سەناتورلار زاڭعا وزگەرىستەر جوباسىن قارادى

باقىتجان جۇماعۇلوۆ بىرقاتار زاڭنامالىق اكتىلەردى، سونداي-اق كوميسسيادا قولعا الىنعان باسقا دا قۇجاتتاردى عىلىم جانە ءبىلىم جونىندەگى كوميسسيا وتىرىسىندا ارىپتەستەرىمەن بىرگە تالقىلادى. پارلامەنتشىلەر «عىلىم جانە تەحنولوگيالار سالاسىنداعى زياتكەرلىك قىزمەت ناتيجەلەرىن كوممەرتسيالاندىرۋ تۋرالى»، «عىلىمي جانە عىلىمي-تەحنيكالىق قىزمەت سۋبەكتىلەرىن مەملەكەتتىك اتتەستاتتاۋ (اككرەديتتەۋ) تۋرالى» ۇلگى زاڭداردىڭ جوبالارىن جانە «عىلىمي جانە عىلىمي-تەحنيكالىق ساراپتاما تۋرالى» ۇلگى زاڭعا وزگەرىستەر جوباسىن قارادى.

وتىرىستا عىلىم جانە ءبىلىم بەرۋ سالاسىنداعى ۇلگى زاڭنىڭ كەلەشەك باعىتتارى بويىنشا ۇسىنىمدار، سونداي-اق ءبىلىم بەرۋ سالاسىنداعى تسيفرلاندىرۋدى نورماتيۆتىك رەتتەۋ تۋرالى دا ءسوز بولدى.

سەناتور دينار نوكەتاەۆا ءوز كەزەگىندە تاۋەلسىز مەملەكەتتەر دوستاستىعىنىڭ 30 جىلدىعىنا ارنالعان دوڭگەلەك ۇستەل جۇمىسىنا قاتىستى. دەپۋتات ءوز سوزىندە وسى كەزەڭدە تمد الاڭىنىڭ ارقاسىندا بىرلەستىككە قاتىسۋشى مەملەكەتتەردىڭ ىنتىماقتاستىعىن كۇشەيتۋ جانە ءوزارا ءىس-قيمىلىنا قارقىن بەرۋ ءۇشىن كوپتەگەن ىستەر اتقارىلعانىن اتاپ ءوتتى.

«تاۋەلسىز مەملەكەتتەر دوستاستىعى ءوزىنىڭ 30 جىلدىق تاريحىندا پوستكەڭەستىك كەڭىستىكتىڭ ءتۇرلى باعىتتارىندا، ونىڭ ىشىندە مادەني-گۋمانيتارلىق سالادا ءوزارا ءتيىمدى ىنتىماقتاستىق پەن تەڭ قۇقىلى مەملەكەتارالىق ديالوگ ءۇشىن جەتەكشى الاڭعا اينالدى. 30 جىل بويى ىنتىماقتاستىق تەتىكتەرىن ۇنەمى جەتىلدىرۋ، ولاردىڭ تيىمدىلىگىن ارتتىرۋ ءاربىر قاتىسۋشى مەملەكەتكە مادەني-گۋمانيتارلىق كەڭىستىك قۇرۋدا نەگىز قالاۋشى قاعيداتتاردى، ادىستەر مەن پراكتيكالىق قۇرالداردى ازىرلەۋگە مۇمكىندىك بەردى»، - دەدى سەناتور.

سۋرەتتى تۇسىرگەن ە.ۇكىباەۆ