شارانى قازاقستان پرەزيدەنتىنىڭ كومەكشىسى, ۇلتتىق كەڭەس حاتشىسى ەرلان كارين اشتى. ول ءوز سوزىندە «رەفورمالار مەن ديالوگ پرەزيدەنتتىك كۋرستىڭ نەگىزگى باعىتتارىنىڭ ءبىرى بولىپ تابىلادى. ماسەلەن, ساياسي باستامالاردى جۇزەگە اسىرۋ اياسىندا عانا قازىرگى تاڭدا 10 زاڭ قابىلداندى. ولاردىڭ ىشىندە بيىلعى مامىر ايىندا مەملەكەت باسشىسى «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭعا جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سايلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. سونىڭ ناتيجەسىندە بيىلعى جىلدىڭ ەكىنشى جارتىجىلدىعىنان باستاپ رەسپۋبليكا بويىنشا 811 اۋىلدىق وكرۋگتە اكىمدەردىڭ سايلاۋى ءوتتى. سايلانعان اكىمدەردىڭ 86% ساياسي پارتيالاردىڭ ۇمىتكەرلەرى. تاعى 14% ءوزىن ءوزى ۇسىنعان ۇمىتكەرلەر. سونىمەن بىرگە, سايلانعان اكىمدەردىڭ جارتىسى (51%) سايلاۋعا دەيىن بۇل قىزمەتتەردى اتقارماعان جاڭا ادامدار», دەدى.
ۇقسك جانە پرەزيدەنتتىك جاستار كادرلىق رەزەرۆىنىڭ بىرلەسكەن زەرتتەۋ توبىنىڭ جەتەكشىسى الەكساندر دانيلوۆ 4 وبلىستىڭ (پاۆلودار, قوستاناي, تۇركىستان جانە شىعىس قازاقستان) اۋىل اكىمدەرىنىڭ سايلاۋى وتكەن اۋىلدىق وكرۋگتەرىنە بارۋ نەگىزىندە دايىندالعان تالدامالىق باياندامانى ۇسىندى. باياندامادا اۋىلداعى تۇرعىنداردىڭ نەگىزگى تۇيتكىلدى ماسەلەلەرى, اۋىل اكىمدەرىن تىكەلەي سايلاۋدىڭ قىسقاشا قورىتىندىلارى جانە سايلاۋ ناۋقانىنىڭ ەرەكشەلىكتەرى كورسەتىلگەن.
الەكساندر دانيلوۆ ءوز سوزىندە اۋىلدىق وكرۋگ اكىمىن تىكەلەي سايلاۋىنا بايلانىستى اۋىل تۇرعىندارىنىڭ جالپى پىكىرى جاقسى ەكەنىنە نازار اۋداردى. زەرتتەۋ بارىسىندا ۇمىتكەرلەرمەن جۇرگىزىلگەن سۇحباتتار ناتيجەسى ساياسي پارتيالار جۇمىسىنىڭ جاندانعانىن, سونداي-اق ۇمىتكەرلەر ۋاجدەمەلەرىنىڭ جەتكىلىكتى جوعارى دەڭگەيىن, سايلاۋ ناۋقانى مەحانيزمدەرى مەن تاكتيكاسىن جاقسى تۇسىنگەندەرىن كورسەتتى.
سونىمەن بىرگە, بۇدان بۇرىن ماڭعىستاۋ, سولتۇستىك قازاقستان جانە قاراعاندى وبلىستارىندا ۇقسك مۇشەلەرىنىڭ كوشپەلى وتىرىستارى اياسىندا اۋىل اكىمدەرىنىڭ تىكەلەي سايلاۋىنا دايىندىق بارىسى مەن اۋىلداردى دامىتۋ ماسەلەلەرى تالقىلانعان بولاتىن. مۇرات ابەنوۆ, تولەۋتاي راقىمبەكوۆ, مارات باشيموۆ جانە ماكسيم روجين وڭىرلەرگە بارعان ساپارلارىنا قاتىستى ءوز ويلارىمەن ءبولىستى.
سونداي-اق وڭىرلەردەن كەلگەن ۇقسك مۇشەلەرى ءلاززات قوجاحمەتوۆا, ءبورىحان نۇرمۇحامەدوۆ, تاتتىگۇل تالاەۆا, ۋايس ەرسايىن ۇلى جانە ايگۇل ورىنبەك جەرگىلىكتى جەرلەردە اۋىل اكىمدەرىن سايلاۋدىڭ ەرەكشەلىكتەرىنە توقتالدى.
تالقىلاۋ قورىتىندىسى بويىنشا ساراپشىلار اۋىل اكىمدەرىن تىكەلەي سايلاۋ تەتىگىن جەتىلدىرۋ بويىنشا بىرقاتار ۇسىنىس بەردى. ۇلتتىق قوعامدىق سەنىم كەڭەسىنىڭ الداعى التىنشى وتىرىسىندا دا اۋىل اكىمدەرى سايلاۋىن وتكىزۋ بويىنشا ۇسىنىستار توپتاماسى ۇسىنىلاتىن بولادى.
