– ءوسىپ كەلە جاتقان تالاي تالانتتى جاستىڭ بويىنا قانات ءبىتىرىپ, قابىلەتىن دامىتىپ, كاسىبي ونەرگە قۇلاش سەرمەۋىنە كوپ ىقپال ەتكەن ءداستۇرلى بايقاۋ بۇعان دەيىن ەركىن تاقىرىپتا ءوتىپ كەلگەن ەدى, ال بيىل تاقىرىپ بەكىتىپ, ىبىراي اتامىزدىڭ 180 جىلدىعىنا ارنادىق. بايقاۋعا جۇزدەن استام اۆتورلىق تۋىندى كەلىپ ءتۇستى. بۇل دۇنيەلەردە ۇلى اعارتۋشىنىڭ كەسكىن-كەلبەتى سومدالىپ, ۇستازدىق قىزمەتىنىڭ ءتۇرلى كەزەڭى ايشىق تاپقان. ەڭ باستىسى, جەرگىلىكتى قىلقالام شەبەرلەرى, مۇسىنشىلەر مەن قولونەرشىلەر وزگە وڭىرلەردەگى ارىپتەستەرىمەن تاجىريبە الماسۋعا مۇمكىندىك الدى, – دەيدى وبلىستىق مادەنيەت باسقارماسىنىڭ باسشىسى ەرلان قالماقوۆ.
بايقاۋ جۇمىستارى كەسكىندەمە, گرافيكا, ءمۇسىن, ساندىك-قولدانبالى ونەر دەپ اتالاتىن ءتورت نوميناتسيا بويىنشا باعالاندى. قازىلار القاسىنىڭ قالاۋىمەن قوستاناي قالاسىنىڭ اتىنان شىققان جاس زەرگەر امانگەلدى اۋدانىنىڭ تۇرعىنى بەكزات مۇراتوۆ باس جۇلدەنى جەڭىپ الدى.
بايقاۋ جەڭىمپازدارىن وبلىس اكىمىنىڭ ورىنباسارى باقىت ەسىموۆا ارناي كەلىپ قۇتتىقتاپ, ديپلومدارمەن جانە اقشالاي سىيلىقتارمەن ماراپاتتادى. ماسەلەن, ليساكوۆ قالاسىنان كەلگەن 31 جاستاعى قىلقالام شەبەرى الينا نيكولەنكو ى. التىنسارين پورترەتىن ءساتتى سومداپ شىققانى ءۇشىن كەسكىندەمە اتالىمى بويىنشا جۇلدەلى ورىن الىپ, 150 مىڭ تەڭگەنىڭ سەرتيفيكاتىنا يە بولدى.
«جاس تولقىن» بايقاۋى ءوز مارەسىنە جەتكەنىمەن, مۋزەيدىڭ بەينەلەۋ ونەرى زالىنداعى كورمە ءالى ءبىر اپتا جۇمىس ىستەيتىن بولادى.
قوستاناي وبلىسى
