ءبىلىم جانە عىلىم ءمينيسترى اسحات ايماعامبەتوۆ دۇنيەجۇزىلىك بانك وكىلدەرىمەن كەزدەستى.
كەزدەسۋدە ادام كاپيتالىنىڭ وڭىرلىك دامۋ ماسەلەلەرى تالقىلاندى. سونداي-اق ءبىلىم بەرۋ جۇيەسىن قولداۋعا باعىتتالعان باعدارلامانى ىسكە اسىرۋ تەتىكتەرى مەن ادىستەمەسى قارالدى. دۇنيەجۇزىلىك بانكتىڭ ءبىلىم بەرۋ سالاسىن قوسا العاندا, مەملەكەتتىك شىعىنداردى شولۋ بويىنشا زەرتتەۋ جۇمىستارى پىسىقتالدى. مينيسترلىك ءبىلىم بەرۋ سالاسىنداعى شىعىنداردى مۇقيات تالداۋ ءۇشىن دۇنيەجۇزىلىك بانكتىڭ ماڭعىستاۋ, اتىراۋ جانە تۇركىستان وڭىرلەرىن ايقىنداۋ تۋرالى ۇسىنىسىن قولدادى. تاراپتار كۇن تارتىبىندە بەلگىلەنگەن بارلىق ماسەلە بويىنشا ورتاق پىكىرگە كەلدى.
اسحات ايماعامبەتوۆ عىلىم سالاسىنداعى نورماتيۆتىك-قۇقىقتىق اكتىلەرگە ەنگىزىلگەن وزگەرىستەر تۋرالى مالىمدەدى.
ءبىلىم جانە عىلىم ءمينيسترى الەۋمەتتىك جەلىدەگى پاراقشاسىندا ۇكىمەت قاۋلىسىمەن ءۇش نەگىزگى نورماتيۆتىك-قۇقىقتىق اكتىگە وزگەرىستەر ەنگىزىلگەنىن ايتتى. ولاردىڭ قاتارىندا ۇلتتىق عىلىمي كەڭەستەر تۋرالى ەرەجە, مەملەكەتتىك عىلىمي-تەحنيكالىق ساراپتامانى ۇيىمداستىرۋ جانە جۇرگىزۋ قاعيدالارى, بازالىق, گرانتتىق, باعدارلامالىق-نىسانالى قارجىلاندىرۋ قاعيدالارى بار. ەندى 12 ايدان استام مەرزىمگە گرانتتىق قارجىلاندىرۋ الاتىن جوبالار بويىنشا ارالىق ەسەپتەر تاپسىرۋدىڭ قاجەتى جوق. سونداي-اق مينيستر كونكۋرستىق راسىمدەردى وتكىزۋ مەرزىمى 145 جۇمىس كۇنىنەن 92-گە دەيىن قىسقارتىلعانىن جەتكىزدى. اسحات ايماعامبەتوۆتىڭ ايتۋىنشا, كونكۋرستىق وتىنىمدەرگە قوسىمشالاردىڭ سانى 12-دەن 5-كە دەيىن ازايتىلعان. سونىمەن قاتار ۇلتتىق عىلىمي كەڭەس مۇشەلەرىنىڭ ادەپ كودەكسى بەكىتىلدى. مينيستر جازباسىندا راسىمدەر مەرزىمىن ازايتۋعا باعىتتالعان تاعى ءبىر وزگەرىس توپتاماسىن ازىرلەنىپ, ەنگىزىلەتىنىن ايتتى.
«بعم LIVE» ايدارىندا مەكتەپ وقۋشىلارىنا ارنالعان وليمپيادالار تۋرالى اقپارات ۇسىنىلدى.
Instagram الەۋمەتتىك جەلىسى ارقىلى وقىرمانداردىڭ سۇراقتارىنا «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشوۆ جاۋاپ بەردى.
