«وسىدان ءبىر اي بۇرىن التى وڭىردە مۇگەدەكتىكتى انىقتاۋ بويىنشا پرواكتيۆتى سىرتتاي قىزمەت كورسەتۋدىڭ پيلوتتىق جوباسىن ىسكە اسىرۋ باستالدى. ول ءبىزدىڭ وتانداستارىمىزدىڭ اراسىندا سۇرانىسقا يە جانە جاڭا جىلدان باستاپ بۇكىل ەل بويىنشا جاڭا فورماتقا اۋىستىرىلاتىن بولادى. تاعى ءبىر مىسال – پوليتسيانىڭ قىزمەتتىك ءۇي-جايلارى مەن قاج مەكەمەلەرىندە جاپپاي بەينەباقىلاۋ جۇيەسىن ەنگىزۋ», دەپ اتاپ ءوتتى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ VI وتىرىسىندا.
«بۇل جۇمىس 2023 جىلدىڭ سوڭىنا دەيىن جالعاسادى. الايدا, وسى جىلدىڭ سوڭىنا دەيىن بارلىق پوليتسيا بولىمدەرى بەينەباقىلاۋمەن قامتىلادى», دەپ تۇيىندەدى مەملەكەت باسشىسى.
ەسكە سالا كەتسەك, ەلوردادا ۇلتتىق قوعامدىق سەنىم كەڭەسىنىڭ VI وتىرىسى باستالدى. ءىس-شارا بارىسىندا ۇلتتىق كەڭەس شەڭبەرىندە بۇرىن بەرىلگەن پرەزيدەنت تاپسىرمالارىنىڭ ىسكە اسىرىلۋ بارىسى تالقىلانادى, سونداي-اق قوعامدىق, الەۋمەتتىك-ەكونوميكالىق جانە وڭىرلىك دامۋ ماسەلەلەرى بويىنشا جسۇك مۇشەلەرىنىڭ ۇسىنىستارى قارالادى دەپ كۇتىلۋدە. وتىرىس ءتۇرلى وڭىرلەردەن قاتىسۋشىلاردى قوسۋ ارقىلى ونلاين-فورماتتا ءوتىپ جاتىر.
