قوعام • 04 قاراشا, 2021

جۇرگىزۋشى كۋالىگىن الۋ: ەمتيحاننان 2 مىڭ ادامنىڭ 30-ى عانا ءوتتى

1443 رەت
كورسەتىلدى
2 مين
وقۋ ءۇشىن

نۇر-سۇلتاندا جۇرگىزۋشى كۋالىگىن الۋعا قۇجات تاپسىرعان 2 مىڭنان استام ادامنىڭ تەك 30-ى عانا ەميحاندى ءساتتى تاپسىرعان. بۇل تۋرالى بۇگىن ءوزىنىڭ Facebook پاراقشاسىندا قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين جازدى, دەپ حابارلايدى Egemen.kz.

جۇرگىزۋشى كۋالىگىن الۋ: ەمتيحاننان 2 مىڭ ادامنىڭ 30-ى عانا ءوتتى

«بريفينگ بارىسىندا جۋرناليستەرگە اۆتو حقكو قىزمەتىن تەكسەرۋ ءۇشىن قىركۇيەكتە جاسىرىن, ياعني قاراپايىم كليەنت رەتىندە جۇرگىزۋشى كۋالىگىن الۋعا بارىپ, ءبىراز زاڭسىزدىقتارعا تاپ بولعانىمدى ايتقان ەدىم. كەيىن وسى تەكسەرىستىڭ ناتيجەسىمەن بولىسۋگە ءسوز بەردىم. «ازاماتتارعا ارنالعان ۇكىمەتتەگى» ىشكى قاۋىپسىزدىك قىزمەتىنىڭ ماماندارى جاساعان ۆيدەونىڭ نەگىزىندە وسى ماڭىزدى ماسەلە بويىنشا شۇعىل ءىس-شارالار قولعا الىندى. قازىرگى تاڭدا مەملەكەتتىك كورپوراتسياداعى ارىپتەستەرىم كۇللى ەل بويىنشا باقىلاۋ جۇمىستارىن كۇشەيتكەندىكتەن, مۇنداي جاعدايلار باسقا دا ايماقتاردا انىقتالىپ جاتىر.

بۇل باعىتتاعى بارلىق ماتەريالدار قۇقىق قورعاۋ ورگاندارىنا جولدانادى. تەكسەرىس باستالعاننان بەرى كۇندەلىكتى ستاتيستيكاعا كوز جۇگىرتىپ وتىرامىن. «پراۆاعا» پراكتيكالىق جانە تەوريالىق ەمتيحاندى ءساتتى تاپسىرعانداردىڭ سانى بىردەن ازايعانىن بايقاۋعا بولادى.

ماسەلەن, نۇر-سۇلتان قالاسىندا سوڭعى ەكى اپتادا جۇرگىزۋشى كۋالىگىن الۋ بويىنشا 2160 ءوتىنىش تۇسكەن, سونىڭ ىشىندە تەك 30 ادام عانا سىناقتان سۇرىنبەي وتكەن. الداعى ۋاقىتتا بارلىق مامانداندىرىلعان حقكو-دا تەوريالىق ەمتيحاندى تاپسىرۋ كەزىندە تۇلعانى ارنايى بيومەتريالىق تانۋ جۇيەسىن ەنگىزەمىز», دەيدى مينيستر.

ونىڭ سوزىنشە, بۇل جۇيە سىناققا كەلگەن ادامنىڭ جەكە تۇلعاسىن انىقتاپ, تەست تاپسىرۋشىلاردى كەزدەيسوق ورىنعا جايعاستىرۋعا مۇمكىندىك بەرەدى. ءار جۇمىس ورنىنا كامەرا ورناتىلادى.

مۇنداي جۇيە قازىر پيلوتتىق تارتىپتە قولدانىلىپ جاتىر. «ەگەر ءسىز مەملەكەتتىك كورپوراتسيا قىزمەتكەرلەرى تاراپىنان سىبايلاس جەمقورلىق ارەكەتتەرىن بايقاساڭىز نەمەسە باسقا دا زاڭبۇزۋشىلىقتارعا تاپ بولساڭىز, +7 700 710 14 14, 8 (7172) 95 51 14 سەنىم تەلەفوندارىنا حابارلاسىڭىز», دەلىنگەن حابارلامادا.

سوڭعى جاڭالىقتار