ونەر مەكتەبىندە وتكەن سالتاناتتى شاراعا ونەرپازدىڭ جۇبايى نۇربيكە مەن ۇلى سەرىك, سونداي-اق س.اۋباكىر ۇلىنىڭ كوزىن كورگەن ارىپتەس-زامانداستارى مەن شاكىرتتەرى قاتىستى.
1974 جىلى امانگەلدى اۋداندىق مۋزىكا مەكتەبى اشىلعاندا, العاشقىلاردىڭ ءبىرى بولىپ قىزمەتكە كەلگەن ۇستازداردىڭ ءبىرى ساندىبەك اۋباكىر ۇلى ەدى. كەيىن وسى مەكتەپتە ءبىراز جىل باسشىلىق ەتىپ, جاس ۇرپاقتى ونەرگە باۋلۋعا كوپ ەڭبەك ءسىڭىردى. اۋداندا «زامانا بۇلبۇلدارى» اتتى انسامبل قۇرىپ, ءوڭىر مادەنيەتىنىڭ وركەندەۋىنە زور ۇلەس قوستى.
سالتاناتتى شارا بارىسىندا ونەرپازدىڭ شاكىرتتەرى ۇستازدارىنىڭ جارقىن بەينەسى مەن ونەگە-ءتالىمى تۋرالى ساعىنىشقا تولى ەستەلىكتەر ايتتى.
– مەن 1989 جىلى ت.ەلتەباەۆ اتىنداعى مۋزىكا مەكتەبىنە بايان سىنىبىن وقۋعا تۇسكەن كەزدە ساندىبەك ۇستازىمىز مۋزىكا مەكتەبىنىڭ ديرەكتورى, ال نۇربيكە اپايىمىز بايان سىنىبىندا وقىتۋشى بولاتىن. ساندىبەك اۋباكىر ۇلى مەن مەنىڭ اكەم مارقۇم قابدۋالي دوس, قۇرداس, كەرەمەت جولداس بولاتىن! ەكەۋى ەلىمىزدىڭ قالالارىن, اۋداندارىن تالاي رەت گاسترولدىك ساپارمەن ارالاپ, شەتەلدەرگە دەيىن بارىپ قايتتى. ومىردە دە, ونەردە دە جۇپ جازباي قاتار جۇرەتىن. بۇگىنگى اشىلىپ جاتقان بايان مەكتەبى جاستار ءۇشىن جاسالىپ جاتقان يگى ءىس دەپ بىلەمىن, – دەدى امانگەلدى اۋداندىق مۋزىكا مەكتەبىنىڭ تۇلەگى سامال احمەتجانوۆا.
بايان سىنىبىنىڭ اشىلۋ راسىمىندە ساندىبەك اۋباكىر ۇلىنىڭ ءومىرى مەن ۇستازدىق قىزمەتى, شىعارماشىلىعى تۋرالى كوپتەگەن ەستەلىكتەر ايتىلدى. جينالعان كوپشىلىك, اسىرەسە, نۇر-سۇلتان قالاسىنان كەلگەن ارداگەر ۇستاز اقشاگۇل مۇقانوۆانىڭ, الما دوسىمبەكوۆا مەن ونەرپازدىڭ ۇلى سەرىك ساندىبەك ۇلىنىڭ اڭگىمەلەرىن قىزىعا تىڭدادى.
سونداي-اق سەرىك ساندىبەك ۇلى مەكتەپكە جاڭا سىنىپقا قاجەت ساز اسپاپتارى مەن اكەسى تۋرالى جازىلعان «ساۋلەلى عۇمىر» اتتى كىتابىن تارتۋ ەتتى. ءراسىم سوڭى مەكتەپ وقۋشىلارىنىڭ مەرەكەلىك كونتسەرتىنە ۇلاستى.
قوستاناي وبلىسى
