ماسەلەن, قازان ايىندا ۇلتتىق پاۆيلوندى پرەمەر-مينيستر اسقار مامين ارنايى كەلىپ ارالادى. بۇدان بولەك, حالىقارالىق كورمەلەر بيۋروسىنىڭ باس حاتشىسى ديميتري كەركەنتزەس ءوز باعاسىن بەردى. سونداي-اق بىرىككەن اراب امىرلىكتەرىنىڭ جوعارى لاۋازىمدى مينيسترلەرى, كورمەگە قاتىسۋشى ەلدەردىڭ ەلشىلەرى مەن باس كوميسسارلارى دا ۇلتتىق پاۆيلونعا قوناق بولىپ قايتتى.
بۇعان دەيىن جازعانىمىزداي, قازاقستان پاۆيلونى 2021 جىلدىڭ 1 قازانىندا رەسمي تۇردە اشىلعان بولاتىن. ءدال سول كۇنى پاۆيلوندى دۋبايدىڭ بيلەۋشىسى, بىرىككەن اراب امىرلىكتەرىنىڭ ۆيتسە-پرەزيدەنتى مۇحاممەد يبن راشيد ءال-ماكتۋم مەن دۋبايدىڭ مۇراگەر حانزاداسى حامدان يبن مۇحاممەد ءال-ماكتۋم, ەكسپو-2020 كورمەسىنىڭ باس ديرەكتورى ريم ءال-حاشيمي العاشقىلاردىڭ ءبىرى بولىپ ارالاپ, جۇمىسىنا ساتتىلىك تىلەدى. سول كۇنى كەشكە پاۆيلونعا تاتارستان رەسپۋبليكاسىنىڭ پرەزيدەنتى رۋستام ميننيحانوۆتىڭ دا ارنايى كەلگەنىن اتاپ وتكەن ءجون.
QazExpoCongress ۇلتتىق كومپانياسىنىڭ حابارلاۋىنشا, قازان ايىندا پاۆيلوندا مازمۇندى ىسكەرلىك ءارى مادەني باعدارلامالار ۇسىنىلعان. اتاپ ايتقاندا, 3 قازاندا ەكسپو-نىڭ كليمات جانە بيوالۋاندىق تاقىرىپتىق اپتالىعى اياسىندا Kazakhstan Green Day ىسكەرلىك ءىس-شارالار سەرياسى ءوتتى. ونى حالىقارالىق جاسىل تەحنولوگيالار جانە ينۆەستيتسيالىق جوبالار ۇيىمى ۇيىمداستىرعان. بۇعان قوسا «قازستاندارت» كاسىپورنى اراب سەرىكتەستەرىمەن بىرقاتار ىسكەرلىك كەزدەسۋ وتكىزگەن.
«11-14 قازان ارالىعىندا شەتەلدىك جانە قازاقستاندىق سۋرەتشىلەردىڭ قاتىسۋىمەن Sal-Seri گالەرەياسىنىڭ «وركەندەۋ سىزىقتارى» كورمەسىنىڭ ۆەرنيساجى ءوتتى. وندا بەينەلەۋ ونەرىندەگى جاڭا باعىتتار ۇسىنىلدى.
سونىمەن قاتار 24-28 قازاندا پاۆيلوندا قازاقستاننىڭ تۋريزم كۇندەرى ۇيىمداستىرىلدى. ونىڭ اياسىندا پانەلدىك سەسسيالار, ىسكەرلىك كەزدەسۋلەر, مادەني ءىس-شارالار ءوتتى. اتاپ ايتقاندا, «سازگەن سازى» فولكلورلىق-ەتنوگرافيالىق ءانسامبلى ونەر كورسەتىپ, MarinoMadi برەندىنىڭ فەشن كورسەتىلىمى كوپشىلىك نازارىنا ۇسىنىلدى. 1 قاراشادا بىرىككەن اراب امىرلىكتەرىنىڭ ىسكەر قاۋىمى Nur-Sultan Investment and Tourism Forum فورۋمىنا جينالدى», دەپ حابارلادى QazExpoCongress.
پاۆيلون مەديا تۇلعالاردىڭ دا قىزىعۋشىلىعىن تۋدىرىپ وتىر. ميلليونداعان جازىلۋشىسى بار تانىمال بلوگەرلەر پاۆيلوننان العان اسەرىن الەۋمەتتىك جەلى ارقىلى بولىسكەن. وسى ورايدا ۇلتتىق پاۆيلوننىڭ ىشىنەن اشىلعان Qazaq Gourmet مەيرامحاناسى دا كەلۋشىلەردى تاڭداۋلى ءارى تاڭسىق ۇلتتىق تاعامدار مازىرىمەن تاڭعالدىرۋدا.
پاۆيلوننىڭ ىشكى مازمۇنى ەلىمىزدىڭ تۋريستىك جانە ينۆەستيتسيالىق الەۋەتىن پاش ەتەدى. سونداي-اق ول حالىقارالىق كورمەنىڭ «اقىل-ويدى بىرىكتىرە وتىرىپ, بولاشاقتى قالىپتاستىرۋ» تاقىرىبىمەن تولىق ۇندەسىپ جاتىر. كەلۋشىلەر تابيعاتپەن, تاريحپەن, مادەنيەتپەن, داستۇرمەن تىنىستاپ, ەل دامۋىنىڭ الەۋەتتى جوبالارىمەن تانىسادى. اسىرەسە, كوپشىلىك اراسىندا «روبوتتىڭ قولى» اتالىپ كەتكەن فينالدىق شوۋ تالايدىڭ تاڭدايىن قاقتىرۋدا. مۇنداعى ادام مەن جاساندى ينتەللەكتىڭ ءوزارا ارەكەتى جۇرتشىلىقتى بىردەن باۋراپ الادى.
قازاقستاننىڭ ەحرو-2020 كورمەسىنە قاتىسۋداعى نەگىزگى ماقساتتىڭ ءبىرى – ەل ەكونوميكاسىنا تىكەلەي جانە جاناما ينۆەستيتسيالار تارتۋ. بۇل رەتتە ۇلتتىق پاۆيلوندا 30-عا جۋىق ىسكەرلىك ءىس-شارا وتكىزۋ جوسپارلانعان.
ەسكە سالا كەتەيىك, دۇنيەجۇزىلىك EXPO-2020 كورمەسى 2021 جىلدىڭ 1 قازانى مەن 2022 جىلدىڭ 31 ناۋرىزى ارالىعىندا وتەدى. نەگىزى بۇل شارا بىلتىر ۇيىمداستىرىلۋى كەرەك ەدى. الايدا كوروناۆيرۋس پاندەمياسىنا بايلانىستى ونىڭ مەرزىمى شەگەرىلدى. كورمەگە الەمنىڭ 192 ەلى قاتىسۋدا. ونى شامامەن 25 ملن ادام تاماشالايدى دەپ كۇتىلۋدە.
