«ەلدەگى ەكونوميكالىق جاعداي مەن ۇلتتىق مۇددەلەر بارلىق اۋعاندىقتاردان ساۋدادا وتاندىق ۆاليۋتانى قولدانۋدى تالاپ ەتەدى», دەيدى تاليباندار.
«تاليبان» بيلىكتى ءوز قولىنا العاننان كەيىن حالىقارالىق قارجىلىق قولداۋدىڭ توقتاتىلۋىنا بايلانىستى ەلدەگى ەكونوميكالىق جاعداي تىعىرىققا تىرەلگەن.
وسىعان دەيىن اقش دوللارى اۋعانستان نارىعىندا كەڭىنەن قولدانىلىپ كەلگەن. سونداي-اق دوللار پاكىستان سياقتى اۋعانستاننىڭ كورشىلەرىمەن شەكارالاس اۋدان-
داردا ساۋدا جاساۋ ءۇشىن دە ءجيى قولدانىستا بولعان.
«يسلام امىرلىگى بارلىق ازاماتتارعا, دۇكەن يەلەرىنە, ساۋداگەرلەرگە, كاسىپكەرلەرگە جانە جالپى جۇرتشىلىققا اۋعانستاننىڭ بارلىق قارجىلىق وپەراتسيالارىن جالعاستىرۋعا جانە شەتەل ۆاليۋتاسىن پايدالانۋدان قاتاڭ باس تارتۋعا نۇسقاۋ بەرەدى», دەدى «تاليبان» وكىلى زابيحۋللا مۋجاحيدا ينتەرنەتتە جاريالاعان مالىمدەمەسىندە. ال بۇيرىقتى ورىنداماعان كەز كەلگەن ادام سوت الدىندا جاۋاپقا تارتىلادى.
تامىز ايىندا «تاليبان» بيلىگى ەلدى باقىلاۋعا العاننان كەيىن, اقش فەدەرالدى رەزەرۆتىك جۇيەسى مەن ەۋروپانىڭ ورتالىق بانكتەرى اۋعانستاننىڭ شەتەلدىك اكتيۆتەرىن, ياعني ميللياردتاعان دوللارىن «قاتىرىپ» قويعان. ال تاليباندار ەلدە قولما-قول اقشا تاپشىلىعىنا تاپ بولعاندا, شەتەلدە ساقتالعان اۋعانستان اكتيۆتەرىن بوساتۋدى تالاپ ەتكەن.
اۋعانستان, سونداي-اق شەتەلدىك كومەك پەن قايىرىمدىلىق جوبالارىنان دا ايىرىلدى. شەتەلدەن كەلگەن گرانتتار بۇعان دەيىن مەملەكەتتىك شىعىنداردىڭ تورتتەن ءۇشىن قارجىلاندىرىپ كەلگەن ەكەن.
وسى جىلدىڭ باسىندا حالىقارالىق ۆاليۋتا قورى (IMF) اۋعانستان بۇدان بىلاي ءوز رەسۋرستارىنا قول جەتكىزە المايتىنىن مالىمدەدى, ال دۇنيەجۇزىلىك بانك ەلدەگى جوبالاردى قارجىلاندىرۋدى توقتاتقان.
