دارىگەرلەردىڭ ايتۋىنشا, ديۋشەن ميوديستروفياسى – سيرەك كەزدەسەتىن گەنەتيكالىق اۋرۋ. تۇقىم قۋالايتىن قاۋىپتى دەرت بالاعا كوبىنە اناسىنىڭ قانى ارقىلى وتەدى ەكەن. مۇنداي اۋرۋعا ۇشىراعان ءسابيدىڭ بۇلشىق ەتتەرى بىرتىندەپ جانسىزدانا بەرەدى.
تاياۋدا عانا وبلىستىق دەنساۋلىق ساقتاۋ باسقارماسى جۇماعۇل داستان, باقداۋلەت قازىباي, اسپانتاي ءالىمباي ەسىمدى ناۋقاس بالالار ءۇشىن ارنايى «ەتەپليرسەن» ءدارىسىنىڭ 91 قۇتىسىن ساتىپ الدى. باسقارمانىڭ مالىمەتىنشە, ءۇش بالاقايدىڭ ەمىنە جەتەتىن ءدارى-دارمەككە 235,7 ملن تەڭگە كەتكەن. اتا-انالار سارىلىپ كۇتكەن باعالى ءدارى قوستانايعا قاراشانىڭ ورتاسىنا تامان جەتكىزىلۋى ءتيىس ەدى, الايدا بەلگىلەنگەن مەرزىمنەن ەداۋىر ەرتە كەلدى.
ماسەلەن, قىمبات ءدارىنىڭ ءبىرىنشى فلاكونى اسپانتايدىڭ اناسى ماقپال نىعمەتجانوۆانىڭ قولىنا قازاننىڭ 27-ءسى كۇنى تيگەن. ءدارى كەلىسىمەن ءۇش بالا اتا-انالارىمەن بىرگە نۇر-سۇلتان قالاسىنداعى انا مەن بالا ورتالىعىنا بارىپ, العاشقى سيستەماسىن الۋعا كىرىستى. ءموپ-ءمولدىر قاراشىعىنداعى كۇلكىنىڭ ورنىن مۇڭ باسقان قارشاداي بالانىڭ سەمىپ بارا جاتقان ومىرىنە تامىزدىق بولاتىن تامىر تامشىلارىنىڭ قالعانىن دارىگەرلەر قوستانايدا تامىزادى. اتا-انالاردىڭ ايتۋىنشا, بالاقايلاردىڭ ۇشەۋى دە ءبىرىنشى سيستەمالارىن جەڭىل ەڭسەرگەن.
– دارىگەرلەر ءدارى بىردەن اسەر ەتپەيدى دەيدى. شيپاسى بىرتە-بىرتە بىلىنە باستايدى ەكەن. ەڭ باستىسى, ءدارى قابىلداعالى, بالالارىمىزدىڭ جاعدايى جاقسارىپ, كوڭىل كۇيى كوتەرىڭكى. بۇلشىق ەتتەرى دە تەز السىرەمەيتىن بولدى. الايدا بۇل ءدارى-دارمەكتەر ءۇش-اق ايعا جەتەدى. ءماسليحات الداعى جىلعا دا قارجى قاراستىرىپ, قامقورلىق تانىتادى دەپ ۇمىتتەنەمىز, – دەدى م.نىعمەتجانوۆا.
وبلىستىق دەنساۋلىق ساقتاۋ باسقارماسى, بۇدان وزگە ارقا بۇلشىق ەتتەرى سەمىپ بارا جاتقان تاعى ءۇش بالاعا 12 قۇتى «نۋسينەرسەن» ءدارىسىن ساتىپ الۋ ءۇشىن 506,9 ملن تەڭگە بولىنگەنىن مالىمدەدى.
ارقا بۇلشىق ەتتەرى ارتروفياسىمەن اۋىراتىن كىشكەنتاي ميحايلدىڭ اكەسى الەكساندر گورپەنكو بالاسىنىڭ ەمى 22 قاراشادان باستالاتىنىن ايتتى.
– ۇلىمدى ەمدەۋ ءۇشىن نۇر-سۇلتان قالاسىنان ارنايى ماماندار كەلەدى. ەمدەۋ شارالارى قوستانايدا وتەدى. دارىگەرلەردى تاعاتسىزدانا كۇتىپ وتىرمىز, – دەدى ا.گورپەنكو.
سيرەك كەزدەسەتىن دەرتكە شالدىققان سوڭعى ءۇش بالانىڭ بىرەۋىنە قاجەت ءدارى-دارمەكتى تاۋىپ بەرۋدى «ومىرگە سەن» قورى ءوز مىندەتىنە الىپ وتىر.
