بۇل تۋرالى ۇلتتىق ستاتيستيكا بيۋروسى ءمالىم ەتتى.
8 قاراشا كۇنى ساعات 00:00-دە «حالىق ساناعى-2021» اياسىندا جۇرگىزىلگەن ناقتىلاۋ جۇمىستارى اياقتالدى. نەگىزگى كەزەڭ جانە ناقتىلاۋ جۇمىستارى قورىتىندىسى بويىنشا ساۋالنامامەن 19,6 ميلليوننان اسا رەسپوندەنت قامتىلدى. بۇل كەزەڭدە قانداي دا ءبىر سەبەپتەرمەن ساناققا قاتىسا الماعان رەسپوندەنتتەرگە ارنايى sanaq.gov.kz سايتى, e-Gov پورتالى جانە Aitu ءموبيلدى قوسىمشاسى ارقىلى ساناق ساۋالدارىن تولتىرۋ مۇمكىندىگى بەرىلدى. بۇگىندە ۇلتتىق ستاتيستيكا بيۋروسى دەرەكتەردى وڭدەۋگە كىرىستى. جوسپارعا سايكەس اۋقىمدى ءىس-شارانىڭ الدىن الا قورىتىندىلارى بيىل جەلتوقسان ايىندا جاريالاناتىن بولادى.
ەستەرىڭىزگە سالا كەتەيىك, شارا اياسىندا ەلىمىزدە تۇراقتى تۇرىپ جاتقانداردان وزگە 12 ايدان اسا ۋاقىتقا شەتەلگە ىسساپارمەن شىققاندار (شەتەلدەگى ديپلوماتيالىق كورپۋس پەن قر وكىلدىگىنىڭ قىزمەتكەرلەرى مەن ولاردىڭ وتباسى مۇشەلەرى), كەلىسىمشارت نەگىزىندە ءبىر جىلدان كەم ۋاقىتقا باسقا ەلگە كەتكەن وتانداستارىمىز, وزگە مەملەكەتتە «بولاشاق» باعدارلاماسى اياسىندا ءبىلىم الىپ جاتقان ستۋدەنتتەر, ۋاقىتشا شەتەلگە شىققان تۋريستەر, ۋاقىتشا (12 ايدان از) ەلىمىزدە جۇرگەن شەتەلدىكتەر, ازاماتتىعى جوق ادامدار مەن بوسقىندار ساناقتان وتۋدە.
حالىق ساناعىن وتكىزۋ ادىستەمەسىنە سايكەس, ساۋالناما اياقتالعان سوڭ ناقتى جانە تۇرعىلىقتى حالىق سانى بويىنشا اقپارات الىناتىن بولادى. بۇل ساناتتار نەنى بىلدىرەدى؟ «ناقتى حالىق» دەگەنىمىز, ساناق وتكىزۋ كەزىندەگى بەلگىلى ءبىر ەلدى مەكەندەگى ادامداردىڭ سانىن بىلدىرەدى. بۇل ساناتقا تۇرعىلىقتى تۇرعىندارمەن قاتار, ۋاقىتشا كەلگەندەر مەن رەزيدەنت ەمەس تۇلعالار جاتقىزىلادى. ياعني, مۇندا ەلدى مەكەنگە قوناققا, دەمالۋعا, جۇمىس بابىمەن جانە ت. ب. ماقساتتا, سونداي-اق, ەلدە ۋاقىتشا جۇرگەن شەتەلدىكتەر, ازاماتتىعى جوق ادامدار مەن بوسقىندار قامتىلادى.
«تۇرعىلىقتى حالىق» دەگەن ساناتتا ەلدى مەكەندە تۇراقتى تۇرىپ جۇرگەندەرمەن قاتار, ۋاقىتشا باسقا جاققا شىعىپ كەتكەن ازاماتتار قامتىلادى. ولاردىڭ قاتارىنا باسقا ەلدى مەكەنگە نەمەسە شەتەلگە تۋىستارىنا, ەڭبەك دەمالىسىنا, جۇمىس بابىمەن نەمەسە باسقا دا سەبەپتەرمەن ۋاقىتشا كەتكەندەر كىرەدى. العاش رەت ساناق ساۋالدارى كەزىندە قاعاز تاسىمالداعىشتار تولىعىمەن الىنىپ تاستالدى. رەسپوندەنتتەرگە ارنايى sanaq.gov.kz سايتى, e-Gov پورتالى جانە Aitu ءموبيلدى قوسىمشاسى ارقىلى ساناق ساۋالدارىن تولتىرۋ مۇمكىندىگى بەرىلدى.
رەسپوندەنتتەردىڭ 42 پروتسەنتتەن استامى ونلاين-ساناق فۋنكتسياسىن پايدالاندى. اقىلى قىزمەت كورسەتۋ تۋرالى شارتقا سايكەس جۇمىس ىستەگەن ينتەرۆيۋەرلەر پلانشەتتەردى پايدالاندى.
