تارازدا سەكۋندىنا 38 مەترگە دەيىن سوققان قاتتى جەل قالا ينفراقۇرىلىمىنا ايتارلىقتاي زيان كەلتىردى.
19 كوپقاباتتى ءۇيدىڭ, 17 مەكتەپتىڭ, 4 بالاباقشانىڭ شاتىرى ب ۇلىنگەن. ەلەكتر جەلىلەرىنىڭ زاقىمدالۋىنا بايلانىستى جىلۋ جەتكىزەتىن بەس شاعىن قازاندىق توقتاتىلدى. 45 اعاش, 12 ايالداما جانە 32 باعدارشام قۇلادى. 34 بيلبورد, 9 جارنامالىق پيلون جانە 64 جالاۋ زاقىمدالعان.
تاراز قالاسى اكىمدىگىنىڭ مەديا ورتالىعى ءمالىم ەتكەندەي, بۇگىنگى كۇننىڭ ناتيجەسى بويىنشا توقتاتىلعان بەس قازاندىقتىڭ تورتەۋى قوسىلىپ, 52 كوپقاباتتى تۇرعىن ءۇيدىڭ تۇرعىندارىنا جىلۋ تاراتىلدى. ەلەكتر ەنەرگياسىنىڭ جوقتىعىنان «بينوم» تك №7 ءۇيىن جىلىتاتىن ءبىر قازاندىق ءالى قوسىلماعان. گازبەن جابدىقتاۋعا 187 ابونەنت قوسىلدى, 39-ىن (جەكە تۇرعىن ۇيلەر) اياقتاۋ قالدى. 32 باعدارشامنىڭ 18-ءى قايتا ورناتىلدى. جەل سوققان بارلىق 12 ايالداما قالپىنا كەلتىرىلدى. 45 ءىرى قۇلاعان اعاشتاردىڭ 35-ءى الىنىپ تاستالدى. مەكتەپ وقۋشىلارىن وقىتۋعا كەلەتىن بولساق, بۇگىنگى كۇنى تاراز قالاسىنىڭ اۋماعىندا 19 مەكتەپ وفلاين رەجيمىندە, 41 مەكتەپ ونلاين رەجيمىندە وقيدى. 45 بالاباقشانىڭ 41-ءى بۇرىنعى رەجيمدە جۇمىس ىستەيدى, ءتورت بالاباقشادا جەلمەن زاقىمدالعان شاتىرلاردى قالپىنا كەلتىرۋ قاجەت.
«كەلتىرىلگەن زالال بويىنشا ەسەپ ايىرىسۋ جۇرگىزىلۋدە. بارلىق كوممۋنالدىق كاسىپورىندار مەن مەكەمەلەر كۇشەيتىلگەن رەجيمدە جۇمىس ىستەۋدە. قالپىنا كەلتىرۋ جۇمىستارى جالعاسۋدا», دەدى تاراز قالاسىنىڭ اكىمدىگى.
ەسكە سالا كەتسەك, 16 قاراشادا جامبىل وبلىسىنىڭ اۋماعىندا جەلدىڭ سەكۋندىنا 30 مەترگە دەيىن كۇشەيۋى تۋرالى حابارلاندى. جامبىل وبلىسىنىڭ پوليتسيا دەپارتامەنتى كولىك جۇرگىزۋ قاۋىپتى بولعاندىقتان, جۇرگىزۋشىلەردى مۇمكىندىگىنشە ۇيدە بولۋعا شاقىردى.
