اپات كەزىندە جەر استىندا 64 كەنشى بولعان ەكەن. ۆاسس كومىر كۇشتەرى قۇتقارۋ قىزمەتكەرلەرىنىڭ جانكەشتى ارەكەتىنىڭ ارقاسىندا 56 جۇمىسشى جەر ۇستىنە شىعارىلعان. ەكى كەنشى اۋىر جاعدايدا قاراعاندىداعى ح.ماقاجانوۆ اتىنداعى كوپبەيىندى اۋرۋحاناعا جەتكىزىلدى. گازدان قاتتى ۋلانعان ولاردىڭ ءومىرىن امان ساقتاپ قالۋ ءۇشىن دارىگەرلەر قولدان كەلگەن كومەكتىڭ ءبارىن جاساۋدا.
قاراعاندى وبلىسىنىڭ اكىمى جەڭىس قاسىمبەك قازا بولعان كەنشىلەردىڭ تۋىستارى مەن جاقىندارىنا كوڭىل ايتتى. جانە ءوڭىر باسشىسى ولاردىڭ وتباسىلارىنا قاجەتتى كومەكتىڭ كورسەتىلەتىنىن مالىمدەدى. سونداي-اق جەڭىس قاسىمبەك سول كۇنى «اباي» شاحتاسىنداعى قايعىلى وقيعا بويىنشا كەڭەس وتكىزدى. جيىندا «ارسەلورميتتال تەمىرتاۋ» اق كومىر دەپارتامەنتىنىڭ ديرەكتورى اندرەي چەرنوماز جانە باسقا دا جاۋاپتى قىزمەتكەرلەر اپاتتى وقيعانىڭ بارىسى تۋرالى باياندادى. وقيعا بويىنشا قۇرامىنا كومپانيا مەن مەملەكەتتىك ورگاندار وكىلدەرى ەنگەن جەدەل شتاب قۇرىلدى. وبلىستىڭ جانە كومپانيانىڭ باسشىلىعى قازا بولعان كەنشىلەردىڭ ۇيىنە بارىپ, كوڭىل ايتتى.
سونداي-اق پرەمەر-مينيستر اسقار ءماميننىڭ تاپسىرماسى بويىنشا مەملەكەتتىك كوميسسيا قۇرىلدى. توتەنشە جاعداي ءمينيسترى يۋري يلين جەتەكشىلىك ەتەتىن بۇل كوميسسيا اپاتتىڭ سەبەپ-سالدارىن انىقتايدى. «اباي» شاحتاسىندا بولعان كومىر مەن گازدىڭ كەنەتتەن اتىلۋ وقيعاسىنا بايلانىستى قىلمىستىق كودەكستىڭ 277-بابىنىڭ 3-تارماعىنا سايكەس سوتقا دەيىنگى تەرگەۋ باستالدى.
قاراعاندى وبلىسى
