مەملەكەتتىك قىزمەت كورسەتۋ سالاسىندا 2019-2021 جىلدار ارالىعىندا 222 سىبايلاس جەمقورلىق قۇقىق بۇزۋشىلىق تىركەلىپ, 122 ادام قىلمىستىق جاۋاپكەرشىلىككە تارتىلدى. كەڭەس مۇشەسى, جۇمىس توبىنىڭ جەتەكشىسى عالىم بايتوقتىڭ ايتۋىنشا, ntrcthe بارىسىندا بىرقاتار سىبايلاس جەمقورلىق تاۋەكەلدەرى انىقتالدى. ونىڭ ىشىندە مەملەكەتتىك ساتىپ الۋ سالاسى دا بار. «مەملەكەتتىك كورپوراتسيا 2019 جىلى 37,7 ملرد تەڭگەگە ساتىپ الۋ جۇرگىزدى. بۇل سومانىڭ 70%-دان استامى تىكەلەي ءبىر كوزدەن الىنعان. ساتىپ الۋ تۋرالى 10 مىڭ شارتتا 4 مىڭنان استام تاۋەكەل انىقتالعان. كونكۋرستاردا 705 جەتكىزۋشى تەندەرلەردى باسقالارعا قاراعاندا ءجيى ۇتىپ العان, 2 مىڭنان استام كەلىسىمشارتتا باعالار جوعارى كورسەتىلگەن, جەتكىزۋ مەرزىمى قىسقا. سونىمەن قاتار كورپوراتسيا بيۋدجەتتى ءتيىمسىز جوسپارلاۋ بويىنشا انتيرەيتينگتە 1-ورىنعا شىقتى», دەدى ع.بايتوق.
كەڭەس توراعاسى, ءماجىلىس دەپۋتاتى ەرلان سايروۆ حالىققا قىزمەت كورسەتۋ ورتالىقتارىنىڭ قىزمەتتەرى قالالارعا قاراعاندا اۋىل تۇرعىندارى ءۇشىن قولجەتىمدى ەمەستىگىن العا تارتتى. «اۋدان ورتالىقتارىنان 200-300 شاقىرىم جەردە ورنالاسقان شاعىن اۋىلدار بار. اۋىل تۇرعىندارىنا ول جاققا قاتىناۋ قيىن. بۇل, اسىرەسە, شەكارالاس اۋدانداردا وزەكتى. شەشىمىن تابۋعا ءتيىس تاعى ءبىر ماسەلە – بارلىق جەردە قاپتاپ جۇرگەن «دەلدالدار». ازاماتتاردىڭ سەنگىشتىگىن نەمەسە قاراپايىم حالىقتىڭ ءبىر بولىگى, اسىرەسە, زەينەتكەرلەردىڭ ەلەكتروندى گادجەتتەرمەن جۇمىس ىستەي المايتىنىن پايدالاناتىن «پىسىقايلار» بار», دەدى ە.سايروۆ.
بۇعان جاۋاپ رەتىندە «ازاماتتارعا ارنالعان ۇكىمەت» مك» كەاق باسقارما توراعاسى ءادىل قوجيحوۆ بۇگىندە ننتەرنەتكە قول جەتكىزۋ قيىندىق تۋعىزاتىن شالعاي ەلدى مەكەندەرگە ارنايى باراتىن 69 موبيلدىك حقو جۇمىس ىستەيتىنىن اتاپ ءوتتى. سونداي-اق ول كەڭەس مۇشەلەرىن سىبايلاس جەمقورلىق تاۋەكەلدەرىن تومەندەتۋ ءۇشىن قابىلدانىپ جاتقان شارالار تۋرالى حاباردار ەتتى. ء«بىز سىبايلاس جەمقورلىققا قارسى ىشكى ستاندارتتى ازىرلەدىك, 5 مىڭعا جۋىق ءتۇرلى الدىن الۋ ءىس-شاراسىن وتكىزدىك. مۇنداي ءىس-شارالاردىڭ ءبىرازى Nur Otan پارتياسىمەن جانە قۇقىق قورعاۋ ورگاندارىمەن بىرلەسىپ وتكىزىلدى. «جاسىرىن ساتىپ الۋشى» ادىسىمەن جۇرگىزىلگەن ىشكى تەكسەرۋلەردىڭ ناتيجەسىندە دەربەس دەرەكتەردى ءۇشىنشى تۇلعاعا بەرۋدىڭ 23 فاكتىسى انىقتالدى», دەدى ءا.قوجيحوۆ.
سونداي-اق جيىن بارىسىندا پارتيا مۇشەلەرى 200 مىڭنان استام تۇرعىنى بار تۇركىستان وبلىسىنىڭ سايرام اۋدانىندا ءبىر عانا حالىققا قىزمەت كورسەتۋ ورتالىعى جۇمىس ىستەيتىنىنە نازار اۋداردى. مەملەكەتتىك كورپوراتسياعا ەكىنشى ورتالىق اشۋ ماسەلەسىن پىسىقتاۋ ۇسىنىلدى. سونىمەن قاتار كەڭەس مۇشەلەرى مەملەكەتتىك قىزمەت كورسەتۋ جۇيەسىن جەتىلدىرۋ ماقساتىندا قولدانىستاعى زاڭناماعا وزگەرىستەر ەنگىزۋدى ۇسىندى. «مەديتسينالىق مەكەمە قىزمەتكەرلەرىنىڭ قىزمەت كورسەتۋ مەرزىمىن ساقتاماۋىنىڭ سالدارىنان حالىقتى ەمحانالارعا تىركەۋ كەزىندە مەرزىمىن وتكىزىپ الۋ ماسەلەسى ءجيى كەزدەسەدى. بۇل – جالعىز مەكەمەدە كەزدەسەتىن جاعداي ەمەس. مۇنداي مىسالدار كوپ. مەملەكەتتىك قىزمەتتەردى ۋاقتىلى كورسەتپەگەنى, ەلەكتروندى قۇجاتتاردى قابىلداۋدان باس تارتقانى ءۇشىن, سونداي-اق اقپاراتتىق سەرۆيستەردىڭ, ونىڭ ىشىندە egov.kz پورتالىنىڭ جۇمىسىنداعى ىركىلىستەر ءۇشىن اكىمشىلىك جاۋاپكەرشىلىك ەنگىزگەن ءجون», دەدى ع.بايتوق.
جيىن قورىتىندىسىندا Nur Otan پارتياسى جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەس «ازاماتتارعا ارنالعان ۇكىمەت» مەملەكەتتىك كورپوراتسياسىنان جانە ۋاكىلەتتى مەملەكەتتىك ورگانداردان بارلىق ايتىلعان ماسەلەنى باقىلاۋعا الۋدى جانە ولاردى شەشۋ بويىنشا ناقتى ۇسىنىستار ەنگىزۋدى تالاپ ەتتى.
