تەرگەپ-تەكسەرۋ جۇمىستارىن جۇرگىزۋ بارىسىندا جابىرلەنۋشى اۆتوكولىكتى ساتاتىن سايتتان كولىكتى تاڭداپ وتىرىپ, حابارلاندىرۋدان 12 ملن تەڭگەگە «تويوتا كامري 70» ماركالى اۆتوكولىگى ساتىلىمدا تۇرعانىن كورگەنى انىقتالعان. ساتۋشى اقشا قاتتى قاجەت ەتەتىندىكتەن كولىكتى ارزان باعامەن بەرەتىنىن تۇسىندىرگەن. كەيىن ولار كەزدەسىپ كولىكتى كورىپ شىعىپ, 11 ملن 700 مىڭ تەڭگەگە كەلىسەدى دە, جابىرلەنۋشى ساتىپ الۋدى شەشەدى. كۇدىكتى ساتىپ الۋشىدان 11 ملن تەڭگەنى الىپ, كولىكتىڭ كىلتىن تابىستاپ, تولىق ەسەپتەسكەننەن سوڭ كولىكتىڭ قۇجاتتارىن رەسىمدەۋگە ۋادە بەرەدى.
سودان اتالعان اۆتوكولىكتىڭ جالعا الىنعانى, ياعني الاياق ونى جالعا الىپ كەيىن ساتۋ تۋرالى حابارلاندىرۋعا بەرگەنى انىقتالعان.
جەدەل-ىزدەستىرۋ ءىس-شارالارىن جۇرگىزۋ بارىسىندا ەلوردالىق پوليتسەيلەر 36 جاستاعى كۇدىكتىنى الماتى قالاسىنان ۇستاپ, ۋاقىتشا ۇستاۋ يزولياتورىنا قاماۋعا العان. قر قك 190-بابى بويىنشا سوتقا دەيىنگى تەرگەۋ امالدارى جۇرگىزىلۋدە. قازىرگى ۋاقىتتا پوليتسەيلەر زارداپ شەككەندەردىڭ سانىن انىقتاپ جاتىر.
پوليتسيا دەپارتامەنتى ازاماتتاردى قىراعى بولۋعا شاقىرادى. جەكە تۇلعالاردان اۆتوكولىك ساتىپ العاندا, قۇقىق بەلگىلەۋشى قۇجاتتاردى تەكسەرۋ قاجەت ەكەنىن ەسكەرتەدى.
