ءبىلىم جانە عىلىم ءمينيسترىنىڭ ءبىرىنشى ورىنباسارى شولپان كارينوۆانىڭ ايتۋىنشا, بۇگىندە ەلىمىزدە 770 كوللەدج جۇمىس ىستەسە, ونىڭ 424-ءى مەملەكەتتىك جانە 346-سى جەكەمەنشىك. بۇل رەتتە 180 كوللەدج «جاس مامان» جوباسى اياسىندا زاماناۋي جابدىقتارمەن قامتاماسىز ەتىلگەن, ال مەملەكەتتىك كوللەدجدەردىڭ شامامەن 50%-ى توزىعى جەتكەن جابدىقتاردى پايدالانادى. «مامان تاپشىلىعى – وزەكتى ماسەلە. قازىرگى ۋاقىتتا تجكبب ۇيىمدارىندا 40 مىڭعا جۋىق پەداگوگ, ونىڭ ىشىندە 5,2 مىڭ وندىرىستىك وقىتۋ شەبەرى جۇمىس ىستەيدى. مامان تاپشىلىعى 2,4 مىڭ ادامدى قۇرايدى. سونىمەن قاتار كادرلاردىڭ قارتايۋى بايقالادى, پەداگوگتەردىڭ 30%-دان استامى – 55 جاستان اسقان ادامدار», دەدى ول.
مينيسترلىك وكىلى تجكبب جۇيەسىندە قارجىلاندىرۋدىڭ جاڭا مودەلىن ەنگىزۋ جوسپارلانعانىن, ول كوللەدجدىڭ ەرەكشەلىگىن ەسكەرە وتىرىپ, جان باسىنا شاققانداعى قارجىلاندىرۋ ءنورماتيۆىن سارالاۋعا باعىتتالاتىنىن ايتتى.
ءوز كەزەگىندە كەڭەس توراعاسى, ءماجىلىس دەپۋتاتى جۇلدىز سۇلەيمەنوۆا ۆەدومستۆو مالىمەتتەرىندەگى سايكەسسىزدىكتەردى اتاپ ءوتتى. «وسى جىلدىڭ ءساۋىر ايىندا بىزگە جان باسىنا شاققانداعى قارجىلاندىرۋ ءنورماتيۆى 310-نان 630 مىڭعا دەيىنگى ارالىقتا اۋىتقىپ تۇرعانىن ايتقان ەدى, ال قازىر بۇل سوما باسقا. بىزدەگى قۇجاتتار دا, ساندار دا ءارتۇرلى», دەدى جۇلدىز سۇلەيمەنوۆا ءبىلىم مينيسترلىگىنىڭ وكىلىنە.
كوللەدج تۇلەكتەرىن جۇمىسقا ورنالاستىرۋ ەرەكشەلىگىنە قاتىستى ماسەلەنى كەڭەس مۇشەسى, «اتامەكەن» ۇكپ توراعاسىنىڭ ورىنباسارى ولجاس ورداباەۆ كوتەردى. ونىڭ ايتۋىنشا, كوللەدج تۇلەكتەرىنىڭ شامامەن 60%-ى ماماندىعى بويىنشا جۇمىس ىستەمەيدى. «تۇلەكتەردىڭ 27%-ى
1 جىل بويى جۇمىس تاپپاعان, ال العان بىلىكتىلىگىنە سايكەس تەك 13%-ى جۇمىس ىستەيدى. تجكبب ۇيىمدارىنداعى ءبىلىم بەرۋ باعدارلامالارىنىڭ 80%-عا جۋىعى ەڭبەك نارىعىنىڭ تالاپتارىنا سايكەس كەلمەيتىندىگىنە نازار اۋدارعىم كەلەدى. حالىقارالىق سەرتيفيكاتتاۋ باعدارلامالارىنا قاراعاندا كوللەدج ديپلومدارىنا سۇرانىس از. ءبىز 25 مىڭعا جۋىق كومپانيادا ساۋالناما جۇرگىزدىك, ولاردىڭ 53%-ىنا كوللەدج تۇلەكتەرى, 21%-ىنا جوعارى وقۋ ورىندارىن بىتىرگەندەر, ال 26%-ىنا قىسقا مەرزىمدى دايىندىقتان وتكەندەر قاجەت», دەدى ولجاس ورداباەۆ.
كەڭەس مۇشەسى, «ەڭبەك رەسۋرستارىن دامىتۋ ورتالىعى» اق پرەزيدەنتى داۋلەت ارعىندىقوۆ ورتا مەرزىمدى كەزەڭگە ارنالعان ماماندارعا دەگەن قاجەتتىلىك بولجامىن العا تارتتى. «2021-2025 جىلدارى كادرلارعا دەگەن جالپى قاجەتتىلىك
1 ملن ادامنان اسادى. نەگىزگى سۇرانىس ءبىلىم بەرۋ سالاسىندا, شامامەن 200 مىڭ ادام نەمەسە 18,5% بولادى. ەڭ الدىمەن, باستاۋىش سىنىپ مۇعالىمدەرى, سونىمەن قاتار ورتا سىنىپتار ءۇشىن ءپان مۇعالىمدەرىنە سۇرانىس كوپ. قازىرگى ۋاقىتتا نارىقتا 18 مىڭعا جۋىق پەداگوگيكالىق بوس جۇمىس ورنى بار», دەدى ول.
جيىن قورىتىندىسى بويىنشا كەڭەس ءبىلىم جانە عىلىم مينيسترلىگىنە بىرقاتار ۇسىنىم ازىرلەدى. اتاپ ايتقاندا, اۋىلدىق ەلدى مەكەندەردىڭ دامۋ پەرسپەكتيۆالارىن ەسكەرە وتىرىپ, جۇمىس ىستەپ تۇرعان كوللەدجدەر جەلىسىنە تالداۋ جۇرگىزۋ, سونداي-اق اۋىلدىق جانە شاعىن جيناقتالعان كوللەدجدەر ءۇشىن جان باسىنا قارجىلاندىرۋدىڭ قوسىمشا كوەففيتسيەنتى ماسەلەسىن پىسىقتاۋ قاجەت.
بۇدان باسقا, مينيسترلىككە ۇلتتىق بىلىكتىلىك جۇيەسىن قالىپتاستىرۋ جانە ەڭبەك نارىعىندا سۇرانىسقا يە كادرلاردى دايارلاۋ ءۇشىن تەحنيكالىق جانە كاسىپتىك ءبىلىم بەرۋ باعدارلامالارىن ازىرلەۋگە بيزنەس سۋبەكتىلەرىن تارتۋ ۇسىنىلدى.
