ەلدىك پەن ەرلىكتەن سىر شەرتەتىن كورمە

ايبىنى اسقاق ۇلى جەڭىستىڭ 65 جىلدىق مەرەيتويىنا بايلانىستى كەشە قازاقستان رەسپۋبليكاسىنىڭ ۇلتتىق مۇراعاتىندا “ ۇلى وتان سوعىسى جىلدارىنداعى قازاقستاندىقتار” اتتى قۇجاتتار كورمەسى اشىلدى. “قازاقستان رەسپۋبليكاسىنىڭ ارداگەرلەر ۇيىمى” قوعام­دىق بىرلەستىگىمەن بىرلەسىپ اشىلعان كورمەگە مايدانگەرلەردىڭ قۇجاتتارى, “قالاي, امان-ساۋ جاقسى ءجۇرىپ جاتىرسىز با؟” دەپ باستالاتىن اماندىق حاتتارى, سۋرەتتەرى مەن ماراپات قاعازدارى قويىلعان. كورمەنىڭ سالتاناتتى اشىلۋ راسىمىنەن بۇرىن جينالعان جۇرتشىلىقتىڭ نازارىنا ۇلى وتان سوعىسىنا بايلانىستى قىسقا مەتراجدى دەرەكتى فيلم ۇسىنىلدى. سۇم سوعىستى تەك ەكراننان كورىپ وتىرعاندارىنا شۇكىرشىلىك ەتكەندەر بەيبىت كۇننىڭ قانشالىقتى قىمبات ەكەنىن جانارلارى تولى جاستارىمەن ايقىن اڭعارتقانداي ەدى. فيلم كورسەتىلگەننەن كەيىن ورتاعا بايلا­نىس جانە اقپارات مينيسترلىگىنىڭ اقپارات جانە مۇراعات كوميتەتى توراعاسىنىڭ ورىنباسارى ەربول شايمەردەن شىعىپ, مايدان ارداگەر­لەرىن كەلە جاتقان ۇلى جەڭىستىڭ 65 جىلدى­عىمەن قۇتتىقتادى. ول ءوز سوزىندە: “ ۇلى جەڭىس كۇنى – ەرەكشە كۇن. بۇل كۇن – ۇلتىمىزدىڭ ەرلىك رۋحىنا تاعزىم ەتەتىن كۇن. بۇل كۇن – كوزى ءتىرى سوعىس ارداگەرلەرىنە قۇرمەت كورسەتەتىن كۇن. مۇنداي كورمەلەر تەك استانادا عانا ەمەس, ەلىمىزدىڭ بارلىق ايماقتارىندا اشىلىپ جاتقانى بەلگىلى. ەكىنشى دۇنيەجۇزىلىك سوعىس – ادامزات تاريحىنداعى ەڭ ءبىر اۋىر, قاسىرەتى مول سوعىس. قان جۇتقان كەڭەس جاۋىنگەرلەرىنىڭ قاتارىندا قازاقستاندىقتار دا قاھارماندىقپەن سوعىستى. ولاردىڭ ەرلىگى ارقاشان ۇرپاققا ۇران بولىپ قالماق. مايدان­گەرلەردىڭ پەرزەنتتەرى رەتىندە سوعىستىڭ قاسىرە­تىن, جەڭىستىڭ ۇلىلىعىن بارشامىز جاقسى بىلەمىز. بۇگىنگى ورتامىزدا جۇرگەن ارداگەرلەرگە كورسەتەتىن ىستىق ىقىلاس­تارىمىز بەن ىزگى ءىلتيپات­تارىمىز ەشۋاقىتتا دا ازايماق ەمەس”, – دەدى. “سوعىس وسىلاي باستالىپ ەدى...”, “قازاق­ستاندىقتار ۇلى وتان سوعىسى مايدانىندا”, ء“بارى مايدان ءۇشىن, ءبارى جەڭىس ءۇشىن!”, “ۆەلي­كي پودۆيگ ۆاش يستوريا حرانيت”, “تاريحتا قالعان ۇلى ەرلىكتەر” اتتى تاقىرىپتىق-ەكسپوزيتسيالىق بولىمدەردەن تۇراتىن كورمەگە سونداي-اق مايدان­دا جاۋىنگەرلىك تاپسىرما­لاردى ۇلگىلى ورىندا­عاندارى ءۇشىن جانە باتىر­لىق پەن باتىلدىق كورسەتكەندەرى ءۇشىن كەڭەس وداعىنىڭ باتىرى اتانعان قازاقستاندىقتار­دىڭ جاۋىنگەرلىك جولى تۋرالى باياندالاتىن “قازاقستاندىق كەڭەس وداعىنىڭ باتىرلارى” اتتى كىتاپ قويىلعان. كورمەدە كوزىمىزگە كەيبىر حاتتار ەرەكشە ءتۇستى. ماسەلەن, اتاقتى گۆارديالىق ديۆيزيانىڭ كومانديرى, گەنەرال-مايور يۆان پانفيلوۆ جۇبايىنا جازعان حاتىندا بىلاي دەيدى: “امانسىڭ با, قىمباتتىم! ءوزىڭ مەن بالالاردى ءسۇيدىم. ماسكەۋدى جاۋعا بەرمەيمىز! جاۋىزداردى تانكتەرىمەن قوسا جەرمەن جەكسەن ەتەمىز. ديۆيزيا جاقسى سوققى بەرۋدە. گازەتكە شىققان ماقالانى جولداپ وتىرمىن. مۋروچكا, جاتپاي-تۇرماي جۇمىس ىستەپ, تىلدى نىعايتىڭدار. سەنىڭ اماناتىڭدى ايبىندىلىقپەن ورىنداۋدامىن. پانفيلوۆ. 1941 جىلدىڭ 1 جەلتوقسانى”. قارىنداشپەن جازىلسا دا جازۋى انىق كورىنەتىن حاتتى وقىعاندا جۇرەگىمىز شىمىر ەتە ءتۇستى. كورمەگە قازاقستان رەسپۋبليكاسىنىڭ ۇلت­تىق مۇراعاتى قورىنان, اقپارات جانە مۇراعات­تار كوميتەتىنىڭ ورتالىق مەملەكەتتىك مۇرا­عاتىنان, استانا, الماتى قالالارى, الماتى, اقتوبە, اتىراۋ, شىعىس قازاقستان جانە باسقا دا وبلىستاردىڭ مۇراعاتتىق مەكەمەلەرىنەن, رەسپۋبليكانىڭ ارداگەرلەر ۇيىمىنان تاڭداپ, ىرىكتەلىپ الىنعان 200-دەن استام قۇجاتتار مەن ماتەريالدار قويىلعان. ولار كورمەگە كەلگەن قاۋىمعا ۇلى جەڭىستىڭ, بەيبىتشىلىكتىڭ قادىرىن ودان ارمەن بىلدىرە تۇسەتىنىنە سەنىمدىمىز. اراي ۇيرەنىشبەكقىزى.