قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان ءىس-شارا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى, «ەلباسى ااكادەمياسى» كورپوراتيۆتىك قورى, قازاقستان رەسپۋبليكاسىنىڭ سىرتقى ىستەر مينيسترلىگى جانە قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگىمەن بىرلەسە ۇيىمداستىرىلدى.
كونفەرەنتسيانىڭ ماقساتى – تۇركى وركەنيەتىنىڭ تاريحي-مادەني جانە رۋحاني مۇراسىن جاڭعىرتۋ ۇدەرىستەرىن, ەلباسىنىڭ تۇركى حالىقتارىنىڭ بىرلىگىنە قوسقان ۇلەسى مەن ءرولىن, تۇركى الەمى ينتەگراتسياسىن دامىتۋدى تالقىلاۋ.
كونفەرەنتسياعا قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىسى ابزال ساپاربەك ۇلى مودەراتورلىق ەتتى. قاتىسۋشىلار تۇركى تاريحى مەن مادەنيەتىن ودان ءارى زەردەلەۋ, ىلگەرىلەتۋ, ناسيحاتتاۋ بويىنشا ءوزارا پىكىر الماستى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى باقىتجان تەمىربولات ءوز سوزىندە: «قازاقستان مەن تۇركيانىڭ باۋىرلاستىعى ءححى عاسىردا تۇركى يدەياسىنىڭ جاڭعىرۋىنا جانە تۇركى كەڭەسىنىڭ قۇرىلۋىنا نەگىز بولدى. ناتيجەسىندە ازەربايجان, قازاقستان, قىرعىزستان, وزبەكستان, تۇركيا ەلدەرى تىعىز ىنتىماقتاستىقتى قايتا جانداندىردى. بيىلعى ناۋرىزدا وتكەن تۇركى كەڭەسىنىڭ وتىرىسىندا تۇركىستان قالاسىن تۇركى الەمىنىڭ رۋحاني استاناسى دەپ تانۋ تۋرالى دەكلاراتسيانىڭ قابىلدانۋى ايرىقشا وقيعاعا اينالدى. ءسامميتتىڭ قورىتىندىسى بويىنشا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ «تۇركى وركەنيەتى دامۋىنىڭ جاڭا كەزەڭى باستالعانىنا» سەنىم ءبىلدىردى. وسىنىڭ العاشقى بەلگىلەرىنە ءبارىمىز كۋا بولىپ وتىرمىز», دەپ اتاپ ءوتتى.
«2009 جىلى نازارباەۆتىڭ باستاماسىمەن تۇركى كەڭەسى قۇرىلدى. قازاقستان مەن تۇركيا – ەجەلدەن بەرى ىنتىماقتاسقان, باۋىرلاستىق قارىم-قاتىناس ورناتقان مەملەكەتتەر. بۇل كورمە ءبىزدىڭ ىنتىماقتاستىعىمىزدى جالعاستىرۋ ءۇشىن ۇيىمداستىرىلدى», – دەدى تۇركيا پرەزيدەنتى اكىمشىلىگى جانىنداعى ۇلتتىق كىتاپحانانىڭ ديرەكتورى ايحان تۋگلۋ.
كونفەرەنتسيادا تۇركسوي باس حاتشىسى دۇيسەن قاسەيىنوۆ بايانداما جاسادى: «وتىز جىل – ادام عۇمىرىمەن ساناعاندا ۇزاق مەرزىم, الايدا مەملەكەت عۇمىرىندا قىسقا كەزەڭ. دەسە دە بۇل ۋاقىتتىڭ ىشىندە قازاقستان مەن تۇركى الەمى زامان تالابىنا ساي ءبىر قاتار ماڭىزدى جۇمىستاردى اتقاردى. بۇل جەتىستىكتەرگە ەگەمەن مەملەكەتتى تولىق قۇرۋ, ۇلتتىق مادەنيەتتى جاڭعىرتۋ, ۇلتتىق بىرەگەيلىكتى قالىپتاستىرۋ, حالىقارالىق قوعامعا قوسىلۋ جاتادى. سونىڭ ارقاسىندا سوڭعى 30 جىل تۇركى الەمىندەگى ىنتىماقتاستىق پەن ينتەگراتسيا سالاسىنىڭ جەمىسىنە تولى بولدى».
«قاي زاماندا بولسىن, قوعامنىڭ قوزعاۋشى كۇشى – جاس ورەندەر. الەم بويىنشا تۇركى حالىقتارىنىڭ سانى 200 ميلليون بولسا, ونىڭ 30 ميلليونعا جۋىعى – جاستار. وسى ورايدا ەلباسى ن.ءا. نازارباەۆتىڭ جاستارعا ۇسىنعان «ەل ءۇمىتى» باستاماسى تۇركى دۇنيەتانىمىنا نەگىزدەلگەن. باستاما اياسىندا نۇرسۇلتان نازارباەۆ قورى مەن ەلباسى اكادەمياسى باۋىرلاس حالىقتاردىڭ قارىم-قاتىناسىن نىعايتۋ ماقساتىندا جاستاردى تامىرى ورتاق تۇركى ەلىنىڭ مادەنيەتىمەن تانىستىرىپ, تۇركىتىلدەس مەملەكەتتەردىڭ تاريحي تۇلعالارىن, ولاردىڭ ءومىر جولىن, عىلىم مەن ونەرگە, ادەبيەتكە قوسقان ۇلەسىن ايقىنداۋ شارالارىن ۇيىمداستىرۋدى كوزدەيدى», دەدى ءوز بايانداماسىندا «ەلباسى اكادەمياسى» كورپوراتيۆتىك قورىنىڭ باسقارۋشى ديرەكتورى انۋار جانعوزين.
سونداي-اق كونفەرەنتسيادا حالىقارالىق تۇركى اكادەمياسىنىڭ ۆيتسە-پرەزيدەنتى فيزۋلي مەدجيدلي بايانداما جاسادى.
كونفەرەنتسيا قورىتىندىسى بويىنشا ەلباسى كىتاپحاناسى تۇركيا پرەزيدەنتى اكىمشىلىگى جانىنداعى ۇلتتىق كىتاپحاناسىمەن مەموراندۋمعا قول قويدى.
