قازاقستاندىق جانە حالىقارالىق جۇگىرۋ مارافوندارىنا تۇراقتى قاتىساتىن سالتانات تۇيىتباەۆ اقش-تىڭ نيۋ-يورك قالاسىندا وتكەن حالىقارالىق مارافونىن دا قالت جىبەرمەي, كوپشىلىكپەن بىرگە 42 شاقىرىم 195 مەتردى جۇگىرىپ ءوتتى.
«نيۋ-يورك مارافونىنا قاتىسۋ ءاربىر مارافونشىنىڭ باستى ارمانى. سەبەبى, بۇل حالىقارالىق مارافونداردىڭ ىشىندەگى ەڭ بەدەلدىسى. وعان الەمنىڭ تۇكپىر-تۇكپىرىنەن شامامەن 50-52 مىڭ ادام قاتىسادى. مەن وسىدان 2 جىل بۇرىن امستەردامدا جۇگىرۋ مارافونىنان بىلىكتىلىكتى راستايتىن ءنورماتيۆتى تاپسىردىم, نورماتيۆ ناتيجەسى بەلگىلى بولعاننان كەيىن نيۋ-يوركتەگى جۇگىرۋ مارافونىن ۇيىمداستىرۋشىلارى مەنى قاتىسۋعا شاقىردى. بۇل مارافون بىلتىر ءوتۋى كەرەك ەدى, بىراق پاندەمياعا بايلانىستى كەيىنگە شەگەرىلدى. جالپى اتالعان جۇگىرۋ سايىسى جىل سايىن قاراشا ايىنىڭ العاشقى دەمالىسىندا وتەدى. شىنىمدى ايتسام, وسىعان دەيىن ءتۇرلى دەڭگەيدەگى 22 حالىقارالىق جۇگىرۋ مارافونىنا قاتىسسام دا, مۇنداي دارەجەلى مارافوندى ءالى كورگەن ەمەسپىن», دەپ اسەرىمەن ءبولىستى سالتانات تۇيتەباەۆ.
جۇگىرۋ سايىسىنىڭ ناتيجەلەرى ءالى بەلگىسىز.
«مارافون جاس ەرەكشەلىگىنە قاراي توپقا ءبولىنىپ ءوتتى. مەنىڭ جاسىم 76-دا, مەن 75 پەن 79 جاس ارالىعىنداعى مارافونشىلار ساناتى بويىنشا قاتىستىم. جۇگىرۋدىڭ ءوزى وڭايعا سوققان جوق, ويتكەنى بۇل مارافوننىڭ ءجونى مەن تالابى مۇلدەم باسقا. دەگەنمەن, قاتىسىپ كورگەنىمە قۋانىشتىمىن, ال ناتيجەسىن كورە جاتارمىز. تاعى ءبىر قۋانتارلىق جاعداي, وسىنداعى قازاق باۋىرلارىمىز مەنىڭ قاتىساتىنىمدى ءبىلىپ ماعان ۇلكەن قولداۋ كورسەتتى. ءوزىمىزدىڭ قازاقتىڭ بالالارى مارافون بىتكەن سوڭ مەنى كۇتىپ الىپ, گۇل شوعىن سىيلاپ, جىلى لەبىزدەرىن ءبىلدىردى», دەيدى جەلاياق قاريا.
