تەمىرتاس قارسىلاسىن جەڭە الا ما؟
ءبىرىنشى بولىپ شارشى الاڭعا كوتەرىلەتىن 48 كيلو سالماقتاعى ۇكىلى ءۇمىتىمىز تەمىرتاس ءجۇسىپوۆتىڭ فينالعا شىعۋعا مۇمكىندىگى مول. بۇل الەم چەمپيوناتى تەمىرتاس ءۇشىن سوڭعى جارىس بولۋى ىقتيمال. 33 جاستاعى تاجىريبەلى بوكسشى مۇنى جاقسى تۇسىنەدى. ونىڭ قارسىلاسى – بەلارۋس بوكسشىسى يوحاني كارمەلچۋك. ارينە, جارتىلاي فينالعا جەتكەن بەلارۋس بوكسشىسى وڭاي شاعىلاتىن جاڭعاق ەمەس. الايدا تالاي جارىستا شىڭدالعان تەمىرتاس بارلىق تەحنيكالىق ارسەنالىن كورسەتىپ, قاجەت كەزدە ەكىنشى نومىردە جۇدىرىقتاسىپ, جەڭىسكە جەتەدى دەگەن ويدامىز. ءبىر انىعى تەمىرتاس ءجۇسىپوۆ بەلگرادتان التىنمەن قايتۋعا بار كۇشىن سالادى. بۇيىرا ما, جوق پا؟ ۋاقىت كورسەتەدى.
بيبوسىنوۆ سوزىندە تۇرسا دەيمىز
وليمپيادا ويىندارىنىڭ قولا جۇلدەگەرى, 51 كيلو سالماقتاعى ساڭلاعىمىز ساكەن بيبوسىنوۆ جارتىلاي فينالدا تايلاندتىق زانارات ساەندجفەتپەن قولعاپ تۇيىستىرەدى. تايلاند جىگىتى مىقتى دايىندىقپەن كەلگەن. بيبوسىنوۆتىڭ ساق بوكستاسقانى, قورعانىستى نىعىرلاعانى, ارا قاشىقتىقتى دۇرىس ۇستاي بىلگەنى دۇرىس. ساكەن كەيدە شوۋ جاساعىسى كەلىپ, ويناقتاپ كەتەدى. قارسىلاسىن ءارى-بەرى اينالدىرىپ ءجۇرىپ, قاجەت كەزىندە سوققىلارىن دارىتا بىلسە, جەڭىس ساكەن جاقتا بولاتىنى ءسوزسىز. تەك, ورتادا تىك تۇرىپ توبەلەسپەسە بولعانى. ءبىر انىعى ول وليمپياداداعى قولا جۇلدەسىنە الەم چەمپيوناتىنىڭ التىنىن قوسقىسى كەلەدى. ءوزى سولاي دەگەن. سوزىندە تۇرسا, شىركىن.
سابىرحانعا سابىر كەرەك
54 كيلو سالماقتاعى ماحمۇد سابىرحان الەم چەمپيوناتىندا تاماشا بوكس كورسەتىپ ءجۇر. ونىڭ وقتاۋلى قولى قارسىلاستارىن قايمىقتىراتىنى ءسوزسىز. ءوزى «جانىپ» كەتپەسە, ءۇندى جىگىتى اكاش كۋمار قازاق وعلانىنىڭ جىلدامدىعىنا ىلەسە المايدى. ونىڭ ۇستىنە وسى الەم چەمپيوناتىندا ەڭ كوپ سوققى جۇمساۋىمەن دارالانعان دا ءبىزدىڭ سابىرحان. دالدىك تۇرعىسىنان دا ماحمۇدتىڭ مىسى باسىم. ساۋاتتى جۇدىرىقتاسسا, الەم چەمپيونى اتانۋعا ەڭ لايىقتى بوكسشىمىز دا وسى جىگىت.
سەرىككە وڭاي سوقپايدى
ارينە, بولماعاندى بولجاۋدىڭ قاجەتى جوق. ايتسە دە, 57 كيلو سالماقتاعى سەرىك تەمىرجانوۆتىڭ فينالعا جولداما الۋى قيىن دەپ پايىمدايمىز. قارسىلاسى – كۋبالىق گارسيا كابالەررو. كۋبالىق بوكسشىلار قورعانا ءجۇرىپ, وتكىر شابۋىلدار ۇيىمداستىراتىنىن ەسكەرسەك, باسىمدىقتى سالعان جەردەن قولعا الۋعا تىرىساتىن سەرىكتىڭ اشىق قالاتىن تۇسى كوپ ەكەنىن باعامداساق, جەڭىسكە جەتۋ قيىنداي تۇسپەك. بىزدىڭشە سەرىككە بۇيىراتىنى – الەم چەمپيوناتىنىڭ قولا مەدالى. ءسوزىمىزدى جوققا شىعارسا, بەك قۋانامىز.
ابىلايحان اباي بولسا دەيمىز
ۇلتتىق قۇرامانىڭ كاپيتانى ابىلايحان ءجۇسىپوۆ جارتىلاي فينالدا جاپون جىگىتى سەۆونرەتس وكازاۆامەن قولعاپ تۇيىستىرەدى. جاپون بوكسشىسى ارتىق ەشنارسە ويلاپ تاپپايدى. ەكىنشى نومىردە جۇدىرىقتاسادى. ابىلايحاننىڭ ءمۇلت كەتكەن تۇسىن ۇتىمدى پايدالانىپ, قارسى سوققىلارىن ءدوپ تيگىزۋگە تىرىسادى. سوندىقتان ابىلايحان ساق بولۋى كەرەك. قارسىلاستىڭ قورعانىسى وسال ەمەس. شابۋىلى دا جاقسى. ارينە, ءبىز ابىلايحانعا سەنەمىز. ول الەم چەمپيوناتىنىڭ «ماڭگىلىك» قولا جۇلدەگەرى بولماۋ ءۇشىن (ەكى رەت قولا العان) بارىن سالار...
قىسقاسى, بىزدىڭشە الەم چەمپيوناتىنىڭ فينالىندا ءتورت قازاق بوكسشىسى ەل نامىسىن قورعاۋى مۇمكىن. سولاردىڭ ەكەۋى التىن جۇلدە السا – تاماشا تابىس. التىن مەدال سانى ودان اسىپ جاتسا, بەك قۋانىشتى بولامىز!
