«سۋعا قول جەتكىزۋ پروبلەماسى ەلىمىزدىڭ 700 مىڭنان استام ازاماتى ءۇشىن وزەكتى. ءبىز مۇندا جۇيەلىك ماسەلەلەردى كورەمىز. اتاپ ايتقاندا, سۋمەن جابدىقتاۋ جۇيەلەرىنىڭ توزۋى شامامەن 50%-دى قۇرايدى», دەدى اشىمباەۆ.
ونىڭ ايتۋىنشا, بارلىق ەلدى مەكەندەردى سۋمەن قامتاماسىز ەتۋ بويىنشا 2020 جىلعا قويىلعان ماقساتقا بىرقاتار سەبەپتەر بويىنشا قول جەتكىزىلگەن جوق. ولاردىڭ ءبىرى - بۇل ماسەلەدە جوعارى ورتالىقسىزداندىرۋ. ءارتۇرلى بيۋدجەتتىك باعدارلامالار سۋمەن قامتاماسىز ەتۋ ماسەلەلەرىن قامتيدى.
«قازىر «قۋاتتى وڭىرلەر – ەل دامۋىنىڭ درايۆەرى» بىرىڭعاي جوباسى قابىلداندى. ۇلتتىق جوبا شەڭبەرىندە جەلىلەردى دامىتۋ, تازا اۋىز سۋعا قول جەتكىزۋدى قامتاماسىز ەتۋ جانە تاعى باسقا ماسەلەلەر شەشىلەدى. بۇل جۇمىستى ناقتى ۇيلەستىرۋ وتە ماڭىزدى. ءبىز مەملەكەت باسشىسىنىڭ ەلىمىزدەگى بارلىق ەلدى مەكەندەردە سۋعا 100% قول جەتكىزۋدى قامتاماسىز ەتۋ جونىندەگى تاپسىرماسىن ۋاقىتىندا ورىنداۋىمىز قاجەت», دەپ ءتۇسىندىردى پالاتا سپيكەرى.
ول ەكىباستۇزدا مونوقالالاردى دامىتۋ جونىندەگى كەڭەستە پرەزيدەنت سۋ تۇتىنۋ تاسىلدەرىن وزگەرتۋ, سۋ تۇتىنۋ مونيتورينگى جۇيەسىن, جاڭا تەحنولوگيالاردى ەنگىزۋ ماسەلەسىن كوتەرگەنىن ەسكە سالدى.
«ەگەر ءبىزدىڭ زاڭدارىمىزعا سۋ تۇتىنۋ جانە سۋمەن قامتاماسىز ەتۋ سالاسىنداعى كوزقاراستاردى وزگەرتۋ بويىنشا قانداي دا ءبىر وزگەرىستەر مەن تولىقتىرۋلار جەدەل ەنگىزۋ قاجەت بولسا, دەپۋتاتتار بۇل جۇمىستى تەز جۇرگىزۋگە جانە ۇكىمەتتىڭ باستامالارىن قاراۋعا مۇددەلى. ءبىز بۇل باعىتتا بەلسەندى جۇمىس ىستەۋگە دايىنبىز», دەدى سەنات باسشىسى.
