بۇعان دەيىن وماروۆانىڭ سايلانۋىنا ءۇزىلدى-كەسىلدى قارسى بولعان سەناتور پەت تۋمي بۇل جولى دا العان بەتىنەن قايتقان جوق, ول كانديداتتىڭ وتكەن ومىرىنە قاتىستى جاعىمسىز مالىمەتتەر جاريالادى.
ونىڭ ايتۋىنشا, وماروۆانىڭ يدەياسى سوتسياليستىك كوزقاراستى بەينەلەيدى.
«وسىنداي كوزقاراسى بار ادامدى امەريكانىڭ ۇلتتىق جانە باستى رەتتەۋشى بانكىن باسقارۋعا تاعايىنداۋ الاڭداۋعا جانە قورقۋعا تۇرارلىق جاعداي», دەدى ول.
وگايو شتاتىنىڭ دەموكراتى شەررود براۋن رەسپۋبليكاشىلارعا وماروۆانىڭ كسرو-دا وسكەنىن ايتىپ, اقپاراتتىق شابۋىل جاساعان.
تىڭداۋ بارىسىندا لۋيزيانا شتاتىنىڭ سەناتورى دجون كەننەدي: ء«سىزدى نە پروفەسسور, نە جولداس دەپ اتارىمدى بىلمەيمىن», دەدى. وسىلايشا ول وماروۆانىڭ كسرو-دا تۋىپ-وسكەنىن, كومسومول قاتارىندا بولعانىن مەڭزەدى.
«مەن كەڭەس وداعىندا تۋىپ-ءوستىم. وندا بارلىق ادام وسى ۇيىمنىڭ مۇشەسى بولدى. بۇل مەكتەپتەگى قالىپتى جاعداي», دەپ قىسقا جاۋاپ بەردى ساۋلە وماروۆا.
سونىمەن قاتار كەننەدي وماروۆانىڭ اتالعان ۇيىمنان رەسمي تۇردە شىققانىنا قىزىعۋشىلىق تانىتىپ, وماروۆانى كانديداتۋرادان جازباشا تۇردە باس تارتۋىن تالاپ ەتە باستاعاندا, شەررود براۋن: «ول كەڭەس ازاماتتىعىنان باس تارتتى», ˗ دەدى.
«مەن كوممۋنيست ەمەسپىن. بۇ يدەولوگيانى قولدامايمىن. مەن ەشقاشان ءوزىمدى وسىنداي توپقا جاتقىزعان ەمەسپىن جانە ماركسيستىك نەمەسە كوممۋنيستىك پىكىرتالاستارعا قاتىسقان جوقپىن», دەپ جاۋاپ بەردى. ءسوزىنىڭ سوڭىندا: «مەن بۇل ەلگە كەلدىم. امەريكالىق بولعانىمدى ماقتان ەتەمىن», دەدى قازاقستان تۋماسى.
ەسكە سالايىق, كەشە امەريكالىق باق-تار ساۋلە وماروۆانىڭ 1995 جىلى ۆيسكونسين شتاتىندا ۇرلىق جاساعانىن جارىسا جازعان بولاتىن. ول كەزدە 28 جاستا بولعان ايەل 214 دوللار تۇراتىن تاۋاردى قولدى قىلعان. ونىڭ ىشىندە ءتورت جۇپ اياق كيىم, ەكى بوتەلكە ءاتىر سۋ, ەكى بەلبەۋ جانە ش ۇلىق بار.
