قۇجاتقا دۇنيەجۇزى قازاقتارىنىڭ قاۋىمداستىعى تاراپىنان توراعانىڭ ورىنباسارى ادىلبەك ىبىرايىم ۇلى, ال حالىقارالىق كوشى-قون ۇيىمى تاراپىنان قازاقستان, قىرعىزستان, تۇرىكمەنستان جانە وزبەكستانداعى حالىقارالىق كوشى-قون ۇيىمى ميسسياسىنىڭ باسشىسى زەينال گادجيەۆ قول قويدى.
رەسمي شاراعا قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ا.سارباسوۆ, اقپارات جانە قوعامدىق دامۋ مينيسترلىگى ەتنوسارالىق قاتىناستاردى دامىتۋ كوميتەتى توراعاسىنىڭ ورىنباسارى ە.ۇيسىمباەۆ, «وتانداستار قورى» كوممەرتسيالىق ەمەس اكتسيونەرلىك قوعامىنىڭ ۆيتسە-پرەزيدەنتى م.سارباسوۆ, قازاقستانداعى حالىقارالىق كوشى-قون ۇيىمى كەڭسەسىنىڭ باسشىسى مىندەتىن اتقارۋشى ە.حون, سونداي-اق باسقا دا مەملەكەتتىك ورگانداردان وزگە دە رەسمي ادامدار قاتىستى.
رەسمي شارادا ادىلبەك ىبىرايىم ۇلى ەلباسى – تۇڭعىش پرەزيدەنتىمىز ن.ءا.نازارباەۆ باسقاراتىن «دۇنيەجۇزى قازاقتارىنىڭ قاۋىمداستىعى» رەسپۋبليكالىق قوعامدىق بىرلەستىگىنە كەلەر جىلى 30 جىل تولاتىنىن, قازىرگى تاڭعا دەيىن تاريحي وتانىنا ورالعان قانداستارىمىزدىڭ جالپى سانى 1 ميلليوننان اسقانىن, كوشى-قون ماسەلەسى قاي ەلدە دە ماڭىزدى, قازاقستان ءۇشىن ونىڭ ورنى ەرەكشە ەكەنىن ايتا كەلىپ, «بىرىككەن ۇلتتار ۇيىمى جۇيەسىنىڭ ءبىر بولىگى بولىپ تابىلاتىن حالىقارالىق كوشى-قون ۇيىمىمەن (حكۇ) بىرلەسە جۇمىس ىستەۋگە نيەت ءبىلدىرىپ, مەموراندۋمعا قول قويىپ جاتۋىمىز – ءىسىمىزدى ودان ءارى جانداندىرا تۇسەتىنى انىق» دەدى.
جالپى, كوشى-قون ەكونوميكا مەن ساۋدا-ساتتىققا, مادەنيەت پەن ديپلوماتيالىق قارىم-قاتىناسقا ىقپال ەتەدى. سوندىقتان ۇكىمەت كوشى-قون جايىن ۇلتتىق جوسپارلارعا ەنگىزىپ, ونىڭ قالىپتىلىعىن ۇنەمى قاداعالاپ وتىرادى. الايدا سالانىڭ كۇردەلىلىگىن ەسكەرسەك, كوپتەگەن كوزگە كورىنبەيتىن ەلەۋسىز جايت حالىقتى كوشىرۋ مەن قونىستاندىرۋ شاراسىنا كەدەرگىسىن تيگىزەتىنى بەلگىلى. وسى باعىتتا الەمدىك دەڭگەيدە قىزمەت اتقارىپ وتىرعان ۇيىممەن ىنتىماقتاسا ءىستى جۇرگىزۋ ايتۋلى ناتيجەسىن بەرەتىنى ءسوزسىز. رەتكە كەلتىرىلگەن كوشى-قون ءادىس-امالى كوشىپ-قونۋشىلار مەن قوعامعا پايداسىن اكەلمەك. حكۇ كوشى-قوننىڭ جەدەل مىندەتتەرىن شەشۋگە كومەك كورسەتىپ, كوشى-قون پروبلەمالارىن ءتۇسىنۋدى تەرەڭدەتە تۇسەتىنىنە سەنىم ءبىلدىرىلدى.
كوشى-قون ساياساتى ماسەلەلەرىن زەرتتەۋ سالاسىنداعى ىنتىماقتاستىقتىڭ ماڭىزدىلىعى زور. ۇلتتىق مۇددەنى كوزدەيتىن اۋقىمدى دا ايتۋلى ىستە ەكىجاقتى ىنتىماقتاستىق پەن تاجىريبە الماسۋ – العا قويىلعان مىندەتتەردى شەشۋدە قارقىن دا, قاجىر دا بەرەدى. «سوندىقتان دۇنيەجۇزى قازاقتارىنىڭ قاۋىمداستىعى مەن حالىقارالىق كوشى-قون ۇيىمىنىڭ بۇگىنگى مامىلەسى – ۋاقىت تالابىنا ساي كەلەدى دەپ ساناۋعا بولادى», دەپ قورىتىندىلادى توراعانىڭ ورىنباسارى. ءوز كەزەگىندە بەدەلدى ۇيىم مەن ميسسيانىڭ باسشىسى زەينال گادجيەۆ تە قازاقستانداعى كوشى-قون جايىنا توقتالىپ, حالىقارالىق ميگرانتتاردىڭ قۇقى مەن جالپى ۇدەرىسكە اناليتيكالىق تالداۋ جاسالاتىنىن جەتكىزدى.
