جۇما كۇنگى داۋىس بەرۋ ناتيجەسىندە قۇجاتتى 228 دەپۋتات قولداسا, 206-ى قارسى بولعان. ءسويتىپ, پرەزيدەنت دجو بايدەننىڭ تالايدان بەرى ايتىپ كەلگەن جوسپارى جۇزەگە استى. بۇل – دەموكراتتاردىڭ ۇلكەن جەڭىسى.
بايدەن اكىمشىلىگى ەندى امەريكانىڭ اۆتوموبيل جولدارىن, تەمىرجولدارىن جانە باسقا دا كولىك ينفراقۇرىلىمىن جاڭارتپاق. اق ءۇي باسشىسى جاڭا جۇمىس ورىندارىن قۇرۋعا جانە اقش-تىڭ باسەكەگە قابىلەتتىلىگىن ارتتىرۋعا ۋادە بەرگەن ەدى.
ايتسە دە, دەموكراتتار بايدەننىڭ ىشكى باعدارلاماسىنىڭ ەكىنشى باعىتى بويىنشا ءالى كوپ جۇمىس ىستەۋى كەرەك. اتاپ ايتقاندا, الەۋمەتتىك قاۋىپسىزدىك جەلىسىن كەڭەيتۋ جانە كليماتتىڭ وزگەرۋىمەن كۇرەسۋ باعدارلامالارىن كونگرەستە قابىلداۋعا كۇش سالۋى ءتيىس. باعاسى 1,75 تريلليون دوللاردى قۇرايتىن بۇل قۇجات اقش قاۋىپسىزدىك جەلىسىن 1960 جىلداردان كەيىن قايتا جاڭارتاتىن ەدى.
دەموكراتتار بۇل قۇجاتتى دا جۇما كۇنى تالقىلاۋعا شىعارۋعا ءتيىس-تۇعىن. بىراق ونىڭ قۇنىنا قاتىستى سۇراقتار تۋىنداعاندىقتان, زاڭ جوباسىن كەيىنگە قالدىردى. بۇل ماسەلەنىڭ انىق-قانىعىن ناقتىلاۋعا بىرنەشە اپتا كەتەدى.
ال ينفراقۇرىلىمعا قاتىستى قۇجاتتىڭ قابىلدانعانى بايدەننىڭ ابىرويىن وسىرەتىنى انىق. كونگرەسس وتىرىسىنان كەيىن اق ءۇي باسشىسى ارنايى مالىمدەمە جاساپ, ىسكە كىرىسەتىن ءسات كەلگەنىن جەتكىزدى.
بىرىككەن مەتاللۋرگيالىق كاسىپوداق زاڭ جوباسىنىڭ قابىلدانۋىن قۇپتادى. «وكىلدەر پالاتاسى ەلدىڭ ماڭىزدى ينفراقۇرىلىمىن جاڭارتۋعا شامامەن 1 تريلليون دوللار بولەتىن Infrastructure Bill زاڭىن قابىلدادى. بۇل ءبىز ءۇشىن ۇلكەن مامىلە, ويتكەنى بولات وڭدەۋشىلەر امەريكانى قامتاماسىز ەتەدى!» دەپ جازدى وداق تۋيتتەردەگى پاراقشاسىندا.
