بۇرىندارى عالىمداردىڭ قاتىسۋىمەن وتەتىن ءاربىر كەزدەسۋدە عىلىمي زەرتتەۋلەردى قارجىلاندىرۋ مەرزىمىن 3 جىلدان 5 جىلعا دەيىن ۇلعايتۋ ماسەلەلەرى كوتەرىلەتىن ەدى.
«جالاقىنى بازالىق قارجىلاندىرۋ تەتىگىنە تەك باسشىلار مەن كومەكشى قىزمەتكەرلەردى عانا ەمەس, سونىمەن بىرگە عىلىمي قىزمەتكەرلەردى دە قوسۋ قاجەتتىلىگى تۋرالى ماسەلە جىلدار بويى كوتەرىلەتىن. گۋمانيتارلىق بەيىندەگى عالىمدارىمىز (قازاق ادەبيەتى, ءتىل ءبىلىمى, قازاقستان تاريحى, ارحەولوگيا, فيلوسوفيا جانە ت.ب.) وسى باعىتتاردى قارجىلاندىرۋ ماسەلەسىنە ەرەكشە نازار اۋدارۋ قاجەت ەكەندىگىن 10 جىلدان استام ۋاقىتتان بەرى ايتىپ كەلەدى. ەندىگى كەزەكتە پرەزيدەنتتىڭ تىكەلەي قولداۋىنىڭ ارقاسىندا جانە قازاقستان حالقىنا جولداۋىندا ايتىلعان تاپسىرمالارىنىڭ ناتيجەسىندە اتالعان ماسەلەلەردىڭ بارلىعى ۇكىمەتتىڭ باستاماشىلىق ەتۋىمەن ءارى پارلامەنت دەپۋتاتتارىنىڭ قولداۋىمەن قابىلدانعان جاڭا تۇزەتۋلەردە ءوز شەشىمىن تاپتى. قىسقا مەرزىم ىشىندە قاجەتتى تۇزەتۋلەر ازىرلەنىپ, پارلامەنتتىڭ قاراۋىنا ەنگىزىلدى», دەپ جازدى مينيستر.
جاڭا نورمالار مەملەكەت باسشىسى زاڭ جوباسىنا قول قويعاننان كەيىن كەلەسى جىلدان باستاپ زاڭدى كۇشىنە ەنەدى.
«بۇل دەگەنىمىز, كەم دەگەندە 1600 عالىم بازالىق قارجىلاندىرۋ شەڭبەرىندە تۇراقتى نەگىزدە جالاقى الا باستايدى. ال, گۋمانيتارلىق بەيىندەگى ينستيتۋتتار تىكەلەي قارجىلاندىرۋ شەڭبەرىندە تەك گرانتتىق جوبالارعا عانا تاۋەلدى بولماي, كەرىسىنشە ءوز باعىتتارى بويىنشا زەرتتەۋلەر جۇرگىزۋ ءۇشىن تۇراقتى قارجىلاندىرىلاتىن بولادى. سونىمەن قاتار عىلىمي قاۋىمداستىق كوپتەگەن جىلدار بويى ۇلتتىق عىلىمي كەڭەستەر جۇمىسىنىڭ وبەكتيۆتىلىگىن ارتتىرۋعا ۇمتىلىپ كەلەدى. ويتكەنى بيۋدجەتتىك قارجىلاندىرۋ تۋرالى شەشىمدى عىلىمي كەڭەستەر قابىلدايدى. سوڭعى ەكى جىلدا اتالعان كەڭەستەردىڭ جۇمىسىندا ايتارلىقتاي وڭ وزگەرىستەر ورىن الدى. ۇلتتىق عىلىمي كەڭەس شەشىمدەرىنىڭ بارىنشا نەگىزدىلىگى مەن وبەكتيۆتىلىگىن قامتاماسىز ەتۋ ءۇشىن زاڭ جۇزىندە اپەللياتسيالىق كوميسسيا ەنگىزىلىپ جاتىر. كوميسسيا ۇلتتىق عىلىمي كەڭەس شەشىمدەرىنە قاتىستى عالىمداردىڭ اپەللياتسيالارى مەن ادەپ كودەكسىن ساقتاۋ ماسەلەلەرىن قاراستىراتىن بولادى», دەپ جازىلعان اسحات ايماعامبەتوۆتىڭ جازباسىندا.
