جاڭا مەكتەپتىڭ اشىلۋ سالتاناتىنا رەسپۋبليكالىق ساداق اتۋ فەدەراتسياسى مەن وبلىستىق كاسىپكەرلەر پالاتاسىنىڭ وكىلدەرى, جەرگىلىكتى كاسىپكەرلەر, ءدىن قىزمەتكەرلەرى, سونداي-اق زيالى قاۋىم وكىلدەرى مەن ەسىمدەرى ەلگە بەلگىلى سپورتشىلار قاتىستى.
ءداستۇرلى مەكتەپتى اشىپ وتىرعان سپورتشى اياۋلىم اپپازوۆا ساداق اتۋدان ەل چەمپيونى, تالاي حالىقارالىق جارىستارعا قاتىسىپ,
جوعارى ناتيجەگە قول جەتكىزىپ ءجۇر.
– مەن ناۋىرزىم اۋدانىندا تۋىپ-ءوستىم. ساداق اتۋ – اتا-بابامىزدان قالعان ءداستۇرلى ونەر. بۇل دا ۇلتتىق سپورتتىڭ ءبىر ءتۇرى. ءوزىم وسى سالادا جۇرگەن سوڭ, ساداق اتۋ ءداستۇرى تۋعان وڭىردە دە جاندانسا ەكەن دەگەن نيەتپەن وبلىستىق كاسىپكەرلەر پالاتاسىنان كومەك سۇرادىم. پالاتا جوبامدى قولداپ, مەكتەپتى اشۋ بارىسىندا زاڭگەرلىك كەڭەس بەرىپ, كوپ كومەكتەستى. ءبىز ءوز مەكتەبىمىزدەگى جاتتىعۋ جۇمىستارىنا قازاق, تۇرىك جانە موڭعول ساداعىن پايدالاناتىن بولامىز. ولار ەۋروپالىق نەمەسە شىعىسازيالىق ساداقتارعا قاراعاندا قىسقا ءارى جەڭىل, ات ۇستىندە شاۋىپ كەلە جاتىپ اتۋعا ىڭعايلى كەلەدى. قازاق ساداعىمەن 180 مەتر قاشىقتان نىساناعا ءدال تيگىزۋگە بولادى. قوستاناي وڭىرىندە جەبە تارتۋ كەنجە قالعاندىقتان, ونىڭ پايداسىن دا كوپ ادام ەسكەرە بەرمەيدى. مىسالى, ساداق اتىپ ادەتتەنگەن ادامنىڭ ارقا بۇلشىق ەتتەرى جاقسى داميدى, ومىرتقالارى مىقتى بولادى جانە كورۋ قابىلەتى جاقسارادى, – دەيدى اياۋلىم.
مەكتەپتىڭ اشىلۋ راسىمىندە ءسوز العان «ولجا-اگرو» سەرىكتەستىگىنىڭ باس ديرەكتورى ايداربەك حودجانازاروۆ كوپشىلىكتى توبىل وڭىرىندە تۇڭعىش جۇمىسىن باستاعان ۇلتتىق مەكتەپتىڭ پايدا بولۋىمەن قۇتتىقتاپ, ءدال وسىنداي ساداق اتۋ كلۋبتارىنىڭ اۋىلدىق مەكەندەردە دە اشىلۋ كەرەكتىگىن تىلگە تيەك ەتتى.
– ءبىزدىڭ سەرىكتەستىكتىڭ ۇزىنكول, سارىكول اۋداندارىندا مادەنيەت ورتالىقتارى بار. ەگەر سول وڭىرلەرگە بارىپ ۇلتتىق سپورت ۇيىرمەلەرىن اشقىلارىڭىز كەلسە, ءبىز ءوز تاراپىمىزدان قارجىلاي دەمەۋشىلىك جاساپ, قولداۋ كورسەتەر ەدىك, دەدى سەرىكتەستىك باسشىسى.
سالتاناتتى شاراعا ارنايى كەلگەن رەسپۋبليكالىق ءداستۇرلى Sadaq Aty فەدەراتسياسىنىڭ ۆيتسە-پرەزيدەنتى دياس احمەتوۆ اياۋلىم اپپازوۆاعا ساداق اتۋ جاتتىقتىرۋشىسىنىڭ سەرتيفيكاتىن تابىس ەتىپ, ءوز شاكىرتتەرىمەن بىرگە جەبە تارتۋدان شەبەرلىك ساباعىن كورسەتتى.
قوستاناي وبلىسى
