Ranking پورتالىنىڭ جازۋىنشا, مەملەكەتتىك قۇرىلىمدا ەڭ بەلسەندى تسيفرلاندىرىلعان جۇيە – بىرىڭعاي جيناقتاۋشى زەينەتاقى قورىنىڭ قىزمەتتەرى. قازىر قور قىزمەتىنىڭ 90 پايىزىن ونلاين تۇردە تۇتىنۋعا بولادى.
«COVID-19 پاندەمياسىنا بايلانىستى تۋىنداعان قيىن جاعداي جانە زەينەتاقى جۇيەسىنىڭ قاتىسۋشىلار بازاسىنىڭ كەڭەيۋى جىلدان-جىلعا بجزق قىزمەتتەرىن اۆتوماتتاندىرۋ وزەكتىلىگىن ارتتىرا ءتۇستى. 1 قازانداعى جاعداي بويىنشا سالىمشىلاردىڭ ينديۆيدۋالدى زەينەتاقى شوتتارىنىڭ (يزش) سانى 11,5 ملن-عا جەتتى. بىلتىرعى كورسەتكىشتەن 0,5 پايىزعا كوپ. جالپى, سوڭعى بەس جىلدا يزش سانى 16,4 پايىزعا كوبەيگەن. بيىل كورسەتكىشتىڭ ءوسۋى سالىمنىڭ بارلىق ءتۇرى بويىنشا بايقالىپ وتىر. اسىرەسە, ەرىكتى زەينەتاقى جارناسى سەگمەنتىندەگى ءوسىم جوعارى (+25,9 پايىز). ودان كەيىنگى ورىنداردا كاسىبي زەينەتاقى جارناسى (+5,2 پايىز) مەن مىندەتتى زەينەتاقى جارناسى (+0,2 پايىز) ورنالاسقان» دەپ جازادى Ranking.
پاندەميا قيىندىقتارىنا قاراماستان قور بيىل 9 ايدا ءوز سالىمشىلارىنا 30,3 ملن قىزمەت كورسەتىپتى. بۇل – بىلتىرمەن سالىستىرعاندا 45,8 پايىزعا جوعارى كورسەتكىش. سونىڭ ىشىندە 22,2 ملن (73,2 پايىز) قىزمەت ونلاين فورماتتا ۇسىنىلعان. 2020 جىلمەن سالىستىرعاندا ونلاين قىزمەتتەر تانىمالدىلىعى 71,2 پايىزعا وسكەن.
سالىمشىلار سايت جانە ءموبيلدى قوسىمشا ارقىلى كەز كەلگەن ۋاقىتتا ءتۇرلى قىزمەتتەردى الا الادى. سونىڭ ىشىندە جەكە زەينەتاقى شوتىنىڭ ءۇزىندى كوشىرمەسىن الۋ, ءوز رەكۆيزيتتەرىنە وزگەرىس پەن تولىقتىرۋ ەنگىزۋ, جەكە زەينەتاقى شوتىنىڭ بار ەكەنى تۋرالى انىقتاما الۋ, تولەمدەر بويىنشا مارتەبەسىن تەكسەرۋ سياقتى تانىمال قىزمەتتەر بار.
«سونىمەن قاتار اۆتوماتتى فورماتتا 5,1 ملن قىزمەت كورسەتىلدى. وعان جەكە زەينەتاقى شوتىن اۆتوماتتى تۇردە اشۋ دا كىرەدى. ماسەلەن, ەگەر جەكە تۇلعادا بجزق-دا اشىق جەكە زەينەتاقى شوتى بولماسا وندا ول العاشقى جارنانى سالعاننان كەيىن شوت اۆتوماتتى تۇردە اشىلادى. 2021 جىلدىڭ 26 قازانىنان باستاپ جەكە زەينەتاقى شوتىن اۆتوماتتى تۇردە اشۋ بويىنشا زاڭعا وزگەرىستەر ەنگىزىلدى. سونداي-اق قوردا جەكەلەگەن زەينەتاقى قىزمەتتەرىن دە جەكە كۋالىكتى كورسەتپەي-اق الۋعا مۇمكىندىك بار. ول ءۇشىن ەGovMobile ءموبيلدى قوسىمشاسىندا قۇجاتتىڭ تسيفرلى نۇسقاسى بولسا جەتكىلىكتى» دەپ جازادى پورتال.
قازىرگى كەزدە Google Play سەرۆيسىنىڭ «قارجى» كاتەگورياسىندا بجزق ءموبيلدى قوسىمشاسى توپ-10 قاتارىنا كىرەدى.
