وقيعا • 15 قاراشا، 2021

نۇر-سۇلتاننان ەگيپەتكە ۇشقان ۇشاق اقتاۋعا شۇعىل قوندى

15 رەت كورسەتىلدى

نۇر-سۇلتاننان مىسىرعا بەت العان لاينەر ماس ايەلدىڭ كەسىرىنەن اقتاۋعا قونۋعا ءماجبۇر بولدى، دەپ حابارلايدى Egemen.kz.

نۇر-سۇلتان–شارم-ەل-شەيح» باعىتىنداعى اۋە رەيسى 59 جاستاعى ەلوردالىقتىڭ كەسىرىنەن ورتا جولدا اقتاۋعا قوندى.

«ول الكوگولدىك ىشىمدىكتى مولشەردەن تىس ءىشىپ، ۇشاق ىشىندە ءتارتىپ بۇزدى. سالدارىنان لاينەردى اقتاۋ اۋەجايىنا قوندىرۋعا تۋرا كەلدى. قۇقىق بۇزۋشى ءوزىن اگرەسسيۆتى ۇستادى. بورتسەرىكتەردىڭ ەسكەرتۋلەرىن ەلەمەگەن»، دەيدى كولىكتەگى پوليتسيا دەپارتامەنتى باستىعىنىڭ ءبىرىنشى ورىنباسارى قاليجان قوبلاندين.

ونىڭ ايتۋىنشا، بۇزاقى جولاۋشىنىڭ ءىسىن ءارى قاراي پوليتسيا قارايدى.

«كولىك پوليتسەيلەرى 59 جاستاعى ايەلدىڭ ۇستىنەن اكىمشىلىك قۇقىق بۇزۋ تۋرالى كودەكستىڭ 440-بابىنىڭ 1-بولىگى جانە 566-بابىنىڭ 1-بولىگى بويىنشا اكىمشىلىك حاتتاما تولتىرىلدى.

جىل باسىنان بەرى كولىك پوليتسەيلەرى ءتۇرلى اكىمشىلىك قۇقىق بۇزۋ فاكتىلەرى بويىنشا 40 مىڭنان استام ازاماتتى، ونىڭ ىشىندە ىشىمدىك ىشكەنى جانە قوعامدىق ورىندارعا ماس كۇيىندە كەلگەنى ءۇشىن 3 784 ادامدى اكىمشىلىك جاۋاپكەرشىلىككە تارتتى»، دەپ جازادى كولىكتەگى پوليتسيا دەپارتامەنتىنىڭ ءباسپاسوز قىزمەتى.

سوڭعى جاڭالىقتار

ۇقساس جاڭالىقتار