدجدەردىڭ قىزمەتىن باقىلاۋ جونىندەگى شارالاردى كۇشەيتۋ, ليتسەنزيالار بەرۋ تالاپتارىن قاتاڭداتۋ قاجەت. اككرەديتتەۋ اگەنتتىكتەرىنە قاتىستى ساپانى قامتاماسىز ەتۋ جۇيەسىنىڭ ۇلتتىق ستاندارتىن ەنگىزۋ جانە رەيتينگتى باعالاۋ ءادىسناماسىن قايتا قاراۋ جوسپارلانۋدا. باسەكەگە قابىلەتتى جوعارى وقۋ ورىندارىنىڭ ليگاسى قۇرىلادى. ليگا مۇشەلەرىنە قويىلاتىن نەگىزگى كورسەتكىشتەر مەن تالاپتار قازاقستان رەسپۋبليكاسىنىڭ ءبىلىم جانە عىلىم مينيسترلىگى جوعارى وقۋ ورىندارىنىڭ رەكتورلارىمەن بىرلەسىپ ازىرلەيدى.
گۇلزات كوبەنوۆا جوعارى ءبىلىم بەرۋ ساپاسى مەن مينيسترلىك قابىلداعان شارالار, جوعارى وقۋ ورىندارىنىڭ جاۋاپكەرشىلىگىن ارتتىرۋ, ليتسەنزيالاۋ مودەلىن قايتا قاراۋ قاجەتتىلىگى, ءبىلىم بەرۋ باعدارلامالارىن ازىرلەۋ جانە ولاردىڭ ەڭبەك نارىعىنىڭ تالاپتارىنا سايكەستىگى, وسكەلەڭ ۇرپاقتىڭ ادامي كاپيتالى مەن زياتكەرلىك قابىلەتىن ارتتىرۋ, ديسسەرتاتسيالىق كەڭەس قۇرۋ, عىلىمي جۋرنالدار مەن دوكتورانتتاردىڭ عىلىمي جۇمىسىنا جانە ولاردىڭ عىلىمي دارەجەلەر الۋىنا قويىلاتىن تالاپتاردى كۇشەيتۋ ماسەلەلەرىن اتاپ ءوتتى.
اباي اتىنداعى قازۇپۋ رەكتورى دارحان ءبىلالوۆ ەلىمىزدىڭ جوعارى ءبىلىم بەرۋ جۇيەسىن جاقسارتۋ جولىنداعى اۋقىمدى جۇمىستى اتاپ ءوتتى. ونىڭ پىكىرىنشە, ليتسەنزيالاۋدى كۇشەيتۋ – وتە ماڭىزدى قادام. بۇل ەكونوميكانىڭ بارلىق سالالارىندا مامانداردى دايارلاۋ ساپاسىنىڭ ارتۋىنا اكەلىپ, جوعارى وقۋ ورىندارىنىڭ باسەكەگە قابىلەتتىلىگىن ارتتىرادى. بۇل تۇرعىدا پايدالى حالىقارالىق تاجىريبە دە بار. ارينە, ەلىمىزدىڭ جەتەكشى پەداگوگيكالىق جوعارى وقۋ ورنى ليگا قۇرامىنا كىرۋگە ۇمتىلاتىن بولادى.
كەزدەسۋ سوڭىندا رەكتورلار جوعارى وقۋ ورىندارىن ليتسەنزيالاۋ جانە اككرەديتتەۋ, ۋنيۆەرسيتەتتەر مەن اككرەديتتەۋ ورگاندارىن رانجيرلەۋ, شەتەلدىك جوعارى وقۋ ورىندارى مەن ساراپشىلاردى تارتۋ, ستۋدەنتتەردىڭ كاسىبي دايىندىق ۇدەرىستەرىن باقىلاۋ بويىنشا جۇمىس توبىن قۇرۋ جونىندە ءوز ۇسىنىستارىن ءبىلدىردى.
