بۇۇ مالىمەتىنشە, 2020 جىلدىڭ اياعىنان 2021 جىلدىڭ ماۋسىمىنا دەيىن بوسقىنداردىڭ جالپى سانى 82,4 ميلليوننان 84 ميلليونعا دەيىن ءوستى. ونىڭ ىشىندە 51 ميلليون ءماجبۇرلى قونىس اۋدارۋشىلار ءوز ەلىنىڭ ىشىندە كوشكەن, ولاردىڭ كوپشىلىگى - كونگو مەن ەفيوپيانىڭ وكىلدەرى. سونىمەن قاتار, ميانما مەن اۋعانستانداعى جاعداي ادامداردى 2021 جىلعى قاڭتار-ماۋسىم ارالىعىندا ۇيلەرىنەن كەتۋگە ءماجبۇر ەتكەنى ايتىلدى.
«حالىقارالىق قوعامداستىق ادامداردى ۇيلەرىن تاستاپ كەتۋگە ءماجبۇر ەتەتىن زورلىق-زومبىلىق, قۋدالاۋ جانە ادام قۇقىقتارىنىڭ بۇزىلۋىنا توسقاۋىل قويا المادى», دەدى فيليپپو گراندي, بۇۇ-نىڭ بوسقىندار ءىسى جونىندەگى جوعارعى كوميسسارى.
ونىڭ ايتۋىنشا, كليماتتىڭ وزگەرۋىنىڭ سالدارى بوسقىنداردىڭ ۋاقىتشا تۇراتىن كوپتەگەن اۋداندارىنداعى ونسىز دا قيىن جاعدايدى ۋشىقتىرىپ جاتىر.
جالپى, بوسقىنداردىڭ كوپشىلىگى بەس ەلدەن كەلەدى: ورتالىق افريكا رەسپۋبليكاسى - 71,8 مىڭ, وڭتۇستىك سۋدان - 61,7 مىڭ, سيريا - 38,8 مىڭ, اۋعانستان - 25,2 مىڭ جانە نيگەريا-20,3 مىڭ.
12 ميلليوننان استام ادام ءالى كۇنگە دەيىن ازاماتتىعى جوق. سونداي-اق بۇۇ بيىل 126,7 مىڭ بوسقىننىڭ ۇيلەرىنە ورالعانىن ايتتى.
بۇعان دەيىن بۇۇ الەمدىك قاقتىعىستار سالدارىنان الەمدە بارلىعى 48 ميلليون ادام بوسقىن مارتەبەسىنە يە بولعانىن حابارلاعان. بۇل رەكوردتىق وقيعا.
