بۇل حاتتاماعا 2020 جىلعى 31 قازاندا ماسكەۋ قالاسىندا قول قويىلدى. «حاتتاما «بايتەرەك» قازاقستان-رەسەي بىرلەسكەن كاسىپورنى» اكتسيونەرلىك قوعامىن بيۋدجەتتىك كرەديتتەن بوساتۋ ءتارتىبىن جانە «بايتەرەك» عارىش زىمىران كەشەنىن جۇكتەۋ كەپىلدىكتەرىن قامتاماسىز ەتەدى.
حاتتامادا تاراپتاردىڭ 2023 جىلى ورتا كلاستى تاسىمالداعىش زىمىرانمەن «بايتەرەك» عارىش زىمىران كەشەنىنىڭ ۇشۋ سىناقتارىنىڭ باستالۋىن قامتاماسىز ەتۋ بويىنشا مىندەتتەمەلەرى كورسەتىلگەن. حاتتاماداعى باستى ماقسات - «بايتەرەك» جوباسىنىڭ نەگىزگى شارتتارىن تۇزەتۋ جانە وزەكتەندىرۋ. بۇل رەتتە حاتتاما, ەڭ الدىمەن, قازاقستاندىق تاراپتىڭ مۇددەسىنە ساي جاسالعانىن ايتا كەتۋ كەرەك», دەدى قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين.
ونىڭ ايتۋىنشا, قازاقستان تارابى ءۇشىن بۇل قاجەتتى حاتتاما, ويتكەنى, بىرىنشىدەن, بىرلەسكەن كاسىپورىننىڭ قر قارجى مينيسترلىگىنىڭ الدىنداعى بيۋدجەتتىك كرەديت بويىنشا قارجىلىق مىندەتتەمەلەرى ماسەلەسىن زاڭدى نەگىزدە شەشۋگە مۇمكىندىك بەرەدى. بۇدان باسقا, قۇجاتقا رەسەي تاراپىنىڭ 2036 جىلعا دەيىن «سويۋز-5» زىمىران-تاسىعىشتارىن ۇشىرۋ كەشەنىن قامتاماسىز ەتۋ جونىندەگى مىندەتتەمەلەرى ەنگىزىلگەن.
«بايتەرەك» جوباسىنىڭ ماقساتى — «بايقوڭىر» عارىش ايلاعىنان عارىش اپپاراتتارىن ەكولوگيالىق تازا زىمىران تاسىعىشتارمەن شىعارۋ. جوبادا پايدالانىلاتىن پەرسپەكتيۆالى «سويۋز-5» زىمىران-تاسىعىشى وتىننىڭ ەكولوگيالىق تازا كومپونەنتىندە كەروسينمەن ۇشادى, سونداي-اق قورشاعان ورتاعا اسەردى الدىن الا باعالاۋدىڭ وڭ ساراپتاماسىنا يە.
«بايتەرەك» عارىش زىمىران كەشەنىن قۇرۋدى ۇيلەستىرەتىن جانە ونى ودان ءارى پايدالانۋعا جاۋاپ بەرەتىن وپەراتور – «بايتەرەك» قازاقستان-رەسەي بىرلەسكەن كاسىپورنى» اق. «بايتەرەك» – بۇل «بايقوڭىر» عارىش ايلاعىنداعى رەسەي تارابىمەن بىرلەسكەن نەگىزگى جوبا. بۇل جوبادا رەسەي تارابى تاسىمالداعىش زىمىراندى قۇرۋدى قامتاماسىز ەتەدى (916 ملن دوللار), ال قازاقستان تارابى قولدانىستاعى «زەنيت-م» عارىشتىق زىمىران كەشەنىنىڭ جەرۇستى كەشەنىن جاڭعىرتۋدى قارجىلاندىرۋدى مەملەكەتتىك تاپسىرما ارقىلى ورىنداۋدى قامتاماسىز ەتەدى (90,7 ملرد تەڭگە)», دەدى مينيستر.
زاڭ جوباسى كۇشىنە ەنگەندە مىناداي ناتيجەلەرگە قول جەتكىزۋگە مۇمكىندىك بەرەدى:
1. «بايتەرەك» قازاقستان-رەسەي بىرلەسكەن كاسىپورنى» اكتسيونەرلىك قوعامى بيۋدجەتتىك كرەديتتى ونىڭ جارعىلىق كاپيتالىنا ايىرباستاۋ ارقىلى كرەديتتىك مىندەتتەمەلەردەن بوساتىلادى جانە «بايتەرەك» مەملەكەتارالىق جوباسىن ىسكە اسىرۋدى جالعاستىرۋعا مۇمكىندىك الادى. ايىرباستاۋ ءراسىمىنىڭ ناتيجەسىندە قازاقستاندىق تاراپتىڭ بىرلەسكەن كاسىپورىنعا قاتىسۋ ۇلەسى شامامەن 99%-عا دەيىن ارتادى.
2. حاتتاما «بايتەرەك» عارىشتىق ۇشىرۋ كەشەنىنەن 10 جىل ىشىندە رەسەي تارابىنان كەمىندە جىلىنا 2 ۇشىرىلىم قامتاماسىز ەتۋگە كەپىلدىك بەرەدى. بۇل بولاشاقتا كەشەنگە سالىنعان مەملەكەتتىك ينۆەستيتسيانى قايتا ءوندىرىپ الۋعا مۇمكىندىك بەرەدى. «زاڭ جوباسىن قابىلداۋ رەسپۋبليكالىق جانە جەرگىلىكتى بيۋدجەتتەردەن قوسىمشا شىعىندى تالاپ ەتپەيدى, سونداي-اق ونىڭ تەرىس الەۋمەتتىك-ەكونوميكالىق سالدارى دا جوق. رەسەي تارابى وسى كەلىسىمنىڭ كۇشىنە ەنۋى بويىنشا مەملەكەت ىشىلىك راسىمدەرىن ورىندادى», دەدى باعدات مۋسين.
