ماسەلەن, 30 ماۋسىم مەن 30 قىركۇيەك ارالىعىندا ۆاكتسينانىڭ ءبىرىنشى نەمەسە ەكىنشى كومپونەنتىن العاندار اراسىندا ءار 10 كۇن سايىن 200 مىڭ تەڭگەنىڭ 10 اقشالاي سەرتيفيكاتىن ويناتتى. ال 30 ماۋسىم – 31 شىلدە ارالىعىندا ۆاكتسينا سالدىرعاندار ءۇشىن تامىز ايىندا 3 ملن تەڭگەلىك ەكى سەرتيفيكات ۇتىسقا ءتۇستى. قىركۇيەكتە ارقايسىسى 3 ملن تەڭگەنى قۇراعان ەكى سەرتيفيكات ويناتىلدى. سەيسەنبىدە اكتسيانىڭ قورىتىندى كەزەڭىندە ۆاكتسينا العان 10 ادامعا جالپى سوماسى 10 ملن تەڭگەنىڭ اقشالاي سەرتيفيكاتى تابىس ەتىلدى.
1 ملن تەڭگەنىڭ سەرتيفيكاتىن يەلەنگەننىڭ ءبىرى – اشىق ماقبۇلە. كۇيەۋى ەكەۋى كوكتەمدە سپۋتنيك V ۆاكتسيناسىن سالدىرعان ەكەن. بىراق اقشالاي ۇتىس ويىنىنا قاتىساتىنىن بىلمەگەن.
– اقتسيانىڭ قورىتىندى كەزەڭىندە 1 ملن تەڭگە ۇتقانىمىزدى ەستىگەندە, ارينە سەنە المادىق. وتباسىمىزدا بىرگە تۇراتىن 72 جاستاعى اكەمىز دە ەكپە الدى. ەندى بالالارعا كوروناۆيرۋس ينفەكتسياسىنا قارسى ۆاكتسينا سالۋ باستالسا, ولاردى دا ەكپە الۋ ارقىلى قورعاۋدى جوسپارلاپ وتىرمىز, – دەيدى اشىق ماقبۇلە.
ۆاكتسينا سالدىرىپ, جەڭىمپاز اتانعانداردىڭ قاتارىندا كوپبالالى انا التىن بوزجانوۆا دا بار. ءبىراز جىلدان بەرى وبلىستىق جۇيكە-پسيحياتريالىق ديسپانسەردىڭ اسحاناسىندا جۇمىس ىستەيدى. سول سەبەپتەن, وعان ادامدارمەن ءجيى بايلانىس جاساۋعا تۋرا كەلەدى.
– اركىم الدىمەن ءوزىنىڭ دەنساۋلىعىن ويلايدى عوي. ونىڭ ۇستىنە قاۋىپتى ۆيرۋستىڭ ءورشۋى ءالى بايقالادى. وسىنداي كەزدە جاقىندارىڭا دا جاناشىر بولۋ كەرەك. ءدال قازىر قالىپتى ومىرگە ورالۋدىڭ جالعىز جولى – ۆاكتسينا الۋ. سوندىقتان ءوزىمدى, وتباسىم مەن جاقىندارىمدى قورعاۋ ءۇشىن ۆاكتسينا سالدىردىم. الايدا ۇتىس ويىنىنا قاتىسىپ, قوماقتى قارجى ۇتۋدى كوزدەگەن جوق ەدىم. «ميلليون تەڭگە ۇتتىڭىز» دەگەن حاباردى ءازىل رەتىندە قابىلدادىم. شىنىمدى ايتسام, مەن ءۇشىن بۇل قارجى ۇلكەن توسىنسىي بولدى. ەندى بالالارىمنىڭ بولاشاعى ءۇشىن دەپوزيت اشىپ, ۇتقان اقشانى سوعان سالامىن, – دەيدى التىن بوزجانوۆا.
وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى تاراتقان اقپاراتقا سۇيەنسەك, بيىلعى 1 اقپاننان 3 قاراشاعا دەيىن ۆاكتسينالاردىڭ ءبىرىنشى كومپونەنتىن ەكتىرگەن اتىراۋلىقتاردىڭ سانى 240 968 ادامعا جەتىپ وتىر. ونىڭ ىشىندە 14 مىڭنان استام پەداگوگ, 6 033 ستۋدەنت بار. سونداي-اق ۆاكتسينالاردىڭ ەكىنشى كومپونەنتىن
217 284 ادام سالدىرىپتى.
اتىراۋ وبلىسى
