جارمەڭكەدە قالا تۇرعىندارىنا سيىر ەتى, جىلقى ەتى مەن قوي ەتى, قۇس ەتى, ءسۇت جانە اشىعان ءسۇت ونىمدەرى, كوكونىستەر (كارتوپ, پياز, ءسابىز, قىرىققابات), جەمىستەر, تاۋىق جۇمىرتقاسى, بالىق, جارما, جوعارى سۇرىپتى ۇن جانە وزگە دە قاجەتتى ازىق-ت ۇلىك ونىمدەرى ۇسىنىلادى.
«بۇگىن قاراعاندى, اقمولا, پاۆلودار وبلىستارىنىڭ اۋىل شارۋاشىلىعى ونىمدەرىن وندىرۋشىلەردىڭ, سول سياقتى «اينالىم تەتىگى» اياسىندا نۇر-سۇلتان قالاسىنىڭ ساۋدا نىساندارىنا تاۋار جەتكىزۋشى كاسىپكەرلەردىڭ قاتىسۋىمەن جارمەڭكە ءوتىپ جاتىر. جارمەڭكە سونداي-اق ايماقارالىق كووپەراتسيا اياسىندا وتكىزىلىپ جاتىر. جارمەڭكەگە 150-گە تارتا كاسىپكەر ءوز ونىمدەرىن قويدى. ونىڭ بارىسىندا نارىقتاعى باعادان 10-15 پايىزعا ارزان, جاڭا جەتكىزىلگەن 250 تونناعا جۋىق ءونىم قويىلادى. مۇندا الىپساتارلارعا جول بەرىلمەيدى, تىكەلەي تۇتىنۋشىعا جەتكىزىلەدى», دەدى نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى ءبولىمىنىڭ باسشىسى رۋسلان ىدىرىسوۆ.
جارمەڭكەدەن جىلقى ەتىنىڭ كيلوگرامىن 2200 تەڭگەگە, سيىر ەتىن 2000 تەڭگەگە, قوي ەتىن 2000 تەڭگەگە, قۇس ەتىن 1000 تەڭگەگە, پىسىرىلگەن شۇجىقتى 850-2000 تەڭگەگە, كارتوپتى 140 تەڭگەگە ساتىپ الۋعا بولادى.
ء«بىز قاراعاندى وڭىرىنەن كەلىپ وتىرمىز. باس قالامىزدا ءوتىپ جاتقان جارمەڭكەگە شۇجىق ونىمدەرىن جەتكىزدىك. نۇر-سۇلتان اكىمدىگى وزدەرىندە وتەتىن جارمەڭكەلەرگە تۇراقتى تۇردە شاقىرىپ تۇرادى. جىل سايىن وسىندا كەلىپ ساۋدا جاساپ تۇرامىز. ەلورداعا شۇجىقتارىمىزدىڭ ەڭ ءدامدىسىن الىپ كەلدىك. كەلىڭىزدەر, ساتىپ الىڭىزدار. ءبارى وتە ءدامدى», دەدى «كولباسنىي تسەح «مەتسگەر» جشس وكىلى راۋشان ەرمەكوۆا.
قالا تۇرعىندارى جارمەڭكەنىڭ ورنالاسقان جەرى ىڭعايلى ەكەنىن جەتكىزدى.
«مەن وسى ماڭايعا جاقىن جەردە تۇرامىن. سول سەبەپتى ماعان بازارعا ەمەس جارمەڭكەگە بارۋ ىڭعايلى. جارمەڭكەنىڭ تۇرعان جەرى دە جاقسى, قالانىڭ ەڭ كورىكتى جەرلەرىنىڭ ءبىرى. باعالارى دا قولجەتىمدى. جارمەڭكەنىڭ اياقتالاتىنى وكىنىشتى. سوڭعى ءبىر ايدا ەت, كوكونىس, جەمىس-جيدەكتى كوبىرەك الدىم. باعالارى قولايلى بولدى. كوپ ادام وسى جەردەن ساۋدا جاساپ كەتەدى», دەدى قالا تۇرعىنى بانۋ احمەتجانوۆا.
بۇعان دەيىن اۋىل شارۋاشىلىعى جارمەڭكەلەرىندە 5 مىڭ تونناعا جۋىق ءونىم ۇسىنىلعان بولاتىن. اۋىل شارۋاشىلىعى جارمەڭكەسىنە رەسپۋبليكانىڭ بارلىق وبلىستارىنان تاۋار وندىرۋشىلەر قاتىستى.
