وبلىستىق پوليتسيا دەپارتامەنتىنىڭ مالىمدەۋىنشە, اققۋلى اۋدانىنىڭ پوليتسەيلەرى «ەرتىس ورمانى» رمم قىزمەتكەرلەرىن 1 ملن تەڭگەگە جۋىق قاراعاي تۇرىندەگى قۋراعان اعاشتاردى زاڭسىز كەستى جانە ۇرلادى دەگەن كۇدىكپەن ۇستادى.
«رەيدتىك ءىس-شارالار بارىسىندا پوليتسەيلەر شاكين اۋىلدىق وكرۋگىندە بەلگىسىز تۇلعالاردىڭ بايمبەت ورمانشىلىعى اۋماعىندا ءارتۇرلى ورامداردا 18,25 تەكشە مەتر كولەمىندە قاراعاي تۇرىندەگى قۋراعان اعاشتاردى زاڭسىز كەسكەندەرىن جانە اكەتكەندەرىن انىقتادى. جۇك كولىگىنىڭ ىزدەرى پوليتسيا قىزمەتكەرلەرىن كورشى وبلىستاعى اۋىلداردىڭ بىرىنە اپاردى. اۋىلدى ارالاۋ كەزىندە پوليتسەيلەر اۋلاسىنا ورمان اعاشتارى جينالعان ءۇيدى تاپتى. بۇلار زاڭسىز كەسۋ ورنىندا تابىلعان اعاشتارعا ۇقساس بولدى. سونداي-اق, ءۇيدىڭ اۋلاسىندا اعاش وڭدەۋگە ارنالعان ارالاۋ قۇرىلعىسى ورنالاسقان», دەدى دەپارتامەنتتە.
زاڭسىز اعاش كەسۋ فاكتىسى شارباقتى اۋدانىندا دا انىقتالدى. ورمان ۇرلادى دەگەن كۇدىكپەن 36 جاستاعى پاۆلودارلىق انىقتالىپ, ۇستالدى. ول شالداي اۋىلدىق وكرۋگىنىڭ سادىق-اششى اۋىلىنىڭ جانىنداعى ورمان القابىندا قۇرعاق جانە دىمقىل وسكەن ورماندى زاڭسىز كەسىپ تاستاعان.
شىعىن سوماسى 1 ملن تەڭگەدەن استى. پوليتسيا ەكى فاكتى بويىنشا قازاقستان رەسپۋبليكاسى قك 340-بابى بويىنشا سوتقا دەيىنگى تەرگەۋ جۇرگىزۋدە. ايتا كەتەيىك, جىل باسىنان بەرى پاۆلودارلىق پوليتسەيلەر ورماندى زاڭسىز كەسۋ مەن ۇرلاۋدىڭ 35 فاكتىسىن انىقتادى.
