قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, التىنشى, جەتىنشى شاقىرىلىمداعى پارلامەنت ءماجىلىسىنىڭ دەپۋتاتى, فيلولوگيا عىلىمدارىنىڭ دوكتورى, پروفەسسور ساۋىتبەك ابدراحمانوۆ قاراشا ايىنىڭ باسىندا مەرەيلى 70 جاسقا تولدى.
وسىعان وراي ءوزى ەڭبەك جولىن باستاعان, 16 جىل بىلىكتىلىكپەن باسقارعان «ەگەمەن قازاقستان» گازەتى رەداكتسياسىنىڭ ۇجىمى كورنەكتى مەملەكەت جانە قوعام قايراتكەرىنىڭ جەتپىس جاستىق مەرەيتويىنا ونىڭ جۋرناليستىك شىعارماشىلىعىنىڭ قوماقتى ءبىر سالاسى – سۇحباتتاردان قۇرالعان جاڭا جيناقتى تارتۋ ەتتى.
ءىس شاراعا مەملەكەت جانە قوعام قايراتكەرى مىرزاتاي جولداسبەكوۆ, قازاقستاننىڭ ەڭبەك سىڭىرگەن قايراتكەرى ءادىل احمەتوۆ, مەملەكەتتىك سىيلىقتىڭ لاۋرەاتتارى الىبەك اسقاروۆ پەن نەسىپبەك ايت ۇلى, سونداي-اق بەلگىلى جۋرناليست جانبولات اۋپباەۆ پەن ءماجىلىس دەپۋتاتى مەيرامبەك تولەپبەرگەن باستاعان وزگە دە زيالى قاۋىم وكىلدەرى مەن تىلشىلەر قاتىستى.
«قازاقتىڭ قايراتكەرىنە, الاشتىڭ ارداقتىسىنا, جۋرناليستيكانىڭ جامپوزىنا اينالعان ساۋىتبەك ابدراحمانوۆتىڭ جەتپىستىڭ جوتاسىنا شىققان مەرەيتويى ۇزاق جىلدار بويى ءوزى باسقارعان «ەگەمەن قازاقستان» گازەتى ءۇشىن دە ەرەكشە ءسات. سوندىقتان گازەتتە دە بىرنەشە ماقالا جاريالادىق. بۇدان بولەك «ەگەمەن قازاقستان» سەرياسى بويىنشا «سۇحبات سىرى» اتتى سۇحباتتار جيناعى جارىق كوردى», دەدى Egemen Qazaqstan رەسپۋبليكالىق گازەتى اق باسقارما توراعاسى دارحان قىدىرالى.
ءىس شارا بارىسىندا پروفەسسور مىرزاتاي جولداسبەكوۆ پەن اكادەميك ءادىل احمەتوۆ كىتاپتىڭ تۇساۋكەسەر ءراسىمىن جاسادى.
جيىنعا قاتىسقان قالامگەرلەر ساۋىتبەك ابدراحمانوۆتىڭ ەڭبەك جولى مەن شىعارماشىلىعى جايىندا مازمۇندى اڭگىمە ءوربىتتى. سونىمەن قاتار جاڭا جيناققا ەنگەن سۇحباتتار جايلى ويلارىن ورتاعا سالدى.
