وسى جىلدىڭ قىركۇيەك ايىندا قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى ديسسەرتاتسيالىق كەڭەستەردىڭ جۇمىسىنا وسى جىلدىڭ ناۋرىز ايىندا بەكىتىلگەن جاڭا فورمات بويىنشا تالداۋ جۇرگىزدى.
تەكسەرۋ بارىسىندا كەيبىر جوعارى وقۋ ورىندارىنىڭ ديسسەرتاتسيالىق كەڭەستەرى جۇمىستى ۇيىمداستىرۋ كەزىندە بۇزۋشىلىقتارعا جول بەرەتىنى انىقتالدى.
«كەڭەستەردە قالىپتاستىرىلعان دوكتورانتۋرانىڭ جەكە ءبىلىم بەرۋ باعدارلامالارىنىڭ اككرەديتتەلۋى جوق. بىرقاتار ۋنيۆەرسيتەتتەردە كەڭەستىڭ تۇراقتى قۇرامى بەكىتىلمەگەن, كەڭەس قۇرامىندا ۋاقىتشا مۇشەلەردىڭ 50%-ى بولۋى جونىندەگى تالاپ ساقتالمايدى. بىرقاتار ديسسوۆەتتەردە رەسمي رەتسەنزەنتتەردىڭ, ديسسوۆەت مۇشەلەرىنىڭ عىلىمي جۇمىستى باعالاۋى فورمالدى سيپاتقا يە. ودان بولەك, جۇمىس مازمۇنىنا تولىق تالداۋ جاسالمايدى», دەپ اتاپ ءوتتى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
ەسكە سالا كەتسەك, وسى جىلدىڭ ناۋرىز ايىندا ديسسەرتاتسيالىق كەڭەستەردىڭ جۇمىس ىستەۋى بويىنشا جاڭا تالاپتار زاڭنامالىق تۇردە بەكىتىلگەن بولاتىن. ولاردىڭ اراسىندا ديسسەرتاتسيانىڭ تاقىرىبى بويىنشا مامان بولىپ تابىلاتىن ۋاقىتشا مۇشەلەردىڭ, رەتسەنزەنتتەردىڭ داۋىس بەرۋگە قاتىسۋى جانە ولار ءۇشىن شەكتەۋلەر تۋرالى ەرەجەلەر بار. سونداي-اق قورعاۋ ناتيجەلەرى بويىنشا كەڭەستەرگە ديسسەرتاتسيالىق جۇمىستى پىسىقتاۋعا نەمەسە قايتا قورعاۋعا جىبەرۋ تۋرالى شەشىم قابىلداۋعا مۇمكىندىك بەرىلدى.
