بيىل بايقاۋدىڭ اۋداندىق كەزەڭىندە 20 وقۋشى «ەدىگە باتىر» جىرىن جاتقا ايتتى. بايقاۋعا قاتىسقان وقۋشىلار 6-11-سىنىپتاردا وقيدى. قازىلار القاسى ءار ۇمىتكەردىڭ مانەرلەپ وقۋ شەبەرلىگىنە ءمان بەرىپ, جىردا كەزدەسەتىن كونەرگەن سوزدەردىڭ ماعىناسىن سۇراپ وتىردى. جىردى جاتقا ايتىپ شىققاننان كەيىن وقۋشىلار قازاق ادەبيەتى ءپانىنىڭ وقۋ باعدارلاماسى نەگىزىندە ازىرلەنگەن سۇراقتارعا جاۋاپ بەردى.
– «ەدىگە باتىر» جىرى تۇركى تىلدەس حالىقتاردىڭ ءبىرازىندا بار. سوندىقتان ءتىلى اۋىر, كونەرگەن سوزدەر ءجيى كەزدەسەدى. مىسالى, جىردا, «...سول قىز بۋاز بولدى», «...اي دەسە اۋزى جوق, كۇن دەسە كوزى جوق» دەگەن سياقتى بۇگىنگى تىلدىك نورماعا جات ءسوز تىركەستەرى ءجيى كەزدەسەدى. وسىنىڭ ءبارى بالالارعا, اسىرەسە, 6-7-سىنىپ وقۋشىلارىنا قيىندىق كەلتىرىپ جاتىر. جالپى, بالالار جاقسى دايىندالىپ كەلگەن, – دەدى قازىلار القاسىنىڭ مۇشەسى, قوستاناي وبلىستىق قازاق دراما تەاترىنىڭ باسشىسى ءالىمحان مىرزاحان.
بايقاۋدىڭ باس جۇلدەسىن رۋدنىي قالاسىنداعى №7 مەكتەپ-گيمنازيانىڭ 10-سىنىپ وقۋشىسى نۇرسيلا ادەبوۆا جەڭىپ الىپ, 600 مىڭ تەڭگە قارجىلاي سىيلىققا يە بولدى. جەڭىمپازدىڭ ۇستازى قىمبات ءبىرمانوۆا وبلىستىق ءبىلىم باسقارماسىنىڭ باسشىسى زاۋرە بايمەنوۆانىڭ قولىنان 500 مىڭ تەڭگە اقشالاي سىيلىق الدى. قارابالىق اۋدانىنان كەلگەن م.سەرالين اتىنداعى مەكتەپتىڭ وقۋشىسى التىناي ومىرزاقوۆا ءبىرىنشى ورىنعا لايىق دەپ تانىلىپ, جارتى ملن تەڭگەنى قانجىعالادى. التىنايدىڭ مۇعالىمى المابيكە ەسكەندىروۆاعا 450 مىڭ تەڭگە ءتيدى. ال ءۇشىنشى ورىن العان ايسارى مەكتەبىنىڭ شاكىرتى شاپاعات قۇرمانعازىقىزى 300 مىڭ تەڭگەگە يە بولدى.
وبلىستىق كەزەڭنىڭ جەڭىمپازى نۇرسيلا ادەبوۆا ەندى رەسپۋبليكالىق بايقاۋدا باق سىنايتىن بولادى.
