كينوفەستيۆال تۇركى الەمىنىڭ مادەني قۇندىلىقتارىن جۇزەگە اسىراتىن كينو تۋىندىلارىمەن تانىستىرۋ, تۇركى تىلدەس ەلدەر اراسىنداعى ىنتىماقتاستىقتىڭ مادەني جانە كوركەمدىك مۇمكىندىكتەرىن نىعايتۋ, سونداي-اق ورتاق تاريحي, مادەني جانە قوعامدىق قۇندىلىقتاردى كينو ونەرى ارقىلى دامىتۋعا ۇلەس قوسۋ ماقساتىندا وتكىزىلدى.
كينوفەسيۆالعا قاتىسۋشى ەلدەر اراسىندا تۇركى مادەنيەتىن, تاريحىن جانە سالت-ءداستۇرىن بەينەلەيتىن قۇندىلىقتاردى الەمدە ىلگەرىلەتۋدە ماڭىزدى ءرول اتقاراتىن جوبالاردى ىسكە اسىرۋ ءۇشىن «تۇركى الەمىنىڭ فيلمدەر قورىن» قۇرۋعا ۋاعدالاستى.
وسى دەكلاراتسياعا سايكەس تاراپتار تۇركى الەمىنىڭ ونەرى مەن مادەنيەتى سالاسىنداعى ىنتىماقتاستىق ءۇشىن مۇمكىندىكتەردى ارتتىرۋ ماقساتىندا Korkut Ata Turkic World Film Festival كينوفەستيۆالىن ىسكە اسىرۋعا ىقپال ەتەتىن بولادى.
كينەماتوگرافيا سالاسىنداعى بىرلەسكەن دەكلاراتسياعا قر مادەنيەت جانە سپورت ءمينيسترى اقتوتى رايىمقۇلوۆا, ءازىربايجان رەسپۋبليكاسىنىڭ مادەنيەت ءمينيسترى انار كارىموۆ, قىرعىزستان رەسپۋبليكاسىنىڭ مادەنيەت, اقپارات, سپورت جانە جاستار ساياساتى ءمينيسترى ازامات جامانقۇلوۆ, تۇركيانىڭ مادەنيەت جانە تۋريزم ءمينيسترى مەحمەت ەرسوي, وزبەككينو ۇلتتىق اگەنتتىگىنىڭ باس ديرەكتورى فيرداۆس ابدۋحاليكوۆ قول قويدى.
فەستيۆالگە قازاقستان, ءازىربايجان, وزبەكستان, قىرعىزستان, ساحا جانە گاگاۋزيا ەلدەرىنەن 100-دەن استام حالىقارالىق پروديۋسەرلەر, رەجيسسەرلەر مەن اكتەرلەر, سونداي-اق ەلىمىزدەن كسرو حالىق ءارتيسى ءاسانالى ءاشىموۆ, «قازاقفيلم» كينوستۋدياسىنىڭ پرەزيدەنتى اقان ساتاەۆ, كينوستۋديانىڭ ءوندىرىس بويىنشا ۆيتسە-پرەزيدەنتى ايدار باتالوۆ, «ۇلتتىق كينونى قولداۋ مەملەكەتتىك ورتالىعى» كەق باس پروديۋسەرى اداي ءابىلدينوۆ, قازاقستاننىڭ ەڭبەك سىڭىرگەن قايراتكەرى, رەجيسسەر رۇستەم ابدىراشەۆ, قازاقستاننىڭ ەڭبەك سىڭىرگەن قايراتكەرى, اكتەر بەرىك ايتجانوۆ, اكتريسا الميرا تۇرسىن جانە مادينا ەسمانوۆا, رەجيسسەر نۇرعيسا ءالمۇرات, پروديۋسەر نۇرلان قويانباەۆ سىندى تاعى دا باسقا كينو مايتالماندارى قاتىستى.
ايتا كەتەيىك, اتالعان فەستيۆال شەڭبەرىندە اقان ساتاەۆتىڭ «توميريس» ءفيلمى, رۇستەم ابدىراشەۆتىڭ «قازاق حاندىعى. التىن تاق» كوركەم ءفيلمى, ساتىبالدى نارىمبەتوۆتىڭ «امانات» ءفيلمى, رەجيسسەر باقىت قايىربەكوۆتىڭ «قۇتىدا جانعان الاۋ» ءفيلمى, اداي ابەلدينوۆتىڭ «كۇلتەگىن» تاريحي تولىقمەتراجدى انيماتسيالىق ءفيلمى كورسەتىلدى. سونىمەن قاتار كينوفەستيۆال بارىسىندا قازىلار القاسىنىڭ نازارىنا تولىق مەتراجدى 8 فيلم جانە دەرەكتى جانرداعى 9 فيلم ۇسىنىلدى. فەستيۆال اياسىندا كونكۋرستان تىس 25 فيلم كورسەتىلدى.
ءىس-شارا بارىسىندا ءسوز العان اقتوتى رايىمقۇلوۆا تۇركى ەلدەرىنىڭ باسىن قوسىپ, Korkut Ata Turkic World Film Festival كينوفەستيۆالىن ۇيىمداستىرعان تۇركيا رەسپۋبليكاسىنىڭ باسشىلىعىنا جانە مادەنيەت جانە تۋريزم مينيسترىنە, ۇيىمداستىرۋعا اتسالىسقان بارشا ازاماتتارعا قازاق ەلىنىڭ جانە كينو مايتالماندارىنىڭ اتىنان ۇلكەن العىسىن جەتكىزدى.
«قازاق پەن تۇرىك حالىقتارىنىڭ تاريحي تامىرلاستىعى عاسىرلار قويناۋىنان باستاۋ الادى, ءتىلىمىز بەن مادەنيەتىمىز جاقىن, قۇندىلىقتارىمىز بەن دۇنيەتانىمىمىز ورتاق. تاريحتىڭ تەرەڭ قويناۋىنان باستاۋ الىپ بۇگىنگى كۇنگە دەيىن جالعاسىپ كەلە جاتقان ماڭگىلىك باۋىرلاستىق بايلانىستاردىڭ وسىنداي جارقىن ۇلگىسى ءبىزدىڭ ەلدەرىمىزدىڭ اراسىنداعى ىنتىماقتاستىقتىڭ جان-جاقتى دامۋىنا, مادەني بايلانىستاردى ودان ءارى نىعايتۋعا سەرگەك سەرپىن بەرەتىنى كۇمانسىز.
ءبىزدىڭ ەلىمىزدە قازاقستان مەن تۇركيانىڭ كينو ونەرى سالاسىنداعى بايلانىستار ەلباسىمىز ن. نازارباەۆتىڭ قولداۋىمەن 1993 جىلدان بەرى دامىپ كەلە جاتىر. دالىرەك ايتساق, سول جىل تۇرىك رەجيسسەرى م.ءالي ءوزپولاتتىڭ ورداباسىداعى قۇرىلتايعا جانە سول كەزدە ءتۇسىرىلىپ جاتقان «قوجا احمەت ياساۋي» ءفيلمىن «ارمان» كينوستۋدياسىمەن بىرىگىپ شىعارۋعا شاقىرىلعان كەزدە باستالعان بولاتىن. ودان كەيىن دە ەكى ەل اراسىندا مەملەكەت باسشىلارىنىڭ قولداۋىمەن ءار جىلدارى ءتۇرلى حالىقارالىق كينوفەستيۆالدەر مەن كينواپتالىقتارى ۇنەمى وتكىزىلىپ كەلەدى.
ءوتىپ جاتقان «قورقىت اتا» حالىقارالىق كينوفەستيۆالىندە قازاقستان تاراپىنان ۇسىنىلىپ جاتقان كينوتۋىندىلار مەن دەلەگاتسيا وكىلدەرىنىڭ جوعارى دارەجەدە كەلىپ قاتىسۋى پرەزيدەنتىمىز قاسىم-جومارت كەمەل ۇلى توقاەۆ مىرزانىڭ وسى سالا وكىلدەرىنە ۇلكەن قولداۋى دەپ بىلەمىز», دەدى مادەنيەت جانە سپورت ءمينيسترى.
