بۇدان جيىرما جىلدان استام بۇرىن سول كەزدەگى ىشكى ىستەر ءمينيسترى قايىربەك سۇلەيمەنوۆ گەنەرالدىق ءمۋنديرىن شەشىپ تاستاپ, كادىمگى جولاۋشى كەيپىنە ەنىپ, جەمىس تولى جۇك اۆتوموبيلىمەن وزبەكستان شەكاراسىنان الماتىعا دەيىن جاسىرىن تەكسەرۋ جورىعىن جاساعانى جادىمىزدا. جولشىباي ءوز قاراماعىنداعى مەملەكەتتىك اۆتوينسپەكتسيا قىزمەتكەرلەرىنىڭ پاراقورلىعىنا كوز جەتكىزگەن مينيستر ىلە ءتيىستى شارالاردى قولدانعاندىقتان, جول بويىنداعى جۇگەنسىزدىك ءبىراز ۋاقىت سايابىرسىعان. الايدا كەيىن «كون قۇرىسسا, قالپىنا بارادى» دەگەندەي, ماي ينسپەكتورلارى ەسكى «انىنە» قايتا باسقان. مۇنى قايىربەك شوشان ۇلى سياقتى قۇپيا تەكسەرىس جۇرگىزگەن بەلگىلى جۋرناليستەر بەيسەن قۇرانبەك پەن ەرجان سۇلەيمەنوۆ جاسىرىن كامەراعا ءتۇسىرىپ, اشكەرەلەگەن بولاتىن. ولار الماتى مەن شىمكەنت قالالارى اراسىندا قاتىنايتىن اۆتوبۋس جۇرگىزۋشىلەرىنەن ستاتسيونارلىق بەكەتتەردە جول پوليتسەيلەرىمەن سىبايلاسقان بىرەۋلەر «ەكى جاققا دا ءتيىمدى الىم» جينايتىندىقتان, سالىنباعان ايىپپۇل ەسەبىنەن مەملەكەت قازىناسى اي سايىن ونداعان ميلليون تەڭگەدەن قاعىلاتىنىن ايتىپ, دابىل قاققان. وسىنداي ءبىر رەتتىك تەكسەرىستەر ءجوندى ناتيجە بەرمەيتىنىن تۇسىنگەن ءىىم باسشىلىعى كەيىن كۇرە جولداردىڭ بويىنداعى سىبايلاس جەمقورلىق ۇياسىنا اينالعان ستاتسيونارلىق بەكەتتەردىڭ كوبىن الىپ تاستاۋ تۋرالى شەشىمگە كەلگەنى ءمالىم.
جاقىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين ءوزى مامانداندىرىلعان حالىققا قىزمەت كورسەتۋ ورتالىعىنا ەشكىمگە جاريالاماي, جۇرگىزۋشى كۋالىگىن الۋ ءۇشىن ەمتيحان تاپسىراتىن قاراپايىم ازامات رەتىندە بارعانىندا الدىنان قۇراق ۇشىپ قارسى العان «كومەكتەسكىش» دەلدالدار شىعا كەلگەنىن جۋرناليستەر الدىندا اشىق ايتتى. سولار ارقىلى ەمتيحان تاپسىرماي-اق جۇرگىزۋشى كۋالىگىن الۋعا بولاتىنىنا كوزىن جەتكىزگەن مينيستر ەندى حالىققا قىزمەت كورسەتۋ ورتالىقتارىنىڭ جۇمىسىنا باقىلاۋدى كۇشەيتۋدى ۇيعاردى. ۆەدومستۆو باسشىسى جول قوزعالىسى ەرەجەلەرىنەن حابارى شامالى ادامداردىڭ كولىك جۇرگىزۋ قۇقىعىنا يە بولىپ, وزىنە جانە وزگە جولاۋشىلارعا ۇلكەن قاۋىپ تۋعىزىپ وتىرعاندىعىنىڭ كىلتيپانى جۇرگىزۋشى كۋالىگىن الۋ ءۇشىن ەمتيحان تاپسىرۋ ءتارتىبىن بۇزۋدا ەكەنىن انىقتاعان. ياعني ولار ءۇشىن باسقا بىرەۋلەردىڭ ەمتيحان تاپسىرۋىنا جول بەرىلىپ كەلگەن. سوندىقتان مينيسترلىك الداعى ۋاقىتتا جۇرگىزۋشى كۋالىگىن الۋ ءۇشىن تەوريالىق ەمتيحان تاپسىرۋ كابينەتتەرىنە بيومەتريالىق سايكەستەندىرۋ قۇرالدارىن ورناتپاقشى. وعان دەيىن باعدات مۋسين حالىققا قىزمەت كورسەتۋ ورتالىقتارىن قۇپيا تەكسەرۋدى جالعاستىرا بەرمەكشى.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترىنىڭ وسى باستاماسى قازىر قوعامداعى قىزۋ اڭگىمەگە ارقاۋ بولىپ, قولداۋ تاۋىپ وتىر. سونىمەن قاتار جۇرتشىلىق تاراپىنان «نەگە باسقا مينيسترلەر مەن اكىمدەر دە كوزبوياۋشىلىقتى دوعارىپ, شىنايى جاعدايدى ءبىلىپ, ءتيىستى دەن قويۋ شارالارىن قابىلدامايدى؟» دەگەن ساۋال دا تۋىنداپ تۇر.
شىنىندا دا, وڭىرلەرگە قىزمەت بابىمەن بارعان مينيسترلەر دە, اۋدانداردى ارالاعان وبلىس اكىمدەرى دە كوبىنەسە الدىن الا كەلىسىلگەن «ستسەناريلەر» بويىنشا وزدەرىندەي مارتەبەلى مەيماندارعا كورسەتۋگە ادەيىلەپ دايىندالعان وبەكتىلەرگە عانا ات باسىن بۇرىپ, تاڭ-تاماشا بولىپ جۇرەتىنى جاسىرىن ەمەس. وسى رەتتە كەزىندە ءبىر وبلىس باسشىسىنىڭ رەسپۋبليكالىق سەمينار وتكىزۋگە دايىندىق جونىندەگى جيىندى قورىتىندىلاي كەلە: «سىزدەر مۇنى كوزبوياۋشىلىق دەپ ويلاماڭىزدار, بۇل – ءبىزدىڭ قولىمىزدان نە كەلەتىنىن كورسەتۋ», دەپ كۇلگەنى ەسىمىزگە ءتۇستى. وسىلايشا, «جاماندىقتى جاسىرىپ, جاقسىلىقتى اسىرۋدى» شەنەۋنىكتەردىڭ كوبى ادەتكە اينالدىرعان سياقتى. ال مۇنداي كوزبوياۋشىلىقتى قۇپ كورمەي, قاسىنا ءتىپتى كومەكشىسىن دە ەرتپەستەن, جالعىز جۇرگىزۋشىسىمەن بىرگە شالعايداعى شارۋاشىلىقتاردى ارالاپ, كوزىنە تۇسكەن كەمشىلىكتەردى دەرەۋ تۇزەتكەن كەيبىر بەدەلدى باسشىلار جايلى اڭىزعا بەرگىسىز اڭگىمەلەر ءالى كۇنگە ەل اۋزىندا ءجۇر.
