زاڭ جوباسى جىلۋ ەنەرگەتيكاسى تۋرالى زاڭنامانى بۇزعانى ءۇشىن جازانىڭ بۇلتارتپاستىعى قاعيداتىن ىسكە اسىرۋعا باعىتتالعان.
اتاپ ايتقاندا, جوعارى ەنەرگيا تۇتىنۋ تۇتىنۋشىلاردىڭ كىناسىنەن جۇزەگە اسىرىلاتىن جاعدايلاردى قوسپاعاندا, عيمارات پايدالانۋعا بەرىلگەن سوڭ بەس جىلدان كەيىن ەنەرگيا تيىمدىلىگىنىڭ بەلگىلەنگەن سىنىبىنا قول جەتكىزبەگەنى ءۇشىن جاۋاپكەرشىلىك كوزدەلەتىن باپ پايدا بولادى. بۇل بۇزۋشىلىق ءۇشىن عيمارات سالۋشىعا ايىپپۇل قاراستىرىلعان.
بۇدان باسقا, جىلۋ ەنەرگياسىن تۇتىنۋ كەزىندە ونىڭ ىسىرابىن ازايتۋ جونىندەگى ءىس-شارالاردى ورىنداماعانى ءۇشىن جازالاۋ جوسپارلانۋدا.
اڭگىمە كوپ پاتەرلى تۇرعىن ۇيلەردى جىلۋ بويىنشا جاڭعىرتۋ تۋرالى بولىپ وتىر, مۇنداي ءىس-شارالار, كەستە مەن مەرزىمدەر م ۇلىك يەلەرى بىرلەستىگىنىڭ, جاي سەرىكتەستىكتىڭ نەمەسە پاتەر يەلەرى كووپەراتيۆىنىڭ شەشىمىمەن بەلگىلەنگەن تارتىپپەن ايقىندالعان.
بەلگىلەنگەن نورمالار بۇزىلعان جاعدايدا م ۇلىك يەلەرى بىرلەستىگىنىڭ ءبىرىنشى باسشىسىنا نەمەسە تيىسىنشە, جاي سەرىكتەستىكتىڭ نەمەسە پاتەر يەلەرى كووپەراتيۆىنىڭ ءبىرىنشى باسشىسىنا ايىپپۇل كوزدەلەدى.
ايىپپۇل مولشەرى ءالى انىقتالعان جوق.
ەنەرگەتيكا مينيسترلىگىندە اتاپ وتكەندەي, قولدانىستاعى زاڭنامادا جىلۋ ەنەرگەتيكاسى سالاسىنداعى سۋبەكتىلەرگە قاتىستى اكىمشىلىك شارالاردى قولدانۋ ماسەلەسى ءىشىنارا قامتىلعان.
«قازاقستان رەسپۋبليكاسىنداعى اعىمداعى جاعدايدى جانە جىلۋ ەنەرگەتيكاسى سالاسىنداعى شەتەلدىك زاڭنامانى تالداۋدى نەگىزگە الا وتىرىپ, ادال شارۋاشىلىق جۇرگىزۋشى سۋبەكتىلەر ءۇشىن ىنتالاندىرۋ شارالارى جۇيەسىن قالىپتاستىرۋمەن قاتار, مەملەكەتتىك باقىلاۋدىڭ جانە تالاپتاردى بۇزعانى ءۇشىن جاۋاپكەرشىلىكتىڭ تولىققاندى جۇيەسىن قالىپتاستىرۋ قاجەت. وسىعان بايلانىستى, «اكىمشىلىك قۇقىق بۇزۋشىلىق تۋرالى» كودەكستى جىلۋ ەنەرگەتيكاسى تۋرالى زاڭنامانى بۇزعانى ءۇشىن جاۋاپكەرشىلىك شارالارىمەن تولىقتىرۋ قاجەت», دەلىنگەن قۇجاتتا.
زاڭ جوباسى 30 قاراشاعا دەيىن «اشىق نقا» سايتىندا جاريا تالقىلاۋ ءۇشىن ورنالاستىرىلعان.
