قۇندى جادىگەر باس مۋزەيگە بۇرىنعى پرەزيدەنتتىك مادەنيەت ورتالىعىنان تاپسىرىلعان. شاپاننىڭ ۇزىندىعى – 128 سم, جەڭىنىڭ ۇزىندىعى – 66 سم, ەنى – 30 سم. ول كۇلگىن ءتۇستى بارقىت ماتادان تىگىلگەن, تىك جاعالى بولىپ كەلەدى. شاپاننىڭ الدى مەن ەتەگى جانە جەڭىنىڭ ەكى جاعىنداعى جيەكتەرىنە التىن جانە اق, جاسىل, قىزىل ءتۇستى جىبەك جىپتەرمەن ويۋ جۇرگىزىلگەن. ەتەك جاعى كەڭ تىگىلىپ, ەكى جانىنا 45 سم كولەمدە قيىق سالىنعان. ال تاقيا كۇلگىن ءتۇستى بارقىت ماتادان جاسالعان. تاقيا دا التىن جانە اق, جاسىل, قىزىل ءتۇستى جىبەك جىپتەرمەن ويۋلانعان. توبەسىنە ۇكى تاعىلىپ, ماڭداي تۇسىنا اي ءپىشىندى تۇيرەۋىش قاداپ قويىلعان.
ءماشھۇر ءجۇسىپتىڭ ەسىمى مەن تاقياسىنىڭ توبەسىندەگى ۇكىسىنە قاتىستى ەل ىشىندە ساقتالعان اڭگىمەدە بىلاي دەپ ايتىلادى: ول كىسى اكەسىنىڭ 42 جاسىندا ومىرگە كەلىپ, وعان «ادام ءجۇسىپ» دەگەن ازان شاقىرىپ, ەسىم بەرىلگەن. بىردە اۋىلداعى توي ۇستىندە قيسسا-داستانداردى جاتقا ايتىپ, جۇرتتى ونەرىمەن تاڭعالدىرعان توعىز جاسار بالاعا كوزى تۇسكەن, اۋزى دۋالى بي, شەشەن مۇسا شورمان ۇلى زەردەلى جەتكىنشەككە ىرزا بولىپ, تاقياسىنا ۇكى تاققىزىپ, ء«وز زامانىندا حالقىنا ءماشھۇر بولاتىن بالا ەكەنسىڭ» دەپ باتاسىن بەرىپتى. سودان ء«ماشھۇر ءجۇسىپ» اتانعان دەيدى.
بۇگىندە ءوز زامانىندا حالقىمىزدىڭ باي تاريحى مەن شەجىرەسىن حاتقا ءتۇسىرىپ, كەيىنگى ۇرپاققا قالدىرعان كورنەكتى تۇلعانىڭ مول مۇراسى جيناقتالىپ, بىرنەشە توم بولىپ جارىق كوردى.
