اعالار جايلى ايتىلا قالعاندا, نەگە ەكەنى, كوز الدىمىزعا قىرعا شىعىپ, قيىرعا كوز سالىپ تۇرعان جاننىڭ بەينەسى كەلە قالاتىنى بار عوي. مىنە, وسى ءبىر قازاقى قالىپ, تىنىشتىق كۇيى – قازىعۇرتتان شىعىپ, قازاق دالاسىن قاراشىعىنا سىيدىرا العان, قالامىنىڭ ۇشىنا قوندىرا بىلگەن ساۋكەڭنىڭ, ساۋىتبەك ابدراحمانوۆتىڭ دا ءوز قالپى, تابيعاتى, مىنەز-قۇلقى, بوياماسىز بولمىسى. ونىڭ تۇلا بويىنان وسى ءبىر تىنىشتىقتىڭ رۋحى سەزىلىپ تۇراتىنىن ءبىرىنشى ايتقان ءبىز ەمەس. سول رەتتە, سوڭعىسى دا ءبىز بولا قويماسپىز. نەگە دەسەڭىز, سول تىنىشتىق كۇيدىڭ تەتەلەس تۋىستارى – ورنىقتىلىق, تۇراقتىلىق, سابىرلىلىق, تاباندىلىق, قوڭىرلىق, اسىپ-تاسپايتىن, اپتىعىپ سويلەمەيتىن, القىنىپ تۇرمايتىن ساۋىتبەك ابدراحمانوۆتىڭ قاي ىسىنەن, قاي سوزىنەن دە كورىنەتىنىنە كوپشىلىك ابدەن قانىق قوي دەپ ويلايمىن. ءاسىلى, كوركەم مىنەزدىلىك دەگەنىمىزدىڭ ءوزى دە وسى شىعار.
ساۋىتبەك ابدراحمانوۆتىڭ سۇحباتتارىن پاراقتاي باستاعاننان-اق, ساۋلەلى ءبىر شاقتاردا ساۋكەڭمەن سويلەسىپ وتىرعانداي كۇي كەشىرەسىز. ول ءسوز – وتىز جىلدا ورنىققان, شاڭىراعىن كوتەرىپ, كەرەگەسىن كەڭ سالىپ, ىرگەسىن بەكىتكەن, باعدارىن ايقىنداپ, بولاشاققا بەت تۇزگەن ەلىمىزدىڭ ەل باستاعان كوسەمى, ەرەن قالپى, ەڭبەكشىل حالقى, ەرتەڭشىل ازاماتى تۋرالى ءسوز. ول ءسوز – تاۋەلسىزدىكتىڭ تۇتاس تاريحى جايلى تولعاقتى, تولىمدى, تولىققاندى تولعام. كەشەگى كۇندەردىڭ كوركەم شەجىرەسىنە كوز سالعانداي بولاسىز. ەرتەمەن كەلىپ ەسىك قاعاتىن «ەگەمەن قازاقستان» گازەتىنىڭ بەتتەرىن تاعى ءبىر اشقاندايسىز. ساتۋىتبەك اعانىڭ سىرلى سۇحباتتارىنىڭ ءبارى دە كەيىنگى جىلداردىڭ كولەمىندە گازەتىمىزدىڭ بەتىندە جارىق كورگەن, جىلدار جىلناماسىنداي جاريالانىپ وتىرعان, وقىرمانىن ويلاندىرعان سۇحباتتار.
سوندىقتان بۇل سۇحبات جانرىنىڭ, جالپى سۇحبات قۇرۋدىڭ نازىك قىرى مەن سىرىن تانىتۋمەن قاتار, الەمدىك دەڭگەيدەگى ساياساتكەرلەردىڭ, ادامزات مادەنيەتىنە ۇلەس قوسقان تۇلعالاردىڭ پايىمدى پىكىرلەرى ارقىلى سۇحبات الۋشىنىڭ دا حالىقارالىق ساياساتتان, الەمدىك مادەنيەتتەن تامىر تارتقان پاراسات-پايىمىن ايشىقتاي تۇسەدى دەپ بىلەمىن.
وسى سۇحباتتاردىڭ ەرەكشەلىگىن سۇحبات جانرىنداعى ساۋىتبەك ابدراحمانوۆتىڭ ءستيلى, ساۋكەڭنىڭ سالتى دەپ اتاۋعا دا بولادى. ول دەگەنىمىز كوزگە بىردەن تۇسەتىن ساۋاتتىلىق, كوڭىلگە سەزىلەتىن سالماقتىلىق, سۇحبات بەرۋشىنىڭ ويىن وقۋشىلىق, جان دۇنيەسىندەگى جىلت ەتكەن قۇبىلىستى جازباي تانۋشىلىق, كوتەرىپ وتىرعان ماسەلەسىن كوش ىلگەرى بىلۋشىلىك, ءسوز سۇيىلتپاۋ, پىكىر تاڭباۋ, ءوزىن تىقپالاماۋ, ورە جارىستىرىپ, ولەرمەندىككە بارماۋ. مىنە, وسىدان كەلىپ پافوسسىز پايىم تۋادى. ناقتىلىق كورىنەدى. اقىل تانىلادى. سىرلى سۇحباتتار ارقىلى ادامنىڭ سىر-ساندىعى اشىلادى.
سوندىقتان دا بولار, وسى سۇحباتتاردىڭ دەنى وقىرماننىڭ جادىنا جاتتالىپ قالعان. ونداعى ايتىلعان پىكىر, كوتەرىلگەن ماسەلە, قوزعالعان جايتتىڭ كوبى ءالى دە اينالىمدا ءجۇر. ءالى كۇنگە سولارعا سىلتەمە جاسالادى.
ءاۋ باستان-اق باسپاسوزدە تانىمدىق دۇنيەلەرىمەن وقىرماننىڭ ىقىلاسىنا بولەنگەن ساۋىتبەك اعامىز ءوزى ەڭبەك جولىن باستاعان «سق»-نىڭ مۇراگەرى «ەگەمەن قازاقستان» گازەتىنىڭ باسشىلىعىنا كەلگەن سوڭ ەكىنشى تىنىسى اشىلىپ, كەڭىنەن كوسىلگەن ەدى. شىعارماشىلىعى, ينتەللەكتۋالدىق الەۋەتى, قايراتكەرلىك قارىمى دا وسى سۇيىكتى «ەگەمەن قازاقستانىندا» قىزمەت اتقارعان كەزەڭدە جارقىراي كورىنىپ, تۇتاستاي سالانىڭ جاۋاپكەرشىلىگىن ارقالاعان مينيسترلىك مانساپقا, بۇگىنگى حالىق قالاۋلىلارىنىڭ قاتارىنا – ەلدىكتىڭ ءسوزى ايتىلاتىن بيىك مىنبەرگە, دەپۋتاتتىق دارگەيگە جەتكىزگەنى زاڭدىلىق. وسى جىلدار بەدەرىندە جۋرناليستىك قابىلەتىن قارىمدى قالامگەرلىك ساپادان قاجىرلى عالىمدىق دەڭگەيگە ۇشتاستىرعان ساۋىتبەك ابدراحمانوۆتىڭ مادەنيەتتانۋشى, زەرتتەۋشى, اۋدارماشى, پۋبليتسيست رەتىندە بويىنا جيناعان مول ءبىلىمىن قالام قۋاتى ارقىلى ۇلت رۋحانياتىنا سۇبەلى قازىنا قىلىپ قوستى. الەم ادەبيەتىنەن, تورتكۇل دۇنيە وركەنيەتىنەن جان-جاقتى حاباردارلىعى ادامزاتتىق مادەنيەتتە وزىندىك ورنى بار تۇلعالارمەن ەمىن-ەركىن اڭگىمە-دۇكەن قۇرىپ, ولاردىڭ وزىق ويلارىمەن قازاق قاۋىمىن تانىستىرۋعا ۇيىتقى بولدى.
قايبىر جىلى ساۋكەڭ «جيىرماسىنشى عاسىر جىرلايدى» دەگەن اتپەن قازاق پوەزياسىنىڭ قوس تومدىق ينتەرانتولوگياسىن قۇراستىرىپ شىعارعان ەدى. مۇنىڭ سول تۇستا پىكىر تۋدىرعان, قىزىعۋشىلىقتى وياتقان, ەلدى ەلەڭ ەتكىزگەن جاڭالىق بولعانىن ايتا كەتۋمىز كەرەك. ولەڭ دۇنيەسىنەن وزىنە ۇناعان, كوڭىلىن قوزعاعان, جۇرەگىنە جاقىن جىرلارىن ىرىكتەپ الىپ, ىزگى نيەتتى وقىرمانعا ىزەتپەن ۇسىنعانى بار.
ايتقانداي, ساۋكەڭنىڭ وسىنداي اۋقىمدى ءىستى اتقارۋىنا ءوزى ۇلگى تۇتقان كورنەكتى جازۋشى ءابىش كەكىلباەۆ سەبەپكەر بولعان ەكەن. سوناۋ جەتپىسىنشى جىلدارى كينوكوميتەتتە قاتار قىزمەت ەتىپ جۇرگەن كەزىندە ابىز اعا قازاق جىرىنىڭ قادىر-قاسيەتى تۋرالى ءوزارا اڭگىمە بارىسىندا قازاق پوەزياسىنىڭ انتولوگياسىن قۇراستىرۋ جونىندە ايتىپتى. ال «ەگەمەن قازاقستانعا» باسشىلىققا كەلگەن تۇسىندا: «ال ەندى گازەت قولىڭدا. باياعى ايتقان شارۋانى قولعا المايسىڭ با؟» دەيدى. وسىلايشا ساۋىتبەك ابدراحمانوۆ ادەبيەت زەرتتەۋشىسى رەتىندە ەل گازەتىنىڭ وقىرماندارىن قازاق پوەزياسىنىڭ جاۋھارلارىمەن تانىستىرۋدى قولعا الىپ, قازاق ادەبيەتىنىڭ قورجىنىن سالماقتاندىرا تۇسكەن ەدى. بۇل – رۋحانيات جوقشىسىنىڭ ەل ءۇشىن اتقارعان ەسەلى ەڭبەگىنىڭ, جارقىن جوبالارىنىڭ ءبىرى عانا. بۇدان باسقا دا وقىرمانعا جول تارتقان كىتاپتارى وقىرمان سورەسىنەن ءوز ورنىن العان.
شىنايى ينتەلليگەنت, زياتكەر تۇلعا, قارىمدى قالامگەر, شەبەر ۇيىمداستىرۋشى, كورگەنى دە, بەرگەنى دە مول جاقسى اعامىز ءوزىنىڭ سالعان ونەگەلى جولىمەن جەتپىستىڭ جوتاسىنا دا شىقتى. جاي شىققان جوق, جارقىن بەينەسىمەن, جايدارى قالپىمەن, رۋحانيات كەرۋەنىنە ارتقان جۇگىمەن, ۇرپاققا سالعان ۇلاعاتىمەن شىقتى. مەزىرەتتى مەزەتتە مەملەكەت باسشىسىنىڭ قولىنان اباي اتىنداعى مەملەكەتتىك سىيلىقتى الدى. اعامىزدىڭ مەرەيتويى قۇتتى, مەرەيى ۇستەم بولا بەرسىن!
