وسىدان جەتى جىل بۇرىن ەلباسى نۇرسۇلتان نازارباەۆتىڭ قاتىسۋىمەن وتكەن كاسىپورىننىڭ اشىلۋ راسىمىندە تۇڭعىش پرەزيدەنت ەلىمىزدە تۇرعىن ءۇي قۇرىلىسى مەن قولجەتىمدى باسپانانىڭ اۋقىمدى باعدارلاماسى جۇزەگە اسىرىلىپ جاتقانىن تىلگە تيەك ەتە كەلىپ, مۇنداي كومبيناتتار باسپانا باعاسىن تومەندەتۋگە مۇمكىندىك بەرەتىنىن جانە جاڭا كاسىپورىنعا مەملەكەتتىك باعدارلامالار ارقىلى قولداۋ كورسەتىلۋى ءتيىس ەكەنىن ايتقان ەدى.
سول كەزدە ەڭ وزىق زاماناۋي قۇرىلعىلارمەن جابدىقتالعان كومبيناتتىڭ ىسكە قوسىلۋى ناتيجەسىندە قۇرىلىس جۇمىستارىنىڭ مەرزىمى 2,5 ەسە قىسقاراتىنىن, ال وزىندىك قۇنى 20-30 پايىزعا ارزاندايتىنىن جەتكىزگەن كاسىپورىن باسشىلارى 150 ادامنىڭ جۇمىسقا قابىلدانعانىن جانە جىلىنا 70 مىڭ شارشى مەتر تۇرعىن ءۇي سالۋعا قاۋقارلى ەكەندىكتەرىن سۇيىنشىلەگەن.
الايدا تاياۋدا عانا اتالعان كاسىپورىننىڭ ديرەكتورى ۆلاديمير اننەنكو وبلىستىق كاسىپكەرلەر پالاتاسىنان قولداۋ سۇراپ, قوستاناي توڭىرەگىندەگى قۇرىلىس نارىعىنىڭ قاجەتىن كەڭ اۋقىمدا وتەي الاتىن مۇمكىندىگى بولا تۇرا, كومبينات بۇگىندە 30-اق پايىزدىق جۇكتەمەمەن جۇمىس ىستەپ جاتقانىن ايتتى.
– ءۇي قۇرىلىسى كومبيناتى جوعارى ساپالى تەمىربەتون بۇيىمدارىنىڭ جانە تاۋارلىق بەتوندار مەن قۇرىلىسقا قاجەت ەرىتىندىلەردىڭ 300-دەن استام ءتۇرىن وندىرەدى. كاسىپورىننىڭ باستى مىندەتى – ءىرى پانەلدى ۇيلەرگە ارنالعان قۇرىلىس ماتەريالدارىن شىعارۋ. ءبىزدىڭ ماتەريالداردى, اسىرەسە, الەۋمەتتىك تۇرعىن ءۇي قۇرىلىسىندا پايدالانعان ءتيىمدى. سوعان قاراماستان, جەرگىلىكتى جەردە شىعارىلاتىن ونىمدەردى بۇگىنگى قۇرىلىس نارىعى كوپ قاجەتسىنبەي وتىر, – دەدى ۆ.اننەنكو.
ەلىمىزدە ءۇي قۇرىلىسى كومبيناتتارىنا (ۇقك) قولداۋ كورسەتۋ تۋرالى ءتۇرلى باعدارلاما دا بار. ماسەلەن, 2020-2025 جىلدارعا ارنالعان «نۇرلى جەر» مەملەكەتتىك باعدارلاماسىندا 2022 جىلعى قۇرىلىس جۇمىستارىنا ۇقك ونىمدەرىنىڭ كەم دەگەندە 50 پايىزى پايدالانىلۋى ءتيىس ەكەندىگى ايتىلعان. سونداي-اق ءۇي قۇرىلىسى كومبيناتتارىن دامىتۋدىڭ 2021-2025 جىلدارعا ارنالعان جول كارتاسىندا قوستاناي ءۇي قۇرىلىسى كومبيناتىنىڭ قۇرىلىس بۇيىمدارىن ءوندىرۋ جۇكتەمەسىن 5 جىل ىشىندە 21 مىڭ شارشى مەتردەن 56 مىڭ شارشى مەترگە دەيىن ۇلعايتۋ كوزدەلگەن. ۇكىمەتتىڭ باعدارلامالىق قۇجاتتارى دا بۇگىندە جەر-جەردە قارقىندى ءجۇرىپ جاتقان قۇرىلىس جۇمىستارىنا ۇقك-لەر ءوندىرىپ جاتقان قازاقستاندىق قۇرىلىس ماتەريالدارىن كەڭىنەن پايدالانۋدى مىندەتتەيدى.
الايدا قازىرگى زاماناۋي قۇرىلىسقا كوبىنە-كوپ كىرپىش پايدالانىلاتىندىقتان, ءىرى پانەلدى ۇيلەردى قۇراستىرۋعا دايىن ماتەريال شىعاراتىن ءۇي قۇرىلىسى كومبيناتتارى نارىقتاعى ءوز ۇلەستەرىنەن قاعىلىپ وتىر. كىرپىشتىڭ قىمبات ەكەنىن العا تارتقان كومبينات باسشىسى, وعان قاراعاندا ەداۋىر ارزان ءارى تەز سالىناتىن پانەلدى ۇيلەر قۇرىلىسىنىڭ ۇلەسىن ارتتىرۋ قاجەتتىگىن ايتادى.
– كىرپىش ۇيلەردىڭ سىرتقى جانە ىشكى قابىرعالارىن كوتەرۋ ءۇشىن, كەم دەگەندە 30 نەمەسە 40 مامان كەرەك. ال ءىرى پانەلدى ۇيلەردى 5-6-اق مامان قۇراستىرىپ شىعا الادى. بۇل قۇرىلىس ساپاسىن ساقتاي وتىرىپ, ءوندىرىستى ارزانداتۋعا مۇمكىندىك بەرەدى. مۇنىڭ سىرتىندا, بۇگىندە تۇرعىن ءۇيدىڭ باعاسى دا كۇن ساناپ قىمباتتاپ جاتىر. سوندىقتان تۇرعىنداردى ارزان ءارى ساپالى باسپانامەن قامتاماسىز ەتۋ ءۇشىن وزىمىزدەن شىعاتىن جەرگىلىكتى ءونىمنىڭ ۇلەسىن ارتتىرۋ جاعىن ويلاستىرۋ كەرەك, – دەدى ۆ.اننەنكو.
كاسىپكەرلەر پالاتاسىنىڭ ديرەكتورى دانيار كۇزەنباەۆتىڭ ايتۋىنشا, ءۇي قۇرىلىسى كومبيناتى كوتەرىپ وتىرعان ماسەلەنىڭ ءبىر ۇشىعى قاراپايىم حالىقتى قولجەتىمدى باسپانامەن قامتۋ سياقتى اسا ماڭىزدى الەۋمەتتىك ماسەلەمەن استاسىپ جاتىر. مۇنى جەرگىلىكتى اتقارۋشى ورىنداردى قاتىستىرا وتىرىپ شەشۋگە بولادى.
قوستاناي ءۇي قۇرىلىسى كومبيناتىنىڭ ماسەلەسى الداعى ۋاقىتتا مەملەكەتتىك ساتىپ الۋلارداعى جەرگىلىكتى قامتۋدى باقىلاۋ جونىندەگى وڭىرلىك كوميسسيا وتىرىسىندا قارالماق.
قوستاناي وبلىسى
