بقو دەنساۋلىق ساقتاۋ باسقارماسىنىڭ ءباسپاسوز قىزمەتى ءمالىم ەتكەنىندەي, قازىرگى كەزدە قالا مەن اۋدانداردىڭ باس مەملەكەتتىك سانيتار دارىگەرلەرىنىڭ قاۋلىسىنا سايكەس 6 مەكتەپتە 7 سىنىپ كارانتينگە جابىلعان. جىل باسىنان بەرى ىندەت تابىلعان 2899 بالانىڭ 2830-ى جازىلىپ شىقتى. 69-ى ەمدەلۋ ۇستىندە.
كۇنى بۇگىن وبلىس بويىنشا 581 ناۋقاس امبۋلاتورلىق ەم الۋدا. ولاردىڭ 70,5 پايىزىنىڭ اۋرۋى جەڭىل وتۋدە. 6,7 پايىزى ورتاشا, 22,8 پايىزى – سيمپتومى جوقتار. سونداي-اق 871 توسەكتىك 16 ينفەكتسيالىق ستاتسيوناردا جاتقان 179 ناۋقاستىڭ 17-ءسى جانساقتاۋ بولىمشەسىندە. بۇلاردىڭ بىرەۋى اسا اۋىر حالدە. ءينۆازيۆتى ەمەس جاساندى تىنىس الۋ اپپاراتىنا 8, وتتەگى كونتسەنتراتورىنا 9 ناۋقاس قوسىلعان.
پاندەميا باستالعاننان بەرى 38 959, بيىل 29 738 ادامنىڭ كوروناۆيرۋس جۇقتىرعانى تىركەلدى. سوڭعى اپتادا الدىڭعىمەن سالىستىرعاندا, اۋرۋ جۇقتىرۋ 6,9 پايىزعا (21 ناۋقاسقا) تومەندەدى. وبلىس بويىنشا COVID-19 دياگنوستيكاسى بويىنشا 13 زەرتحانا جۇمىس ىستەيدى. سوڭعى تاۋلىكتە 57 زەرتتەۋ جۇرگىزىلدى.
باسقارما مالىمەتىنە قاراعاندا, بيىل 648 ادام كوروناۆيرۋستان كوز جۇمسا, سونىڭ ىشىندە 28-ءى – قاڭتار ايىندا, 15-ءى – اقپاندا, 30-ى – ناۋرىزدا, 41-ءى – ساۋىردە, 57-ءسى – مامىردا, 60-ى – ماۋسىمدا, 144-ءى – شىلدەدە, 139-ى – تامىزدا, 90-ى – قىركۇيەكتە, 44-ءى قازاندا قايتتى.
