ەكى كۇنگە جالعاساتىن ءىس-شارا گيبريدتى فورماتتا وتۋدە.
كونراد ادەناۋەر اتىنداعى قوردىڭ قازاقستانداعى وكىلدىگىنىڭ ديرەكتورى يوحاننەس راي, نۇر-سۇلتانداعى ەقىۇ باعدارلامالار ءوفيسىنىڭ باسشىسى د-ر فولكەر فروبارت, MediaNet حالىقارالىق جۋرناليستيكا ورتالىعىنىڭ ديرەكتورى ءادىل جاليلوۆ العى ءسوز ايتتى.
فورۋم بارىسىندا ونلاين-رەسۋرستاردى بۇعاتتاۋ جانە ءسوز بوستاندىعى, بالالاردى كيبەربۋللينگتەن قورعاۋ تۋرالى زاڭنامالىق باستاما, مەملەكەتتىڭ ءرولى جانە جاھاندىق جەلىنى رەتتەۋدىڭ حالىقارالىق پراكتيكاسى, ءوزىن-ءوزى رەتتەۋ مۇمكىندىكتەرى, ينتەرنەتتى رەتتەۋ بويىنشا ورتالىق ازيا ەلدەرىنىڭ ۇلتتىق زاڭنامالىق پراكتيكاسى ماسەلەلەرى تالقىلانادى.
ءىس-شاراعا حالىقارالىق جانە ورتالىقازيالىق ساراپشىلار, مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى, جۋرناليستەر, بلوگەرلەر, زاڭگەرلەر, ينتەرنەت-بەلسەندىلەر قاتىسادى.
بۇگىن اقپارات جانە قوعامدىق دامۋ ۆيتسە-ءمينيسترى كەمەلبەك ويشىباەۆ «ينتەرنەتتى رەتتەۋ: قازاقستان جانە حالىقارالىق پراكتيكا» پانەلدىك پىكىرتالاسىنا قاتىستى. ول قازاقستانداعى ينتەرنەت جەلىسىن رەتتەۋدىڭ قازىرگى جاعدايى مەن پەرسپەكتيۆالارى تۋرالى باياندادى.
سونداي-اق, پانەلدىك پىكىرتالاستا ەقىۇ-نىڭ باق بوستاندىعى ماسەلەلەرى جونىندەگى وكىلى بيۋروسىنىڭ اعا كەڭەسشىسى اندرەي ريحتەر (اۆستريا), «Digital Paradigm» قق ديرەكتورى, قۇقىق قورعاۋشى, قۇقىق قورعاۋشىلاردىڭ جاڭا بۋىنى كواليتسياسىنىڭ مۇشەسى, تسيفرلىق قۇقىقتار جونىندەگى ساراپشىلار توبىنىڭ قاتىسۋشى ەلجان قابىشەۆ (قازاقستان), Human Constanta-نىڭ نەگىزىن قالاۋشىلاردىڭ ءبىرى الەكسەي كوزليۋك (بەلارۋس), «ينتەرنەتتى قورعاۋ قوعامىنىڭ» باسشىسى ميحايل كليمارەۆ (رەسەي) ءسوز سويلەدى.
فورۋمنىڭ ەكىنشى كۇنى ادام قۇقىقتارى مەن بوستاندىقتارى سالاسىنداعى ونلاين-جوبالاردىڭ تۇساۋكەسەرلەرى مەن شەبەرلىك ساباقتارىنا ارنالادى.
